काठमाडौं । बुटवलको सुप्रिम सहकारी ठगी र संगठित अपराधको मुद्दामा अनुसन्धानमा रहेका रास्वपा सभापति रवि लामिछानेलाई पुनः थुनामा पठाइने भएको छ ।
उच्च अदालत तुलसीपुरको बुटवल इजलासले रविलाई थुनामा पठाउन आदेश दिएको हो । जिल्ला अदालत रुपन्देहीको आदेश बदर गर्दै उच्च अदालतले थुनामा पठाउने आदेश गरेको हो । न्यायाधीशद्वय रमेश ढकाल र स्वीकृति पराजुलीको संयुक्त इजलासले रविलाई जिल्ला अदालत रुपन्देहीको बदर गर्दै थुनामा पठाउने आदेश जारी गरेको हो ।
जिल्ला अदालतको आदेशविरुद्ध रविसहित अन्य अभियुक्तहरुले उच्च अदालत तुलसीपुरको बुटवल इजलासमा पुनरावेदन निवेदन दिएका थिए ।
रुपन्देही जिल्ला अदालतले रविलाई १ करोड धरौटीमा छाडेको थियो । यसैगरि, पूर्वडीआईजी छविलाल जोशीलाई पनि थुनामा पठाउने आदेश गरिएको छ ।
रविलाई बुटवल लगिँदै
रास्वपा सभापति रवि लामिछानेलाई भैरहवा लैजान त्रिभुवन विमानस्थल पुर्याइएको छ । उच्च अदालत तुलसीपुरको बुटवल इजलासले जिल्ला अदालत रुपन्देहीको फैसलालाई उल्ट्याउँदै फेरि थुनामा पठाउन आदेश दिएपछि रवि शुक्रबार नै पक्राउ परेका थिए । पक्राउपछि जिल्ला प्रहरी परिसर, काठमाडौंकै हिरासतमा राखिएका उनलाई आज भैरहवा लान लागिएको हो ।
