काठमाडौं । हिउँदे अधिवेशन चैत्र १८ गते मंगलबार राति १२ बजेदेखि अन्त्य भएको छ । हिउँदे अधिवेशन अन्त्यसँगै कानून निर्माणको कामदेखि सरकारप्रतिको आम धारणा कस्तो बन्यो ? के सरकारले नयाँ बजेटको तयारीसँगै कानून निर्मणमा पर्याप्त काम गर्न सक्यो ? हिउँदे अधिवेशन उपलब्धिमुलक बन्यो ? यस्ता प्रश्नको जवाफमा सांसदहरु विभाजित देखिएका छन् । 

ढिला गरेर बोलाइएको हिउँदे अधिवेशन सरकारको सिफारिसमा राष्ट्रपति रामचन्द्र पौडेलले मंगलबार राति १२ बजेदेखि अन्त्य गरेका छन् । संसदको हिउँदे अधिवेशनसँगै कानून निर्माणको काममा उल्लेख्य प्रगति हुन सक्यो ? सांसदहरुले कानून निर्माणदेखि सरकारले संसदलाई बिजनेस दिने काममा प्रयास ग¥यो ? यस्ता विभिन्न प्रश्नहरु देखिएका छन् । तर, अहिलेको सरकारबाट सत्तारुढ दल नेपाली कांग्रेसका सांसदहरु भने खुशी देखिएनन् । उनीहरुले सरकारले गति बढाउन नसकेको आरोप खुलेरै लगाए । 

विधयेक अधिवेशनको रुपमा चिनिने हिउँदे अधिवेशनको सदुपयोग भयो ? यो प्रश्नमा कांग्रेस चित्त बुझाउने स्थितिमा देखिन्न भने एमालेले काम धेरै राम्रो भएको दाबी गरिरहेको छ ।

प्रतिपक्षी दलहरु भने सरकार नियन्त्रणमुखी ढंगले अघि बढेको आरोप लगाएको छ । अभ्यासका हिसाबले चुनौतिपूर्ण र नियन्त्रणमुखी भन्दै रास्वपाले भने आक्रोश पोखेको छ । 

हिउँदे अधिवेशन कानून निर्माणको हिसाबदेखि सरकारले संसदलाई बिजनेस दिने सवालमा विविधता देखिएपनि सरकारलाई हम्मेहम्मे पार्ने र प्रतिपक्षीले प्रधानमन्त्रीलाई संसदमा तान्ने काममा भने सक्रियता देखायो । गणतन्त्रविरुद्धका आवाजदेखि राजतन्त्रको पक्षमा चर्को नारा लाग्यो भने राजावादी गतिविधि नियन्त्रण गर्ने सरकारले चेतावनी नै दियो । यसरी हेर्दा हिउँदे अधिवेशन प्रणालीमाथिको बहसदेखि संविधान संशोधनको एजेण्डामा तितरवितर बन्न  पुग्यो । सरकारले अध्यादेशदेखि अन्य विजनेस दिने कुरामा समेत लामो गलफत्ति भने चलिनै रह्यो ।