काठमाडौं । टोखाबाट ट्रकमा बरामद भएको २५ करोड विदेशी मुद्राका मालिक नेपालकै विवादित व्यापारी भएको खुलेको छ । सिन्धुपाल्चोकको भोटेकोसी गाउँपालिका ४ घर भई टोखा नगरपालिका १० महादेवटार हाइटमा बस्ने नारायण पौडेलले चीन पठाउन लागेको खुलासा भएको राजस्व अनुसन्धान विभागले जनाएको छ । को हुन् त २५ करोडका मालिक पौडेल ?
टोखाबाट ट्रकमा बरामद भएको २५ करोड विदेशी मुद्राको मालिक को हुन् भन्ने खुलासा भएको छ । २५ करोड विदेशी रकमका मालिक नेपालकै विवादित व्यक्ति सिन्धुपाल्चोकको भोटेकोसी गाउँपालिका ४ घर भइ टोखामा बस्ने नारायण पौडेल भएको खुलासा भएको हो । राजस्व अनुसन्धान विभागका महानिर्देशक चण्डिप्रसाद घिमिरेका अनुसार पौडेलले नै ट्रक चालकलाई रकम चीन लैजान भन्दै दिएका थिए ।
को हुन् नारायण पौडेल ?
- नारायण पौडेलको स्थायी ठेगाना सिन्धुपाल्चोकको भोटेकोसी गाउँपालिका
- पौडेल यसअघि पनि पटक–पटक पक्राउ परेका व्यक्ति
- २०८० असारमा जुवाखालबाट पक्राउ परेका
- २१ वर्ष पहिले पनि राजस्व अनुसन्धान विभागले पक्राउ गरेको
- रक्तचन्दनको तस्करीमा समेत मुछिएका व्यक्ति
- चीनबाट कपडाको व्यापार गर्दै आएका पौडेल पछिल्लो समय सुन तस्करीमा लागेको निष्कर्ष
- उनलाई पक्राउ गर्न अदालतले अनुमति समेत दिइसकेको
- राजस्व अनुसन्धान विभागले टोखास्थित निवासमा छापा मारेर केही कागजातहरु समेत नियन्त्रणमा लिइसकेको
- पौडेल भने ट्रक चालक पक्राउ परेलगतै फरार
कहिले–कसरी सतहमा आयो २५ करोड घटना प्रकरण
- काठमाडौँ उपत्यका अपराध अनुसन्धान कार्यालयले चैत ४ गते राति ट्रकमा युरो र अमेरिकी डलर गरि नेपाली रूपैयाँ २५ करोड १९ लाख २४ हजार ९५० रूपैयाँ बराबर बरामद गरेको थियो ।
- त्यो रकमसहित भेटिएको ट्रकका चालक सिन्धुपाल्चोकको भोटेकोसी गाउँपालिका १ घर भई हाल काठमाडौँको गोकर्णेश्वर नगरपालिका २ बस्ने फुच्चे भन्ने ४३ वर्षका कुसाङ लामा त्यतिबेलै पक्राउ परेका थिए ।
- उनलाई अहिले पनि हिरासतमा राखेर प्रहरीले अनुसन्धान गरिरहेको छ ।
- टोखा नगरपालिका २ झोरमा ना ७ ख १६५२ नम्बरको मालबाहक ट्रकको बोनटमाथि फल्सबटम बनाएर लुकाएको अवस्थामा अमेरिकी डलर र युरो बरामद गरेको थियो ।
- ट्रकमा उक्त रकम लिएर कपडा किन्न चीन जान लागेको कुसाङले बताएका थिए । प्रहरीले भने यो रकम सुन तस्करीको भएको सुरुमै अनुमान गरेको थियो ।
- ट्रकमा १०० दरका अमेरिकी डलर ३ हजार ११९ थान, ५० दरका १७९ थान र ५०० दरका युरो ११ थान, २०० दरका ४८० थान, १०० दरका ४ हजार १४८ थान र ५० दरका १७ हजार १७७ थान बरामद गरेको थियो ।
- यसको नेपालीमा विनियम गर्दा करिब रु. २५ करोड १९ लाख २४ हजार ९५० रूपैयाँ हुन आउँछ ।
