काठमाडौं । चैत्र १५ गतेको घटनामा सरकारको कमजोरी छरपष्ट भएको भन्दै प्रश्नहरु उठिरहेका छन् । यता, तीनकुनेमा हिंसा भड्काएर भागेका दुर्गा प्रसाई प्रहरीको नियन्त्रणमा आउन सकेका छैनन् । अहिले यसै घटनाका विषयमा जवाफदेहीता खोज्न थालिएको छ । 

पूर्वराजा ज्ञानेन्द्र शाहले गएको फागुन ७ गतेका लागि संप्रेषण गरेको सन्देशकै जगमा चैत्र १५ गते मच्चिएको तीनकुने घटनाले अहिले पनि तरंग राखेकै छ । पूर्वराजाले फागुन ७ मा दिएको सन्देशले राजावादी शक्ति, समूह र पार्टीहरु हौसिन पुगे । त्यहि अभिव्यक्तिलाई केन्द्रमा राख्दै ज्ञानेन्द्र शाहको दरबार फिर्तिको नारा चर्किन थाल्यो । 

यसको एक अंश बन्यो, चैत्र १५ गते तीनकुनेमा प्रदर्शन । तीनकुनेमा के के भयो ती विषयहरु सार्वजनिक हुनेक्रम जारी छ । तर, तीनकुने प्रकरणमा राष्ट्रिय प्रजातन्त्र पार्टी भने जिम्मेवार बन्न नसक्ने भन्न थालेको छ । यसको झल्को राप्रपा सांसद बुद्धिमान तामाङले दिए । संसदीय समितिमा सांसद तामाङले स्टेजमा दुर्गा प्रसाईको फोटोदेखेपछि गलत भयो भन्दै आफू बाहिरिएको दाबी गरिदिएका छन् । 

तामाङले तीनकुने प्रकरणमा छानविन आयोगको माग समेत गरेका छन् । कानूनतः दोषी देखिनेलाई कारबाहीको माग पनि गरेका छन् । यता, अन्य दलका सांसदहरुले पनि चैत्र १५ गतेको घटनामा अनेक प्रश्नहरु गरेका छन् । उनीहरुले गृहमन्त्रीलाई बोलाएर तीनकुने प्रकरणमा प्रश्न गर्न पाउनुपर्ने भनिरहेका छन् । 

सरकारले तीनकुने प्रकरणमा सुरक्षा संवेदनशीलता अपनाउन नसकेकोदेखि दुर्गा प्रसाईले अराजकता फैलाएको निष्कर्ष समितिले निकालेको छ । यहि निष्कर्ष निकाल्नेमा राप्रपा अग्रपंक्तिमा देखिन्छ । तर, कांग्रेस महामन्त्री विश्वप्रकाश शर्मा भने पूर्वराजा ज्ञानेन्द्र शाहमा मानवीय समवेदना समेत नभएको भन्दै क्रोधित देखिन्छन् । 

सांसदहरुले यसरी विभिन्न प्रश्न उठाएपनि यसको निराकरण कहिले होला ? तीनकुने प्रकरणको छानविन र दोषीमाथि कारबाही होला ? प्रश्नहरु अनुत्तरित नै देखिन्छन् । यस्तोमा संसदको राज्य व्यवस्था तथा सुशासन समितिले गृहमन्त्री रमेश लेखकलाई चैत्र २२ गते बोलाएर यसबारे जानकारी लिने भएको .छ ।

गृहमन्त्रीले यसबारेको जवाफ कसरी दिन्छन भन्ने विषय चासोमा रहेको बेला राष्ट्रपति रामचन्द्र पौडेलले पनि तिनकुनेमा हिंसा फैलाएको भन्दै असन्तुष्टी पोखेका छन् । यस्ता हिंसालाई राज्यले नियन्त्रण गर्नुपर्ने र गणतन्त्रको रक्षाका लागि उभिनुपर्ने अपिल गरेका   छन् । 

तीनकुने प्रकरणले दुई जनाको ज्यान जानुका साथै धेरै घाइते भएका छन् । निहत्था नागरिकमाथि गोली बर्साएको आरोप लागिरहेको छ भने आन्दोलन प्रदर्शनसँग असम्बन्धितमाथि समेत ज्यादति भएको स्थिति छ । तोडफोडदेखि लुटपाटका विषय त कति–कति । 

यस्तो स्थितिलाई सरकारले कसरी व्यवस्थापन गर्छ भन्ने विषय भने चासोमा छ। यता, दुर्गा प्रसाईले मच्चाएको अराजकता र त्यसपछिको स्थितिबारे समेत विश्लेषण शुरु भएको छ ।