काठमाडौँ । नेपालमा आगलागी जोखिम न्यूनीकरण तथा विद्युतीय सुरक्षासम्बन्धी नवीनतम प्रविधिको प्रवर्द्धन गर्ने उद्देश्यसहितको अन्तर्राष्ट्रिय सम्मेलन तथा प्रदर्शनी भोलि (चैत २४ं) बाट काठमाडौँमा सुरू हुँदैछ। 

एशिया प्यासिफिक सेक्युरिटी एसोसिएसन (आप्सा) नेपालले आयोजना गर्न लागेको ‘फायर सेफ्टी एन्ड इलेक्ट्रोनिक सेक्युरिटी इन्टरनेशनल कन्फरेन्स २०२५’ चैत्र २४ र २५ गते दरबारमार्गस्थित होटल याक एण्ड यतिमा हुनेछ। 

आयोजकले सम्मेलनका सबै तयारी पूरा भएको जानकारी दिएको छ। आप्सा नेपालका अध्यक्ष सुनिल कुमारका अनुसार सम्मेलनको उद्धघाटन परराष्ट्रमन्त्री डा. आरजु राणा देउवाले गर्ने छिन् भने गृह मन्त्रालय, सहरी विकास मन्त्रालय, नेपाल प्रहरी, सशस्त्र प्रहरी बल, नेपाली सेना, ७५३ वटै स्थानीय तहका प्रतिनिधिहरू, उद्योग क्षेत्रका अग्रणी व्यक्तित्वहरू तथा आगलागी र विद्युतीय सुरक्षाका विज्ञहरूको सक्रिय सहभागिता रहनेछ। 

सम्मेलनमा आगलागी न्यूनीकरण तथा विद्युतीय सुरक्षाका क्षेत्रमा विश्वभर भइरहेको नवीनतम प्रविधि, प्रवृत्ति र उत्कृष्ट अभ्यासहरू प्रस्तुत गरिनेछ।

कार्यक्रममा चीन, हङकङ, इन्डोनेसिया, भारत, जापान, मकाउ, मलेसिया, फिलिपिन्स, सिंगापुर, दक्षिण कोरिया, श्रीलङ्का, थाइल्यान्ड र भियतनामसहित १४ राष्ट्रका विज्ञहरूले कार्यपत्र प्रस्तुति गर्नेछन्। छलफल सत्रहरू, प्रविधि प्रदर्शनी र अन्तरक्रियात्मक कार्यक्रममार्फत सहभागीहरूलाई अन्तर्राष्ट्रिय स्तरको जानकारी प्रदान गरिनेछ। नेपालमा हरेक वर्ष आगलागीका घटनाबाट ठूलो जनधनको क्षति हुने क्रम नरोकिएकाले यस किसिमका कार्यक्रम अत्यन्तै आवश्यक रहेको आयोजकहरूको भनाइ छ।

सरकारी तथा स्थानीय तहले विभिन्न प्रयास गरे पनि समुदाय स्तरमा सचेतना अभिवृद्धि तथा प्रविधिमैत्री समाधानको खाँचो कायमै रहेको निष्कर्षसहित यो सम्मेलन आयोजना गरिएको हो।

आप्सा नेपालका कार्यक्रम निर्देशक सुरेश श्रेष्ठ, गाउँपालिका राष्ट्रिय महासंघ नेपालका कार्यकारी निर्देशक राजेन्द्र कुमार प्याकुरेललगायतले सम्मेलन नेपालमा सुरक्षा नीतिमा सुधार ल्याउने दिशामा एक महत्वपूर्ण कोशेढुंगा सावित हुने विश्वास व्यक्त गरेका छन् । 

सम्मेलनले नीति निर्माता, विज्ञ, सुरक्षाकर्मी तथा व्यवसायीहरूलाई एउटै मञ्चमा ल्याई सहकार्यको अवसर सिर्जना गर्नेछ। दुई दिनसम्म सञ्चालन हुने यो सम्मेलन नेपालको सुरक्षा प्रविधि विकास, आगलागी न्यूनीकरण रणनीति तथा विद्युतीय सुरक्षामा महत्वपूर्ण टेवा पुर्याउने अपेक्षा गरिएको छ।