काठमाडौं । मुलुकमा संघीय लोकतान्त्रिक गणतन्त्रसँगै धर्मनिरपक्ष मुलुक घोषणा गरिएको झण्डै एक दशक भइसकेको छ । नेपालको संविधानले नै नेपाललाई धर्मनिरपक्ष मुलुक भनेको छ । तर संसदको सवै भन्दा ठूलो दल नेपाली कांग्रेसभित्र भने हिन्दु राष्ट्रको माग जबर्जस्त रुपमा उठ्ने गरेको छ । अहिले राजावादीहरुको जुर्मुराइरहेकोबेला कांग्रेस नेताहरुले हिन्दु राष्ट्रका पक्षमा अभिब्यक्ति दिन थालेका छन् ।
नेपाली कांग्रेसमा एउटा समूह पार्टीभित्रै हिन्दु राष्ट्रका पक्षमा वकालत गर्दै आएको छ । गत वर्ष फागुनमा ललितपुरको गोदावरीमा भएको महासमिति बैठकमा हिन्दु राष्ट्र स्थापनासम्बन्धी प्रस्ताव नै पेश भएको थियो । त्यो समूहले ‘सनातन हिन्दु राष्ट्र नेपाल स्थापना महाअभियान’ नै सञ्चालन गर्दै आएको छ ।
उक्त महासमिति बैठकमा एक हजार बढी महासमिति सदस्यले हिन्दु राष्ट्रका पक्षमा हस्ताक्षर नै गरेका थिए । कांग्रेसमा हिन्दु राष्ट्र स्थापनाका लागि दबाबमुलक अभियानको नेतृत्व पार्टी केन्द्रीय सदस्य शंकर भण्डारीले गर्दै आएका छन् । सतहमा भण्डारीले हिन्दु राष्ट्रका पक्षमा अभियान चलाए पनि यो अभियानमा नजोडिएका नेताहरुले नै बेलाबखत हिन्दु राष्ट्रका पक्षमा अभिब्यक्ति दिने गरेका छन् ।
धर्मनिरपेक्षताको विरोध गर्दै सनातन हिन्दु राष्ट्रका पक्षमा भण्डारी समूहले २०७१ सालदेखि नै अभियान सञ्चालन गर्दै आएका हुन् । पार्टी नीति विपरित यस्तो अभियान सञ्चालन गरे पनि पार्टीले न त यसलाई निषेध गर्न नै सकेको छ, न त हिन्दु राष्ट्रका पक्षमा जाने निर्णय नै गरेको छ ।
नेपालको संविधान २०७२ को धारा ४ मा ‘नेपाल स्वतन्त्र, अविभाज्य, सार्वभौमसत्ता सम्पन्न, धर्मनिरपेक्ष, समावेशी, लोकतन्त्रात्मक, समाजवाद उन्मुख, संघीय लोकतान्त्रिक गणतन्त्रात्मक राज्य हो’ भनी उल्लेख गरिएको छ । यद्यपि ‘धर्मनिरपेक्ष’ भन्नाले सनातनदेखि चलिआएको धर्मसंस्कृतिको संरक्षण लगायत धार्मिक, सांस्कृतिक स्वतन्त्रता भन्ने सम्झिनुपर्छ भनी सोही धारामा स्पष्ट गरिएको छ ।
पछिल्लो समय राजावादी समूहहरु राजसंस्था पुर्नस्थापना गर्ने भन्दै शक्ति निर्माणमा लागेका छन् । पूर्वराजा ज्ञानेन्द्र शाह नै अघि सरेर ब्यवस्थाको खिलापमा अभिब्यक्ति दिएपछि राजावादीहरु हौसिएका हुन् । राजावादीहरुले राजसंस्था पुर्नस्थापना र हिन्दु राष्ट्र निर्माण गर्नुपर्ने माग अघि सारिरहेका छन् । यहिबेला राजावादीहरुको मनोबल बढाउने गरी कांग्रेस नेताहरुले हिन्दु राष्ट्रका पक्ष अभिब्यक्ति दिएका छन् ।
पूर्वराजा ज्ञानेन्द्र शाहकै योजनामा राजावादी शक्तिहरुले सडक र सदनबाट एक साथ संघीय लोकतान्त्रिक गणतन्त्रमाथि नै धावा बोलिरहँदा सरकारको नेतृत्व गरिरहेको नेकपा एमाले तथा माओवादी केन्द्रसहित विपक्षी दलहरुले काउन्टर प्रदर्शन गरिरहेका छन् । कांग्रेसले भने अहिले नै आफूहरु सडकमा आउनुपर्ने अवस्था नभएको जनाएको छ । यद्यपि गणतन्त्रको विकल्प सोंच्न नसकिने कांग्रेस नेताहरुको तर्क छ ।
राजावादीहरुले जतिसुकै आन्दोलन चर्काए पनि गणतन्त्रको स्थायित्वमा जोड दिइरहेको कांग्रेस हिन्दु राष्ट्रमा भने लचिलो देखिएको छ । यतिबेला राजावादीहरुले राजसंस्था पुर्नस्थापना र हिन्दु राष्ट्रका पक्षमा दबाब सिर्जना गरिरहेका बेला भारतीय हिन्दुवादीहरुले पनि साथ दिने देखिन्छ ।
यहिबेला कांग्रेसले पनि हिन्दु राष्ट्रका पक्षमा जनमत सिर्जना गर्दै आफ्नो राजनीतिक दुनो सोझ्याउनेतिर लागेका त होइनन् भन्ने आशंका उब्जिएको छ ।
