काठमाडौं । प्रधानमन्त्री केपी शर्मा ओली थाइल्याण्डको औपचारिक भ्रमण र बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को छैटौं शिखर सम्मेलनमा भाग लिन मंगलबार बैंककतर्फ प्रस्थान गरेका छन् । इतिहासमै पहिलो पटक नेपालबाट थाइल्याण्डको औपचारीक भ्रमण गर्ने पहिलो प्रधानमन्त्रीका रुपमा रहेका ओलीले थाइल्याण्डमा कस्ता कस्ता कार्यक्रम तय भएका छन् ? 

इतिहासमै पहिलोपटक नेपालबाट थाइल्याण्डको औपचारीक भ्रमण गर्ने प्रधानमन्त्रीका रुपमा रहेका केपी शर्मा ओली २३ गते मात्रै नेपाल फर्किने छन् । 

थाइल्याण्डका प्रधानमन्त्री पेटोङ्टार्न शिनावात्राको मैत्रीपूर्ण निमन्त्रणा र बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को छैटौं शिखर सम्मेलनमा भाग लिन प्रधानमन्त्री ओली थाई एयरलाइन्सको विमानबाट मंगलबार बैंककतर्फ प्रस्थान गरेका हुन् । 

बैंककमा पुगेर प्रधानमन्त्री ओलीले २० गते र २१ गते प्रधानमन्त्रीस्तरमा द्विपक्षीय वार्ता गर्ने, संस्कृतिका सन्दर्भमा दुई र गैरसरकारी क्षेत्रबीच ६ वटा समझदारीपत्रमा हस्ताक्षर गर्ने कार्यक्रम रहेको परराष्ट्र मन्त्रालयले जनाएको छ । द्विपक्षीय वार्तापछि थाल्याण्डका प्रधानमन्त्रीसंगै ओलीले संयुक्त प्रेस ब्रिफिङमा भाग लिनेछन् । 

त्यसपछि उनले थाइल्याण्डका नरेशसँग पनि भेट्ने छन् । प्रधानमन्त्री ओलीको यो संगै १ दिने औपचारीक कार्यक्रम सकिने छ । २१ गते बिहान उनले थाइल्याण्डका प्रतिष्ठित व्यवसायीहरूसँग भेटघाट र छलफल गर्नेछन् भने सोही दिन दिउँसो एशियन इन्स्टिच्युट अफ टेक्नोलोजीमा आयोजित कार्यक्रमलाई सम्बोधन गर्नेछन् । साँझ बिमस्टेक शिखर सम्मेलनका नेताहरूलाई दिइने औपचारिक रात्रिभोजमा प्रधानमन्त्री ओली सहभागी हुने र २२ गते बिमस्टक शिखर सम्मेलनमा सहभागी भई सम्बोधन गर्नेछन् । 

शिखर सम्मेलन लगत्तै प्रधानमन्त्री ओलीले सम्मेलनमा भाग लिन आएका अन्य मुलुकका नेता तथा समकक्षीहरुसँग साइडलाइन वार्ता गर्ने गरी कार्यक्रम तय गरीएको छ । साइडलाइन वार्ता गर्ने भनिएतापनि कुनकुन मुलुकका प्रतिनिधिसँग वार्ता गर्ने भन्ने औपचारीक रुपमा तय भइसकेको छैन । 

साइडलाईन वार्ता लगत्तै सोही दिन मेरिटाइम ट्रान्सपोर्ट कोअपरेसन एग्रिमेन्टमा हुने हस्ताक्षर समारोहमा प्रधानमन्त्री ओली सहभागी हुनेछन् र सोही दिन साँझ बैंककस्थित नेपाली दूतावासमा हुने कार्यक्रममा सहभागी हुनेछन् । 
भ्रमण टोलीमा कोको छन् ?
 
प्रधानमन्त्री ओलीको औपचारीक भ्रमण टोली २१ जनाको छ । जसमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राई, प्रधानमन्त्रीका प्रमुख स्वकीय सचिव राजेश बज्राचार्य, प्रधानमन्त्रीका निजी चिकित्सक डा. दिव्यासिंह शाहसहित सञ्चारकर्मी र सुरक्षाकर्मी रहेका छन् । 

यो बाहेक सरकारलाई दायित्व नपर्नेगरी निजी क्षेत्रका केही प्रतिनिधिहरु पनि थाल्याण्डमा पुगेका छन् । प्रधानमन्त्रीको भ्रमण सफल बनाउन परराष्ट्र मन्त्रालयका दुई अधिकारी केही दिन अगाडि नै बैंकक पुगिसकेका छन् । 
कस्तो थियो प्रधानमन्त्रीको भ्रमण अगाडिका पूर्व तयारी ? 

विगतमा यस्ता सभा सम्मलेनमा जाँदा नेपालले तयारी पुरा नगरी जाँदा नेपालको अन्तराष्ट्रिय कुटनीतिको क्षेत्रमा कमजोर उपस्थिती भै रहेको भन्दै आलोचना हुने गरेको थियो । यसपटक पनि प्रधानमन्त्री भ्रमणबारे खासै चर्चा चलेन । तर यसपटकको बिमस्टेकको शिखर सम्मेलनका लागि नेपालले दुई महिना अगाडिबाट नै तयारी गरीरहेको परराष्ट्र मन्त्रालयका अधिकारीहरु बताउँछन् । 

ओलीले भ्रमणको पूर्वतयारी र परामर्शका क्रममा गत आइतबार पूर्वप्रधानमन्त्री र पूर्वपरराष्ट्रमन्त्रीहरूसँग पनि छलफल र परामर्श गरेका थिए । उक्त छलफलमा नेपालको आर्थिक विकास, कनेक्टिभिटी, ऊर्जा, पर्यटन र सांस्कृतिक आदानप्रदानलगायत क्षेत्रमा भ्रमणलाई मुलुकको अधिकतम हितमा उपयोग गर्ने गरी आवाज उठाउन र सार्कको शिखर सम्मेलनको लागि पनि साइडलाई बार्तामा कुराकानी गर्न विज्ञहरुले  सुझाव दिएका थिए ।