काठमाडौं । स्थानीय सरकारहरुले स्थानीय कला संस्कृति, भाषा सहित्य तथा स्थानीय सम्पदाहरुको संरक्षण एवम् प्रवद्र्धनलाई प्राथमिकता दिन थालेका छन् ।
आफ्नो मौलिकपन संरक्षणमा जुटेका स्थानीय सरकार मध्येकै एक हो, काठमाडौंमा रहेको गोकर्णेश्वर नगरपालिका । सिंहदरबारको आँखामा पर्न नसकेको मुलुकको भाषा साहित्य कला संस्कृति एवम् साहित्यकारहरुलाई गोकर्णेश्वर नगरपालिकाले हरेक वर्ष सम्मान एवम् प्रोत्साहनका गर्दै आएको छ । यस वर्ष पनि नगरपालिकाले सम्मान कार्यलाई निरन्तरता दिएको छ ।
स्थानीय सरकारहरु आफ्नौ मौलिकता जोगाउने प्रयासमा सक्रिय देखिन्छन् । त्यसमा पनि काठमाडौंमा रहेको गोकर्णेश्वर नगरपालिकाले त स्थानीय कला संस्कृति, भाषा सहित्य तथा स्थानीय सम्पदाहरुको संरक्षण एवम् प्रवद्र्धनलाई उच्च प्राथमिकतामा राखेको देखिन्छ ।
सम्पदा संरक्षक, कलाकार, पत्रकार एवम् साहित्यकारहरुलाई सम्मान गर्दै स्थानीय मौलिकता संरक्षणमा थप प्रेरणा गर्ने कार्य गोकर्णेश्व नगरपालिकाले गरिरहेको छ । यहि क्रममा शुक्रबार समेत यस नगरपालिकाले विभिन्न व्यक्तित्वहरुलाई सम्मान ग¥यो ।
भाषा सहित्य मार्फत राष्ट्रिय तथा स्थानीयस्तरमा योगदान गरेका वरिष्ठ साहित्यकार डा. वासुदेव त्रिपाठी र वारिष्ठ साहित्यकार विजय चालिसेलाई जनही रु. एक लाख नगद पुरस्कार सहित नगरपालिकाले सम्मान प्रदान गरेको छ । गोकर्णेश्वर नगरपालिकाले आफनो बार्षिक कार्यक्रम अन्र्तगत हरेक बर्ष भाषा साहित्य, कला, तथा संगित क्षेत्रमा योगदान गर्ने साहित्यकार तथा सर्जहहरुलाई सम्मान गर्ने क्रममा नगद पुरस्कार तथा सम्मान प्रदान गरेको हो ।
स्थानीय जनप्रतिनिधिहरुले स्थानीय कला संस्कृति भाषा साहित्यको सम्मान र संरक्षण गर्ने जिम्मेवारी अनुरुप नगरपालिकाले सम्मान गरेको जनाएका छ ।
सम्मान कार्यक्रमलाई सम्बोधन गर्दै नेपाल सरकारका पूर्वसचिव गोपी मैनालीले स्थानीय कला सस्कृति तथा भाषा साहित्यका विकासमा देशभरका ७ सय ५३ स्थानीय पालिकाहरु जिम्मेवार हुनु पर्ने बताए ।
गोकर्णेश्वर नगरपालिका भित्र रहेको पुराना साहित्यकार रमेश विकाल, र्भैरव अर्याल लगायत साहित्यकार र नयाँ पुस्ताका लेखक कवि तथा सर्जकहरुको खोज तथा अनुसन्धामा नगरपालिकाले बिभिन्न ग्रन्थहरु प्रकाशन समेत गरेको छ ।
नगर सम्मानवाट सम्मानित वरिष्ठ साहित्यकार डा. वासुदेव त्रिपाठी र साहित्यकार लेखक विजय चालिसेले स्थानियस्तरवाट प्राप्त सम्मान राष्ट्रियस्तरको भन्दा पनि महत्वपूर्ण हुने हुदाँ स्थानीय तहले यस्ता कार्यक्रमहरुलाई निरन्तरता दिन सक्नु पर्ने प्रतिक्रिया दिएका छन् ।
