काठमाडौं । एमाले अध्यक्ष केपी शर्मा ओली र नेकपा एकीकृत समाजवादीका अध्यक्ष माधव कुमार नेपाल विपरित ध्रुवका नेता भन्दा फरक पर्दैन । दुवैले कम्युनिष्ट पार्टीको नेतृत्व गरिरहेपनि उनीहरुबीच पानी बाराबारको स्थिति थियो । 

जब एमाले विभाजन गरेर माधव नेपालले नेकपा एकीकृत समाजवादी पार्टी स्थापना गरे । त्यसपछि देखि ओली र माधवबीच पानी बाराबारको स्थिति बन्यो । यहाँसम्मकी प्रधानमन्त्री ओलीले माधवमाथि उनको नाम लिएपछि मुख नै कुल्ला गर्ने सम्मको टिप्पणी गर्दथे । तर अहिले मुलुकमा राजनीतिले केही फरक मोड लिएको छ । 

गणतन्त्र र राजतन्त्रको पक्ष विपक्षमा भिन्न भिन्न मत आइरहेका छन् । जसले ओली र माधवलाई समेत नजिक बनाएको टिप्पणी हुन थालेका छन् । सोमबार प्रधानमन्त्री ओलीले प्रतिनिधिसभा र राष्ट्रियसभालाई सम्बोधन गरेलगत्तै नेकपा एस पार्टी कार्यालय मै पुगे । र, ओलीलाई अध्यक्ष माधव नेपालले नै स्वागत गरेका थिए । 

खासमा ओली नेकपा एस सम्बद्ध पत्रकारको निधनप्रति श्रद्धाञ्जली दिन आलोकनगर पुगेका थिए । तर ओलीले पार्टी कार्यालयमा राजावादीले गरेको तोडफोडको समेत अवलोकन गरेका थिए । 

यसपछि एमाले र नेकपा एसको निकटता बढेको भन्दै कार्यकर्तामा उत्साह पैदा भइरहेको छ । नेकपा एसका सांसद एवं पूर्वमन्त्री प्रकाश ज्वालाले त सामाजिक संजाल फेसबुकमा उत्साहित हुँदै ‘आइस ब्रेक’ भनेर लेखेका छन् । उनको भनाइमा ओली र माधवबीच पुनः संवाद सुरु भएको रुपमा अथ्र्याइएको छ । 

हुन पनि ओली र माधवबीच झण्डै ३ वर्षसम्म प्रत्यक्ष संवाद हुन सकेको थिएन । तर ओली अहिले पार्टी कार्यालय भित्रै प्रवेश गरेर माधव नेपालसहित झलनाथ खनालसँगसमेत कुराकानी गर्नुले उनीहरुबीच औपचारिक छलफल र एकताको ढोका त खोलेको होइन ? भन्ने आम प्रश्न उठ्नु स्वभाविक हो । 

एमाले र माओवादी पनि एकै लयमा !

चैत १५ गते प्रदर्शनीमार्गमा समाजवादी मोर्चाले गणतन्त्रको पक्षमा वृहत प्रदर्शनको आयोजना गरेको थियो । यस्तैमा राजावादीहरुले पनि तीनकुनेमा प्रदर्शन गर्दा अराजकता मच्चियो । कार्यक्रमस्थलबाटै माओवादी अध्यक्ष प्रचण्डले राजावादीको आन्दोलन र उनीहरुको चरित्रमाथि आलोचना गरेका थिए । जुन आन्दोलनलाई उनले कार्यक्रमबाटै अराजकताको पराकाष्ठा भनेका थिए । 

यस्तै एमालेले पनि राजावादीको उक्त आन्दोलनलाई अराजक र उदण्ड भनेको छ  । सदन देखि नै प्रधानमन्त्रीले उक्त आन्दोलनको चर्को आलोचना गरे भने एमालेकै अन्य सांसदहरुले पनि राजावादीको आन्दोलनको प्रकृतिमाथि खुलेरै विरोध गरेको देखिन्छ । संसदबाटै एमाले सांसद योगश भट्टराईले राजतन्त्र र पूर्वराजा ज्ञानेन्द्रको घोर विरोध गरेका थिए । 

यतिमा मात्रै नरोकिएका योगेशले पूर्वराजाहरुले नेपालका मूर्तीहरु चोरेर अमेरिका तथा युरोप पुर्याएको समेत गम्भीर आरोप लगाएका छन् । उनले नेपालका बहुमुल्य मूर्तीहरु राजापूर्वराजाहरुले नै विदेशमा बेचेको गम्भीर आरोप लगाएका हुन् ।

उनले संसदमै प्रश्न गर्दै भनेका छन् – नेपालका बहुमुल्य मूर्तीहरु अमेरिका, जर्मन र बेलायतका म्यूजियममा कसरी पुगे ?

एमाले सांसद योगशे भट्टराईले यसरी राजापूर्वराजामाथि यस्ता गम्भीर आरोप लगाइरहँदा माओवादी अध्यक्ष प्रचण्डले पनि ज्ञानेन्द्र शाहमाथि मूर्ती चोरको आरोप लगाउँदै आएका छन् । प्रचण्डले ज्ञानेन्द्र शाहलाई पटक पटक मूर्तीचोरको रुपमा उभ्याउँदै आएका छन् । यहीबीच एमाले सांसद योगशे भट्टराईले पनि यही आरोप दोहोर्याएका हुन् । 

त्यस्तै प्रधानमन्त्री केपी शर्मा ओलीले पनि राजावादीको चरित्रमाथि गम्भीर प्रश्न गर्दा समाजवादी मोर्चाले गरेको सभाको भने प्रशंसा गरेको देखिन्छ । यस्तै राजावादीहरुको आन्दोलन लगत्तै नेकपा एसका कार्यालयमा ओली पुग्नुलाई पनि माधव र ओलीको सामिप्यता बढेको रुपमा व्याख्या गर्न थालिएको हो ।