काठमाडौं । काठमाडौं महानगरपालिकामा पछिल्ला केही दिन यति नाटकीय बनेका छन् कि कुनै हलिउड थ्रिलर फिल्मको कथालाई पनि पछि पार्छन् । 

काठमाडौं टावर निर्माणमा बदमासी गरेको भन्दै मेयर बालेन शाहले प्रमुख प्रशासकीय अधिकृत सरोज गुरागाईंलाई बिदा दिएका थिए । गुरागाईँ नै कार्यालयमा फिर्ता भएपछि विहीबार महानगरको दृष्य रोचक बन्न पुग्यो । 

यो घटनाले बालेन शाह र वडाध्यक्षहरूबीच गहिरिँदो दरार, प्रशासनिक विवाद, आर्थिक संकट र नीतिगत अन्योललाई उजागर गरिरहेको छ ।

काठमाडौं महानगरपालिकाको कमलादीस्थित कार्यालय बिहीबार बिहानैदेखि तनावको भूमरीमा थियो । मेयर बालेनले कारबाही गरेका प्रमुख प्रशासकीय अधिकृत नै जनप्रतिनिधि र कर्मचारीहरुको बलमा विहीबार कार्यालय छिर्ने योजनामा थिए । तर, नगर प्रमुख बालेन शाहले उनलाई रोक्न नगर प्रहरीको बलियो पर्खाल खडा गरिसकेका थिए ।

दोस्रो पक्ष पनि तयार थियो । पाँच महिनादेखि तलब नपाएका कर्मचारीहरूको आँखामा आक्रोशको ज्वाला दन्किरहेको थियो । तलब नपाएर आक्रोशित बनेका तिनै कर्मचारीको काँध चढेर प्रमुख प्रशासकीय अधिकृत गुरागाईं कार्यालयतर्फ अघि बढे । मेयरको निर्देशनअनुसार महानगर प्रहरी खम्बा भएर उभिए । 

गुरागाईंलाई रोक्ने प्रयास देख्दा कर्मचारीहरू झन् उत्तेजित भए । नगर प्रहरीको प्रतिरोधको सामना गर्दै कर्मचारीहरू अघि बढे । नगर प्रहरी, जनप्रतिनिधि र कर्मचारीहरू आमनेसामने भए । एकतर्फ बालेन शाहको शक्ति, अर्कोतर्फ कर्मचारीहरूको विद्रोह । घम्साघम्सीबीच गुरागाईंलाई कार्यालयभित्र पु¥याउने प्रयास जारी रह्यो । कर्मचारीहरूले ढोका नै फोडे । सिसाका टुक्रा चारैतिर छरिए । अन्ततः हतास नगर प्रहरीहरूलाई छल्दै, धकेल्दै, कर्मचारी र जनप्रतिनिधिहरू गुरागाईंलाई कार्यकक्षभित्र घुसाउन सफल भए । 

काठमाडौं महानगरपालिकामा मेयर बालेन र प्रमुख प्रशासकीय अधिकृत गुरागाईंबीचको टकराव रोचक मोडमा पुगेको छ । गुरागाईं कार्यालय प्रवेश गर्न खोज्दा मेयर साहले आफ्नै कार्यकक्षमा चाबी लगाएर ‘गायब’ हुने रणनीति अपनाए । 

कर्मचारीहरू भने मेयर साहको ‘इगो’ मात्र नभई प्रशासनिक काम नै अवरुद्ध भएको भन्दै चिढिएका छन् । स्थिति झनै पेचिलो बनेको छ । नियमित तलब नपाएपछि कर्मचारीहरू असन्तुष्ट छन् । वडाध्यक्षहरू समेत मेयरको कार्यशैलीबाट आजित देखिन्छन् ।

मेयर बालेनले हाजिरकापी र कार्यालयको साँचो त बोकेर हिँडे नै, गुरागाईंको गाडीलाई महानगरको पार्किङमै ह्वील लक लगाएर चल्नै नसक्ने बनाए । समस्या समाधानभन्दा मेयर साह स्टन्टबाजीमा रमाइरहेको आरोप लागिरहेको छ । यता, महानगरका कर्मचारी तीन महिनादेखि तलब नपाएर झन् आक्रोशित छन् । 

गुरागाईंलाई महानगर प्रवेश असम्भव नबनाइएको भएपनि उनले शुक्रबारदेखि नियमित रूपमा काम थाल्ने नगरप्रवक्ताले बताएका छन् ।

प्रशासनिक किचलोका कारण तीन महिनादेखि आर्थिक संकटमा परेका कर्मचारीहरू पनि गुरागाईं हाजिर भएसँगै रोकिएको तलब पाउनेमा आशावादी छन् । 

काठमाडौं महानगरमा मेयर बालेन र वडाअध्यक्षहरूबीचको विवाद झन् गहिरिंदै गएको छ । वडाअध्यक्षहरू शाहलाई कार्यपालिका बैठकमा जवाफ दिनुपर्ने अडानमा छन् । तर, शाह भने बैठक बोलाउन इच्छुक देखिँदैनन् । १० चैतमा १८ जना वडाअध्यक्षहरू मेयर बालेनलाई भेट्न उनको कार्यकक्ष पुगे ।

नेपाली कांग्रेसबाट निर्वाचित वडाअध्यक्षहरूको टोलीले कार्यपालिका बैठक तुरुन्तै डाक्न आग्रह ग¥यो । उनीहरूले मेयरलाई प्रधानमन्त्रीसँग भेटेर विवाद सुल्झाउन सल्लाह दिएका थिए । 

प्रधानमन्त्रीको नाम सुनिनसाथ बालेन रिसाए । तर, वडाअध्यक्षहरू अझै पनि एकताबद्ध छन् । उपमेयर सुनिता डंगोल पनि वडाध्यक्षहरुको पक्षमा देखिएकी छन् । ‘कार्यपालिका बैठक बोलाउनैपर्छ, नियम सबैलाई लागु हुनुपर्छ’ भन्ने वडाध्यक्षहरुको भनाई छ । 

बालेनकै कार्यालय तोडफोड : अब जरिवाना के नाममा काट्लान् ?

‘फोहोर गरे जरिवाना !’ काठमाडौं महानगरपालिकाका मेयर शाहको यो नारा सर्वत्र चर्चित छ । तर, अचम्मको कुरा के भने, यसपालि फोहोर र तोडफोडको आरोप उनकै कार्यालयमा लागेको छ । 

गुरागाईंलाई कार्यकक्ष प्रवेश गर्न रोक लगाएपछि कार्यालयमा तनाव चुलियो । आक्रोशित कर्मचारीहरूले ढोका फोड्ने प्रयास गरे, ताला फुटाए अनि एकछिनमै ढोकाको सिसा पनि चकनाचुर भयो । 

कार्यालयको अन्य संरचनामा समेत क्षति पुग्यो । अब प्रश्न उठेको छ, यसको जरिवाना कसले तिर्छ ? महानगरपालिकाले हालसम्म सार्वजनिक स्थानमा फोहोर गर्ने वा तोडफोड गर्ने व्यक्तिलाई जरिवाना गर्दै आएको छ । अब भने बालेनकै कार्यालयमा तोडफोड र फोहोर पनि भएको छ । 

यस्तो अवस्थामा जरिवाना पत्र कसको नाममा काट्ने ? वडाध्यक्षहरू बालेनले नै तिर्नुपर्ने बताउँछन् । मेयर शाहले यस घटनालाई कसरी लिन्छन् । जरिवानाको परिपत्र उनकै नाममा काटिन्छ कि नियमै फेरिन्छ ? यो चासोको विषय बनेको छ । 
 
काठमाडौं भ्यू टावरको नक्सा प्रकरणः महानगरभित्र ‘भूइँचालो’

काठमाडौं महानगरपालिकाभित्र अहिले ठुलै राजनीतिक ‘भूइँचालो’ गएको छ । केन्द्रमा छन् प्रमुख प्रशासकीय अधिकृत सरोज गुरागाईं र उनीमाथि मडारिएको विवादको कालो बादल अझ बाक्लिँदै गएको छ । सबै कुरा थाहा पाएपछि मेयर बालेन शाहको आक्रोश फुट्न बाँकी थिएन । उनले नेताहरुलाई टुकुचामा गाड्ने धम्की दिए । किन ? कारण थियो काठमाडौं भ्यू टावर । २०७२ को महाभूकम्पपछि २९ तले टावरको योजना १२ तलामा सीमित गरियो । तर, निर्माण कम्पनीले ७ तला थपेर १९ तलाको प्रस्ताव हाल्यो । 

त्यसमाथि मेयर बालेनको टेबलमा पुग्नु अगाडि नै प्रशासकीय अधिकृत गुरागाईंले स्वीकृति दिइसकेको खुलासा भयो । स्वीकृति दिने बेला न त बालेनलाई सोधियो न त प्रक्रिया नै पूरा गरियो । नक्सा प्रकरणले राजनीतिक संकटको रूप लिँदै गर्दा, महानगरका भित्ता पनि थर्किन थालेका छन् ।

काठमाडौं महानगरपालिकाको यो शक्ति संघर्ष तत्काल समाधान नखोजिए अझै जटिल बन्न सक्छ । भ्यू टावर नक्सा प्रकरणदेखि लिएर कार्यालयभित्रै तोडफोडसम्मका घटनाहरूले प्रशासनिक पारदर्शिता र कार्यशैलीबारे गम्भीर प्रश्न उठाइरहेका छन् । बालेन शाहले आफ्नो नीति र अडानलाई कायम राख्छन् कि सहरको प्रशासनिक गतिरोध अन्त्य गर्न कुनै सहमतिको बाटो अपनाउँछन् ? त्यो हेर्न बाँकी छ ।