काठमाडौं । काठमाडौं महानगरका मेयर बालेन शाह छुच्चो र तानाशाह प्रवृत्तिमा चित्रित हुन थालेका छन् । पछिल्ला दिनहरुमा उनिमाथि चारित्रिक हिसाबले समेत विविध कोणबाट प्रश्न उठिरहेका छन् । 

महानगर नेतृत्वमा स्वतन्त्रबाट निर्वाचन भएपछि एकाएक चर्चामा आएका बालेनको पक्षमा उभिनेहरुको पनि कमी छैन । तर धेरैजसो राजनीतिक नेताहरुबाट भने बालेनमाथि ‘स्टण्ट’बाजको आरोप लाग्ने गरेका छन् । महानगरमा फरक र मौलिक कार्यसम्पादनको सामान्य झल्को दिएपनि बालेनमाथि पछिल्लो समय अपेक्षाकृत नतिजा हासिल गर्न नसकेको टिप्पणी हुँदै आएका छन् । र, उनको अभिव्यक्ति एवं कार्यशैलीमाथि पनि प्रश्न बढेका छन् । तर बालेनले भने आफ्नो डेग छाडेको देखिँदैन । 

जो भेट्यो उसैसँग भिड्ने !

मेयर बालेन शाह पर्दाखेरी कोहीसँग नझुक्ने स्वभावमा प्रस्तुत भइरहेका छन् । काठमाडौंका सुकुम्बासी बस्ती हटाउन केन्द्र सरकारसँगै सिंगौरी खेलेका उनी न्यूरोडको फुटपाथ बढाउने प्रकरणमा पनि सरकारसँग भिडे । धरहरा पार्किङ निःशुल्क गर्ने, अव्यवस्थित सडक व्यवस्थित बनाउने र नक्सा पास नगरी भवन निर्माण भएका संरचना हटाउने विषयमा पनि बालेन भिडिरहेका छन् । यतिमा मात्रै सिमित नरहेका बालेन दलहरुसँग पनि भिड्दै आएका छन् । बेला–बखत बालेनको प्रधानमन्त्री ओलीसँग समेत सवाल जवाफ चल्दै आएको छ । ओली र बालेनबीच गिरीबन्धु टि स्टेट जग्गा प्रकरणमा लामै जुहारी चल्यो । 

पूर्वराजासम्मलाई जरिवाना !

गत मंसिर ७ गते काठमाडौंमा एमालेले गरेको सभामा फोहोर गरेको भन्दै बालेनले नेकपा एमालेका नाममा एक लाख जरिवाना तोकोको थियो । उक्त बिल महानगरले एमाले केन्द्रीय कार्यालयलाई पठायो । यद्यपि एमालेले उपत्यका कमिटी आयोजक रहेको भन्दै उसैलाई पठाउन भनेर फर्काइदियो । त्यस्तै फागुन २५ गते काठमाडौंमा पूर्वराजाको स्वागतमा गरिएको प्रदर्शनमा फोहोर गरेको भन्दै राप्रपालाई एक लाख जरिवाना तोकेको थियो । 

सुरुमा जरिवना नतिर्ने अडान राखेको राप्रपाले अन्तिममा गएर जरिवाना शुल्क तिर्न बाध्य भयो । त्यस्तै चैत १५ गते काठमाडौंमा आयोजित राजावादीहरुको वृहत प्रदर्शनमा तोडफोड गरेको भन्दै महानगरले ७ लाख ९३ हजारको जरिवाना पत्र काटेको छ । महानगरले यो जरिवाना पूर्वराजा ज्ञानेन्द्रका नाममा काटेको थियो । तर उक्त जरिवाना पत्र लिन पूर्वराजाले स्वीकार गरेनन् । 

आईतबार जरिवाना पत्र बोकेर निर्मल निवास पुगेको महानगरको टोली त्यसै फर्कियो । त्यसपछि उक्त पत्र पूर्वराजालाई हुलाकमार्फत पठाइएको छ । यस्तोमा राजावादी पक्षधरहरुले भने पूर्वराजाको बचाउ गरिरहेका छन् । राप्रपाले पूर्वराजालाई बालेनले पठाएको जरिवाना पत्र अस्वभाविक भएको भन्दै आलोचना गरिरहेको छ ।

बालेनले राजावादीको आन्दोलनपछि उक्त प्रदर्शनको गतिविधिमा आलोचना गर्दै हाम्रा नानीहरुले के सिक्नुहुन्छ बा हरु ? भन्दै प्रश्नसमेत गरेका छन् । यसरी दलहरदेखि पूर्वराजासमेतसँग बालेनको टसल चल्दा उता सरकार र बालेनबीच पनि प्रमुख प्रशाशकीय अधिकृत नपठाएको विषयमा पनि संघर्ष चलिरहेको छ । 

महानगरको प्रमुख प्रशासकीय अधिकृत नहुँदा कर्मचारी र शिक्षकहले पारिश्रमिक पाउन सकिरहेका छैनन् । तर सरकारले अझै प्रमुख प्रशासकीय अधिकृत पठाएको छैन । 

यसै सन्दर्भमा मेयर शाहले सरकारको दम्भका कारण कर्मचारीले तीन महिनादेखि तलब नाएको भन्दै आलोचना गरिरहेका छन् । बालेनले यही विषयमा एक हप्ताभित्रमा पनि कर्मचारीले तलब नपाए सबैलाई टुकुचामा गाडिदिन्छु भन्दै स्टाटस लेखेका थिए । स्टाटसमा गाडिदिन्छु भन्ने असभ्व भाषा प्रयोग गरेको भन्दै यतिबेला बालेनको सर्वत्र आलोचना भइहरेका छन् । जसले बालेनलाई छुच्चा र अमर्यादित चरित्रका रुपमा उतारेको हो ।