काठमाडौं । नेपाल शिक्षक महासंघले विद्यालय शिक्षा ऐन जारी गर्नुपर्ने माग गर्दै जारी आन्दोलनलाई थप सशक्त बनाउने निर्णय गरेको छ भने शिक्षकहरु बुधबार अझ सशक्त भएर सडक ओर्लिएका छन् ।
यदी सरकारले आफूहरुको माग सुनुवाई नगरे विद्यालय बन्द तथा कक्षा १२ को परीक्षासमेत बहिष्कारको घोषणा गरेका छन् । सोमबार बसेको महासंघको बैठकले ११ वैशाखदेखि सुरु हुने कक्षा १२ को परीक्षा बहिष्कार गर्ने निर्णय गरेको हो।
महासंघका अध्यक्ष लक्ष्मीकिशोर सुवेदीले भने, “कक्षा १२ को परीक्षामा कोही पनि शिक्षक वा कर्मचारी नहुने निर्णय गरेका छौं।”
प्रदर्शनमा देशका ७७ जिल्लाबाट आएका शिक्षकहरुको सङ्ख्या बढी रहेको छ ।
यस्तैमा दोलखाबाट आएका शिक्षकहरु भन्छन् – ‘जबसम्म हाम्रो माग पूरा हुँदैन हामी फर्कन्नौँ, हाम्रा विध्यार्थी बिचलित भइसके । छिटो टुंगोमा पुग्न सरकारको ध्यानाकर्षण होस ।’
वैशाख नयाँ शैक्षिक वर्षको आरम्भ समय पनि हो । सरकार नयाँ शैक्षिक सत्रको सुरु भएसँगै विद्यालय भर्ना अभियानमा जुटिरहँदा शिक्षकहरू भने सडकमा छन्। जसका कारण देशभरका विद्यालय बन्द हुने सम्भावना देखिएको छ । आफूहरुको मागप्रति सरकार अनुदार रहेको भन्दै आन्दोलनरत शिक्षकहरु आक्रोशित बन्दै आएका छन् ।
