काठमाडौं । गत चैत १५ गतेको अराजक प्रदर्शनपछि राजावादी आन्दोलन मत्थर भएजस्तो देखिएको छ । राजसंस्था पुर्नस्थापनाका लागि भिषण संघर्ष चर्काउन भन्दै गठित जनआन्दोलन समिति आफै विवादित छ । तर पनि संसदको पाँचौ ठूलो दल राष्ट्रिय प्रजातन्त्र पार्टी राप्रपा भने आफ्नै किसिमले आन्दोलन चर्काउने तयारीमा छ । 

विवादित मेडिकल ब्यवसायी दुर्गा प्रसाईँ नेतृत्वको राष्ट्र, राष्ट्रियता र नागरिक बचाउ महाअभियान’ आयोजनामा चैत १५ गतेको प्रदर्शनको क्रममा ठूलो धनजनको क्षति भएपछि यतिबेला राजावादी आन्दोलन मत्थर भएजस्तो देखिएको छ । चैत १५ को प्रदर्शनका क्रममा एक पत्रकारसहित २ जनाले ज्यान गुमाए भने आगाजनी, तोडफोड र ब्यापारिक केन्द्रमा लुटपाटसमेत भएको थियो । 

सोही घटनाका कारण राप्रपा बरिष्ठ उपाध्यक्ष रविन्द्र मिश्र र महामन्त्री धवलसम्शेर राणा अहिले पनि प्रहरी हिरासतमै छन् । पार्टीका बरिष्ठ उपाध्यक्ष मिश्र र महामन्त्री राणालाई छुटाउन राप्रपाले संसदबाट चर्को दबाब दिँदै गर्दा संसदको हिउँदै अधिवेशन नै अन्त्य भएको छ । अब संसद सून्य भएपछि राप्रपाले सडक आन्दोलन चर्काउने तयारी गरेको छ । 

आन्दोलनको तयारीका लागि नै राप्रपाले विभिन्न माग गर्दै विहीबार मात्रै सरकारलाई ज्ञापनपत्र बुझाएको छ । 

राप्रपाले नैतिक समर्थन मात्रै रहेको जनाएको चैत १५ को प्रदर्शनमा पार्टीका बरिष्ठ उपाध्यक्ष मिश्र र महामन्त्री राणा नै अग्रमोर्चामा देखिएका थिए । प्रसाई समूहको आयोजनामा भएको कार्यक्रमलाई उत्तेजित बनाउने काम मिश्र र राणाले नै गरेको प्रहरीले जनाएको छ । त्यसैले उक्त घटनाबारे सत्यतथ्य र निश्पक्ष छानिबन गर्न राप्रपाले माग गरिरहेको छ । 

प्रधानमन्त्री केपी शर्मा ओली बिमस्टेक बैठकमा भाग लिन यतिबेला थाइल्याण्डमा रहेका कारण राप्रपा अध्यक्ष लिङदेनले विहीबार कार्यबाहक प्रधानमन्त्री प्रकाशमान सिंहलाई ज्ञापनपत्र बुझाएका हुन् । 

राप्रपाले यसअघि मिश्र र राणालाई रिहा गर्न सरकारलाई २४ घण्टे अल्टिमेटम दिएको थियो । तर प्रहरीले भने उनीहरुको म्याद थप गरेर अनुसन्धान जारी राखेको छ । 

ज्ञापनपत्र बुझ्दै कार्यवाहक प्रधानमन्त्री सिंहले प्रदर्शनमा भएका अराजक गतिविधिहरुबारे सरकारले गहिरोसँग अध्ययन गरिरहेको बताए । यद्यपि राप्रपाको मागहरु सम्बोधन गर्न आवश्यक छलफल गर्ने प्रतिवद्धता पनि उनले जनाएका छन् । 

गृहमन्त्रीको राजीनामा माग 

प्रमुख राजनीतिक दलका नेताहरुले भने चैत १५ को उक्त घटनाको कारक पूर्वराजा ज्ञानेन्द्र शाह भएको बताइरहेका छन् । ज्ञानेन्द्रले आह्वान गरेका कारण राजावादीहरु सडकमा आएको भन्दै काठमाडौं महानगरपालिकाले पनि आन्दोलनका क्रममा काठमाडौंमा फोहोर, तोडफोड गरी क्षति पु¥याएको भन्दै पूर्वराजाकै नाममा जरिवानाको पत्र पठाएको छ ।

तर शान्तिपूर्ण रुपमा कार्यक्रम गर्न लाग्दा मञ्चमै ताकेर अश्रुग्यास प्रहार गरी प्रदर्शनकारीलाई भड्काउने काम सरकारले गरेको राजावादीहरुले बताइरहेका छन् । 

घटनाको दोषी गृहमन्त्री नै रहेको उनीहरुको ठहर छ । त्यसैले उक्त घटनाको निश्पक्ष छानिबनका लागि पनि गृहमन्त्री लेखकले राजीनामा दिनुपर्ने राप्रपाले जनाएको छ । साथै, दमनको नेतृत्व गर्ने प्रहरी कमाण्डर तथा प्रशासनिक कर्मचारीलाई निलम्वन गर्नुपर्ने माग पनि राप्रपाले अघि सारेको छ । 

चैत १५ को घटनाले एक ठाउँमा राजावादी

पूर्वराजा ज्ञानेन्द्र शाहले राप्रपाकै नेताहरुलाई उपयोग गरेर जनआन्दोलन समिति बनाएपछि राप्रपा दुई समूहमा विभाजित भएको थियो । तत्कालिन राष्ट्रिय पञ्चायतका अध्यक्ष नवराज सुवेदी नेतृत्वमा मिश्रलाई सदस्य सचिव बनाएर जनआन्दोलन समिति बनाएपछि राप्रपा अध्यक्ष लिङदेनसहित अन्य राजावादीहरु पनि असन्तुष्ट बनेका थिए । अझ चैत १५ मा ज्ञानेन्द्र शाहकै हैसियतमा दुर्गा प्रसाईँको तस्विर अंकित ब्यानरले पनि राजावादीहरुलाई अझै झस्काइदियो । 

अझ फागुन २५ गते पोखराबाट फर्किँदै गरेका ज्ञानेन्द्र शाहको स्वागतमा राप्रपा लगायतका नेताहरुको उपस्थितिलाई प्रसाईँले कटाक्ष नै गरेका थिए । राजा फाल्नेहरु नै अहिले जस लिन अघि सरेको भन्दै प्रसाईँले दिएको सार्वजनिक अभिब्यक्तिका कारण पनि राप्रपा नेताहरु प्रसाईँलाई नेता मान्न तयार थिएनन् । 

त्यसैले चैत १५ को कार्यक्रमलाई खासै महत्व दिएका थिएनन् । तर सरकारले कार्यक्रम नै गर्न नदिएर निषेधको राजनीति गरेको आशंका राजावादीहरुको छ । नेतृत्वको हानाथाप र राजनीतिक स्वार्थले तितरवितर बनेकाहरुलाई चैत १५ कै घटनाले गर्दा एकै ठाउँमा ल्याउने देखिएको छ ।