काठमाडौं । काठमाडौंको तीनकुनेमा शुक्रबार भएको हिंसात्मक आन्दोलनले पारेको प्रभावले गम्भिर रुप लिइरहेको छ । शुक्रबार पूर्वराजा ज्ञानेन्द्र शाहको पक्षमा भएको प्रदर्शनले उग्र रूप लिएपछि दुईजनाको ज्यान नै गयो । 

व्यक्तिका घर–घरमा आगो लगाउनेदेखि तोडफोडमा उत्रेको भीडले अहिले पूर्वराजा फसादमा परेका छन् । राजावादी भीडले पत्रकारलाई नै जलाएर मारेपछि सामाजिक सञ्जालमा ‘ज्ञानेन्द्रलाई पक्राउ गर’ भन्ने माग व्यापक रूपमा उठ्न थालेको छ । 

अर्कोतर्फ, विरोधका स्वरहरू झन् चर्किंदै गर्दा आन्दोलनको समर्थन गर्ने भनिएका थुप्रै चर्चित व्यक्तिहरू हामी त पूर्वराजाको पक्षमा छैनौं भन्दै जोगिन खोजिरहेका छन् । 

शुक्रबार काठमाडौंको तीनकुनेमा भएको हिंसात्मक आन्दोलनले देशभर तरंग ल्याएको छ । ‘राजा आऊ, देश बचाऊ’ नारासहित सुरु भएको प्रदर्शन हिंसात्मक बन्दा दुई नागरिकले ज्यान गुमाए, जसले समाजमा ठूलो हलचल मच्चाएको छ ।

यो  भीडले तोडफोड, आगजनी, आक्रमण शहरभर अशान्ति फैलायो । अराजक भीडले एक पत्रकारलाई जिउँदै जलाइदियो । यि सबै घटना घट्नुको कारण अहिले पूर्वराजा ज्ञानेन्द्र शाहलाई मानिएको छ । पूर्वराजाविरुद्ध कदम चाल्न सरकारमाथि चर्को दबाब सिर्जना भइरहेको छ । 

सामाजिक सञ्जालमा ३ब्चचभकतन्थबलभलमचब ह्यासट्याग ट्रेन्ड गरिरहेको छ । हजारौँ नागरिक आक्रोश पोख्दैछन् । आक्रोशित नागरिकहरू ज्ञानेन्द्रलाई पक्राउ गर्न माग गर्दै अभियानमा जुटेका छन् । के पूर्वराजाले साँच्चै पर्दा पछाडिबाट डोर्याएका थिए त प्रदर्शनको यो उग्र रुपलाई ? कि यो मात्र एक संयोग थियो ? बहस तिव्र बन्दै गएको छ । यो अभियान झनै तिव्र बन्दै गएसँगै सरकारमाथि दबाब बढिरहेको छ । 

यता, राजावादी आन्दोलनको समर्थन गर्ने ‘प्रबुद्ध’ व्यक्तिहरू तीव्र आलोचनाको घेरामा परेपछि एकपछि अर्को गर्दै पछि हट्न थालेका छन् । उनीहरुले पूर्वराजाको साथमा हामी छैनौं भनिरहेका छन् । विभिन्न क्षेत्रमा ‘विशिष्ट’ योगदान दिएका ३२ जना भेला भएर चैत १५ गते हुने आन्दोलनको पूर्वसन्ध्यामा समर्थनको घोषणा गरेका थिए ।

उनीहरूले एक विज्ञप्ति जारी गर्दै आन्दोलनप्रति ऐक्यबद्धता जनाए । भेलाले जारी गरेको विज्ञप्तिमा उद्योगपति भवानी राणा, कुशकुमार जोशी, पत्रकार जीवराम भण्डारी, टीकाराम यात्री, युवराज घिमिरे, पूर्वप्रहरी प्रमुख सर्वेन्द्र खनाल, कलाकार दीपकराज गिरीलगायतका चर्चित व्यक्तिहरूको नाम थियो । तर, जब आन्दोलनले हिंसात्मक रूप लियो र जनधनको ठूलो क्षति भयो, तब विज्ञप्तिमा नाम समेटिएका धेरैले आफ्नो संलग्नता अस्वीकार गर्न थाले । एकपछि अर्को गर्दै उनीहरूले आफू यो आन्दोलनको समर्थनमा नरहेको स्पष्टीकरण दिन थालेका छन् । उनीहरुले अहिले पूर्वराजाको साथ छोडेर आफुलाई जोगाउने प्रयास गरिरहेका छन् ।

आफुलाई जोगाउन कसले के भने ?

-   पूर्वआईजीपी सर्वेन्द्र खनालले विज्ञप्तिमा नाम राख्दा अनुमति नलिएको भन्दै आपत्ति जनाए । भेलामा भएको छलफल र अपिल जारी गर्ने विषय फरक भएको भन्दै उनी ब्याक भएका छन् । 

-    कलाकार दीपकराज गिरीले सामाजिक सञ्जालमा ‘म न त अहिलेका श्री ३ (प्रचण्ड, केपी, शेर) को पक्षमा छु, न त उहिल्यैका श्री ५ को ! कुनै एक व्यक्ति वा वादको पक्षपोषण गरिन्न । आएको समाचार गलत छ । भन्दै आफूलाई चोख्याउन खोजेका छन् । 

-  पत्रकार टीकाराम यात्रीले पनि यो घटनाबाट ठूलो शिक्षा लिएको बताए । भीडियो नै जारी गर्दै गणतन्त्रवादी, राजावादी, माओवादी सबै लोकतन्त्रभित्रै फैलिन्छन् र फस्टाउँछन् भन्दै उनले लोकतन्त्रको विकल्प अझ उन्नत लोकतन्त्र हो भनेका छन् । 

अब, के यो आन्दोलन स्वतःस्फूर्त थियो वा पर्दा पछाडि कुनै ठूला खेलाडी थिए ? यो प्रश्नको जवाफ खोज्ने क्रम जारी छ । सरकार दबाबमा छ । आन्दोलनका कारण मृत्युवरण गरेका परिवारहरू न्यायको माग गरिरहेका छन् । र ज्ञानेन्द्र शाहको संलग्नताको बहस चुलिंदै गएको छ ।