काठमाडौं । प्रधानमन्त्री केपी ओली थाइल्याण्ड भ्रमणबाट फर्किदै गर्दा देशका आन्तरिक मामलामा सन्तुलित देखिएका छन् ।
विरोधी र प्रतिपक्षीमाथि खरो सुनिने ओलीले शनिबार भने सम्हालिएर सन्तुलित अभिव्यक्ति दिने प्रयास गरे । शिक्षक आन्दोलनदेखि तीनकुने प्रकरणमा ओलीले देखाएको यो चलाखीले स्थिति साम्य बन्ला त ? प्रधानमन्त्री केपी ओली थाइल्याण्ड भ्रमणमा रहेकै बेला काठमाडौंका सडकमा शिक्षकहरु विभिन्न माग राख्दै आन्दोलित भइरहेका थिए । सरकारले बोलाएको वार्ता अस्वीकार गर्नेदेखि उनीहरुले शिक्षा विधयेक तत्काल जारी गर्नुपर्ने माग राखिरहेका छन् ।
सरकारले आह्वान गरेको वार्ता नै अस्वीकार गरेका शिक्षकहरुको सडक आन्दोलनले मुलुकको सामूदायिक शिक्षाको गुणस्तर थप खस्किने चिन्ता पनि उत्तिकै छ ।
शिक्षाको स्थितिमाथिका अनेक टिप्पणीकाबीच केही समय पहिले प्रधानमन्त्री ओलीले एक कार्यक्रममा विद्यार्थी पास गराउन नसक्ने शिक्षकको तलब वृद्धि गर्न नसकिने भन्दै भडास पोखेका थिए ।
ओलीले शिक्षकको तलव वृद्धिदेखि करारलाई स्थायी गर्ने मागको विषयमा समेत कडा भडास पोखेको धेरै लामो समय भएको छैन् । गएको फागुन १३ गतेमात्रै आक्रोश पोखेका ओलीले थाइल्याण्डबाट फर्किदा भने सन्तुलन मिलाउन खोजेको देखिन्छ । ओलीले फागुनमा आक्रोश पोखेकै विषय लिएर शिक्षकहरु अहिले सडकमा आन्दोलित छन् ।
यो पक्ष समेतलाई ओलीले ध्यानमा राखेर चलाखिपूर्वक संयमता अपनाएको देखिन्छ । त्यसैले नै ओलीले अहिले त्योबेलाको जस्तो भडास पोखेनन् । बरु, सरकारले शिक्षकको आवाज सुन्ने भन्दै आन्दोलन वार्ताको माध्यमबाट समाधान खोजिने दाबी गरे ।
ओली विरोधी र प्रतिपक्षीसमक्ष कडा पेश हुने नेतामा पर्छन् । उनको चरित्र नै यस्तो बनेको छ कि अनेक उखान र वान्की मिलाएर प्रतिपक्षी वा विरोधीमाथि चोटिला प्रहार गर्ने । तर, उनले शैलीमाथि केहि फरकपना देखाउन खोजिरहेका छन् ।
तीनकुने प्रकरण छानविनका लागि कांग्रेस माओवादी केन्द्रसहित राजावादि दल राष्ट्रिय प्रजातन्त्र पार्टीले समेत भनिरहेको जस्तो न्यायिक छानविन आयोगको विषयमा समेत ओली नरम सुनिए । ओलीले निष्पक्ष अनुसन्धान हुने तर, न्यायिक छानविनमा विचार गर्न सकिने भने ।
यसरी हेर्दा प्राय आक्रामक पेश हुने ओलीले आफूलाई समस्यासँग जुध्ने गरि नयाँ आयाममा अभिव्यक्ति राख्ने कुटिलता अपनाउन थालेको देखिन्छ ।
देशभित्रको राजनीतिक परिस्थिति बिग्रिन पुगेको मात्रै छैन्, गणतन्त्रमाथि नै प्रश्न उठेको छ । यस्तो जोखिमले सत्तामै संकट निम्तिने खतरा देखिएका बेला ओलीले राजनीतिक सुझवुझपूर्ण कदम चाल्ने काम गर्लान त ? चासो देखिन्छ ।
यता, वामपन्थी दलहरुमाथि समेत उनले सदासयता देखाउन थालेका छन् । समाजवादी मोर्चाको कार्यक्रमको प्रसंसा होस वा नेकपा एकीकृत समाजवादीको कार्यालयमा केहि समय व्यतित गर्ने र कार्यालयको अनुगमन गर्ने विषय नै किन नहोस, यि र यस्ता गतिविधिका कारण ओलीले पछिल्ला दिनहरुमा आफूलाई आक्रामक शैलीबाट सम्हाल्ने कोसिस गर्न थालेको देखिन्छ ।
