काठमाडौं । पूर्वगृहमन्त्री समेत रहेका रास्वपा सभापति रवि लामिछाने पार्टी जिम्मेवारीमा फर्किएसँगै राजनीतिक गतिविधि बढाउन थालेका छन् । लामो समय पार्टी जिम्मेवारीबाहिर रहेका रवि चैत १८ गतेबाट पुनः जिम्मेवारीमा फर्किएका छन्  । प्रहरी हिरासतमा रहेका बेला रविले पुस ८ गतेबाटै उपसभापति डीपी अर्याललाई कार्यावाहकको जिम्मेवारी दिएका थिए । रविमाथि विभिन्न जिल्लामा सहकारी ठगी प्रकरण तथा सम्पति सुद्धिकरणको मुद्धा लागेको छ । 

यहीकारण उनलाई सांसद पदबाट समेत निलम्बन गरिएको थियो । रविविरुद्ध कास्की, रुपन्देही, चितवन तथा काठमाडौंमा मुद्धा छ । यी चारै जिल्लाबाट रविले २ करोड २५ लाख धरौटी बुझाएका छन् । साथै रविले आफूविरुद्धका उक्त आदेशहरु न्यायोचित नभएको भन्दै बदर गर्न पुनरावेदन दर्तासमेत गराइसकेका छन् । यसमाथि अदालतको फैसला के आउँला ? भन्ने आम चासो बढ्दो छ । 

जिम्मेवारीमा फर्केपछि रविले के भने ? 

रवि लामिछाने सभापतिको जिम्मेवारीमा फर्किएपछि सरकारसँग कड्किएका छन् । उनले पत्रकार सम्मेलन नै गरेर सरकार र सत्तामाथि आक्रोश पोखेका थिए । उनले आफूमाथि सरकारले प्रतिशोध साँधेको भन्दै तीव्र असन्तुष्टि पोखिरहेका छन् । 

देशमा राजावादीको गतिविधि तीव्र बढ्दा पनि मौन रहेका रविमाथि उनी नै राजावादी त होइनन् ? भन्ने आम शंका पैदा भएपनि उनले पछिल्लो समय लोकतन्त्रकै पक्षमा आफू रहेको जिकिर गरिरहेका छन् । तर वर्तमान सरकार, सत्ता र  त्यसको कार्याशैलीमाथि भने उनले पटक्कै चित्त बुझाएको देखिँदैन । उनी  सरकारसँग डटेरै जाने रणनीति बुनिरहेका देखिन्छन् । जुन उनको अभिव्यक्तिहरुले पनि संकेत गरिरहेको छ ।  

सांसद पद फुकुवा गर्न ताकेता 

रविको हिरासत बसाईँ, अदालतको सामाना र आदेशमाथिको पुनरावेदनपछि पार्टीमा फर्किए पनि उनको संसद पद निलम्बन फुकुवा भइसकेको  छैन । रविले सांसद पद फुकुवा गर्न भन्दै संसद सचिवालय र सभामुखलाई पत्र बुझाइसकेका छन् । यद्यपि रविको सवालमा संसद सचिवालयले कुनै निर्णय गरेको छैन । 

रविले पार्टी जिम्मेवारीमा फर्किए लगत्तै सांसद पद फुकुवाका लागि सभामुख देवराज घिमिरेसँग छलफल गरेका थिए । यद्यपि सभामुख भने अझै अनिर्णित छन् ।  रविको पद निलम्बन फुकुवा गर्नका लागि रास्वपाले यसअघि देखि नै पटक–पटक प्रयास गर्दै आएको थियो । पार्टी जिम्मेवारीमा फर्किएपछि रविले पुनः आफै सभामुख भेटेका हुन् । 

चितवनमा जनप्रदर्शन तयारी 

रविविरुद्धका विभिन्न मुद्धा किनारा लागेका छैनन् । तर रविले भने आफ्ना मतदाताहरुलाई सम्बोधन गर्न चितवनमा सभाको आयोजना गर्दैछन् । उनले पार्टी जिम्मेवारीमा फर्किए लगत्तै सार्वजनिक रुपमै चितवनमा सम्बोधन गर्ने खुलाएका थिए । रविले चितवनका जनतामाझ नै सरकारले आफूमाथि गरेको ज्यादतीको भण्डारफोर गर्ने सार्वजनिक प्रतिबद्धता जनाएका थिए । 

यही प्रतिबद्धता अनुसार रास्वपाले चैत २३ गते जनयात्रा सुभारम्भ कार्यक्रमको नाम दिएर भरतपुरमा सभा गर्दैछन् । सभामार्फत रविले आफ्नो शक्ति प्रर्दशन गर्ने भएका  हुन् । सहकारी ठगी प्रकरण तथा सम्पति सुद्धिकरणको मुद्धाले थलिएका रविले यही शक्तिमार्फत सरकारलाई जवाफ दिने तयारी गरिरहेका हुन् । 

रविमाथि विभिन्न जिल्ला अदालतमा मुद्धा रहँदा सवा दुई करोड धरौटीमा रिहा भएपनि उनले क्लिन चिट भने पाइसकेका छैनन् । यद्यपि उनी आफ्नो निर्वाचन क्षेत्रमा प्रदर्शन गरेर सरकारमाथि जनदवाव सृजना गर्ने रणनीति लिएका हुन् ।