काठमाडौं । खेलकुदका लागि छुट्याएको बजेटमा अर्थ मन्त्रालयले २५ प्रतिशत कटौति गरेपछि यसले अब आयोजना गर्ने भनिएको दशौं राष्ट्रिय खेलकुद प्रतियोगिता नै अन्योलमा पर्ने अवस्था सृजना भएको छ । यद्दपी, प्रतियोगिता समयमै सम्पन्न गर्ने गरि आन्तरिक गृहकार्य गरिरहेको खेलकुद मन्त्रालयले जनाएको छ । दशौं राष्ट्रिय खेलकुदको आयोजनामा पटक–पटक अवरोधको स्थिति देखिएपछि अहिले खेलकुद मन्त्रालयलाई सांसदहरुले दबाब नै दिएका छन् ।
दशौं राष्ट्रिय खेलकुद प्रतियोगिताका लागि कहिले केही त कहिले केही अप्ठ्यारा देखाउन थालिएको छ । कहिले बजेटको समस्या त कहिले आन्तरिक अन्य कारण देखाउदै दशौं राष्ट्रिय खेलकुदको मिति सार्ने काम पनि भइरहेका छन् ।
त्यसैले अहिले सांसदहरुले नै प्रतियोगितामा अन्योलता किन ? के फेरि पनि मिति सारिने हो ? भन्दै प्रश्न गर्न थालेका छन् ।
सांसदहरुले दशौं राष्ट्रिय खेलकुद आयोजना नै गर्न नसक्ने अवस्थामा पुग्नुभएको हो भन्दै विभागीय मन्त्रीलाई प्रश्न गरेपछि मन्त्रीले आफुले प्रयास गरिरहेको त भनेका छन् तर, अझै पनि उनले बजेट कटौतीलाई समस्या ठह¥याइ रहेका छन् ।
प्रतियोगिताका लागि खेलकुद मन्त्रालय पन्छिन नखोजेको र अर्थ मन्त्रालयले खेलकुदका लागि छुट्याइएको बजेटमा २५ प्रतिशत काटिदिँदा समस्या उत्पन्न भएको उनको भनाई छ । प्रतिनिधिसभाको शिक्षा, स्वास्थ्य तथा सूचना प्रविधि समितिको बिहीवारको बैठकमा खेलकुदमन्त्री चौधरीले यस्तो बताएका हुन् ।
दशौं राष्ट्रिय खेलकुद आयोजनाबारे जानकारी गराउँदै राष्ट्रिय खेलकुद परिषद् (राखेप) सदस्यसचिव टंकलाल घिसिङले प्रतियोगिता आयोजनामा अवरोध पुगेका केही प्राविधिक पक्षमा काम भइरहेकाले खेलकुद सञ्चालनका निम्ती आवश्यक प्रक्रिया पनि अगाडि बढ्ने बताए ।
दशौं राष्ट्रिय खेलकुदका लागि अहिले के भइरहेको छ त ?
- अर्थ मन्त्रालयबाट खेलकुद आयोजनाका लागि यसअघि छुट्याइएको ६० करोड बजेटमा २५ प्रतिशत रोक्का भइरहेको अवस्थामा आयोजनाका बारेमा केही अल्योलता
- काटिएको बजेट फुक्का गरिदिनका लागि राखेपले गत चैत १७ गते नै खेलकुद मन्त्रालयमार्पmत पत्र पठायो
- अहिले अर्थ मन्त्रालयले काटिएको बजेट फुकुवा गर्ने बताइसकेको अवस्था
- बजेट सूचना प्रणाली(एलएमबीआईएस) मा इन्ट्री गर्नका लागि खेलकुद मन्त्रालयलाई अनुरोध गरिसकेको
- दशौं राष्ट्रिय खेलकुदका मस्कट र लोगो सार्वजनिक भइसकेको
- आयोजनास्थल कर्णाली प्रदेशमा पनि सचिवालय स्थापना गरि यसको आयोजनाको प्रक्रिया अगाडि बढाइएको
- सहभागी हुने विभागीय टोली र प्रदेश पनि छनोटको तयारीमा जुटिरहेको
- भौतिक पूर्वाधार निर्माण भइसकेपछि त्यसको भुक्तानी गर्ने बजेट नहुँदा केन्द्र सरकारसँग माग गरेको
- भुक्तानीका लागि आवश्यक प्रक्रिया पनि अगाडि बढाइसकेको
- यसपल्ट जेठमा निर्धारण गरिएको समयमा सम्पन्न गर्नेगरि राखेपले काम गरिरहेको
सार्वजनिक खरिद ऐन र नियमावलीअनुसार सबै प्रक्रियाका काम टुङ्ग्याउनका लागि ४० दिनको समयावधि पर्याप्त नहुँदा चैतमा तय गरिएको दशौं राष्ट्रिय खेलकुदको आयोजना गर्न नसकिने भएकाले जेठको ३ देखि १० गतेसम्म तोकिएको राखेप सदस्यसचिव घिसिङको भनाई छ ।
