महोत्तरी । महोत्तरीको शहरी तथा ग्रामीण क्षेत्रमा छाडा कुकुरको टोकाइका घटना बढेपछि स्थानीय पालिकाहरुले कुकुरहरुको स्थायी बन्ध्याकरण गर्न थालेका छन् । योसँगै स्थानीय पालिकाहरुले रेबिज रोगविरुद्धको खोप लगाइ छाडा कुकुरको व्यवस्थापन समेत गरिरहेका छन् । 

बिहान र साँभको समयमा आवतजावत गर्ने यात्री तथा विद्यालय जाने बालबालिकाहरुलाई कुकुरले टोक्ने लखेट्ने जस्ता घटना बढेको र रेबिजकै समेत जोखिम रहेपछि जेजिआई संस्थाको प्राविधिक सहयोगमा महोत्तरीका केही  स्थानिय पालिकाहरुले कुकुर व्यवस्थापन सुरु गरेका छन् । 

पालिकाहरुमा अहिले स्थायी बन्ध्याकरण गरेर कुकुरको संख्यामा नियन्त्रण गर्ने र रेविज रोगविरुद्धको भ्याक्सिन लगाउने काम भइरहेको छ ।महोत्तरीमा चैत पाँच गतेदेखि सञ्चालनमा आएको यो अभियानमार्फत हालसम्म बर्दिबास नगरपालिकामा २ सय, औरही नगरपालिकामा दुई सय ७० र जलेश्वर नगरपालिकामा १ सय ६७ छाडा कुकुरहरुमा स्थायी बन्धयाकरण तथा रेबिज विरुद्धको खोप लगाईएको छ । यो अभियान महोत्तरीमा तीनवर्षदेखि जारी छ । 

यता जलेश्वर नगरपालिका वडा नं २ का वडाध्यक्ष बरुण कुमार दाहालले शिविर आयोजनाले छाडा कुकुरहरुको संख्या नियनत्रणका साथै छाडा कुकुरहरबाट हुने विभिन्न जोखिम समेत घट्ने बताए । 

समुदायमा रहेका छाडा कुकुरहरुबाट मानवीय जोखिमको खतरा न्युनिकरण गर्न स्थायी बन्ध्याकरण र रेबिज रोग विरुद्धको खोप लगाएसँगै छाडा कुकुरहरुमा देखिएका अन्य किसिमका चोटपटक, घाऊ तथा रोगहरुको समेत उपचार अभियानमा प्राविधकि सहयोग गर्दै आएको पशु चिकित्सक डा बिकास श्रेष्ठ बताउँछन् । 

कुकुरले वर्षमा दुई पटक गर्भधारण गर्ने र एकपटकमा आठ वटासम्म बच्चा जन्माउने गर्छ । तर शिविरमार्फत गरिएकोे बन्ध्याकरणले कुकुरको संख्यामा नियन्त्रण राख्न सहज पुगेको र उपचार पाएका कुकुरहरुको व्यवहार समेतमा परिवर्तन देखिने गरेको छ ।