काठमाडौं । नेपाल राष्ट्र बैंकका गभर्नर महाप्रसाद अधिकारीको कार्यकाल चैत २४ गते सकिदैछ । आफ्नो पदावधि सकिने भएपछि चैत ५ गतेदेखि नै अधिकारी विदामा बसेका छन् । यहिबीचमा नयाँ गभर्नर नियुक्तिका मन्त्रिपरिषद् बैठकले सिफारिस समिति गठन गरेपछि विभिन्न राजनीतिक चलखेल शुरु भएका छन् । 

नेपाल राष्ट्रबैंकका १७ औं गभर्नर महाप्रसाद अधिकारीको कार्यकाल सकिन अब केही दिन मात्रै बाँकी छ । नयाँ गभर्नर नियुक्तिका लागि मन्त्रिपरिषद् बैठकले सिफारिस समिति गठन गरिसकेको छ । मन्त्रिपरिषद्को बैठकले उपप्रधान एवम् अर्थमन्त्री विष्णु पौडेलको नेतृत्वमा तीन सदस्य गठन गरिसकेको छ । 

दर्जन आकांक्षी, दौडधुप जारी 

गभर्नर नियुक्तिका लागि उपप्रधान तथा अर्थमन्त्री पौडेल नेतृत्व्को सिफारिस समितिमा विजयराज भट्टराई र विश्व पौडेल सदस्य छन् । समितिले गर्भनरमा कसलाई सिफारिस गर्ने ठोस गरिसकेको छैन । 

त्यसैले गभर्नरका आकांक्षीहरुको दौडधुप शुरु भइसकेको छ । सत्तारुढ प्रमुख दुई दल कांग्रेस र एमालेको आफू निकटका ब्यक्तिलाई गभर्नर बनाउने होड चलेको छ । गभर्नर बन्न झण्डै एक दर्जन आकांक्षीहरुले लविङ गरिरहेका छन् । 

वर्तमान गभर्नर अधिकारी एमालेबाट नियुक्त भएका कारण पनि यस पटक कांग्रेस आफूले चाहेको ब्यक्ति हुनुपर्ने अडानमा छ । कांग्रेस नेताकै निर्देशनमा गभर्नर बन्ने होडमा नविल बैंकका प्रमुख कार्यकारी अधिकृत ज्ञानेन्द्र ढुंगानाले पदबाट राजीनामा दिइसकेका छन् । 

यस्तै, राष्ट्र बैंकका कार्यकारी निर्देशक डा. प्रकाशकुमार श्रेष्ठले पनि बुधबार मात्रै पदबाट राजीनामा दिएका छन् । नेकपा एमालेका निकट मानिने श्रेष्ठ अर्थमन्त्रीको आर्थिक सल्लाहकारका रुपमा पनि काम गरिसकेका छन् । उनी एमाले महासचिव शंकर पोखरेल लुम्बिनीको मुख्यमन्त्री हुँदा प्रदेश योजना आयोगको उपाध्यक्ष थिए । 

स्वार्थसमूहको घेराबन्दीमा कांग्रेस 

नेपाली कांग्रेसले गभर्नरका लागि ज्ञानेन्द्रलाई अघि सारेपछि भने विभिन्न प्रश्नहरु उब्जिएका छन् । खर्बपति उद्योगी एवम् कांग्रेस सांसद विनोद चौधरीको बलमा कांग्रेस नेताहरुलाई ज्ञानेन्द्रलाई गभर्नर बनाउन कस्सिएका हुन् । चौधरीकै जोडबलमा कांग्रेस नेताहरुले केही महिनाअघिदेखि नै ज्ञानेन्द्रको लबिङ थालेका हुन् । उद्योगपति चौधरीका साथै कांग्रेस कोषाध्यक्ष उमेश श्रेष्ठले पनि ज्ञानेन्द्रको नाम खल्तीमा बोकेर हिडेका छन् ।

तेह्रथुम घर भएका ढुंगाना कांग्रेसको संस्थापन पक्षसँग निकट मानिन्छन् । नबिल बैंक सम्बद्ध मुद्दा राष्ट्र बैंकमा विचाराधिन रहेको अवस्थामा स्वार्थको द्वन्द्व हुने गरी कांग्रेसले ढुंगानाको नाम अघि सारेपछि एमाले झस्किएको छ । 

चार्टर्ड एकाउन्टेन्ससमेत रहेका ढुंगाना नविल बैंकअघि नेपाल बंगलादेश बैंकको सीईओ थिए । बंगलादेश बैंक नविल बैंकमा गाभिएपछि नविलको कर्जा गुणस्तरमा समस्या देखिएको हो । नेपाल राष्ट्र बैंकको ऐनले वाणिज्य बैंक तथा वित्तीय संस्थाको वहालवाला पदाधिकारी गभर्नर बन्न अयोग्य ठानेको छ ।

‘वाणिज्य बैंक तथा वित्तीय संस्थाको बहालवाला पदाधिकारी र ५ प्रतिशत वा सो भन्दा बढी सेयर तथा मतदानको अधिकार भएको व्यक्ति राष्ट्र बैंकको गभर्नर वा सञ्चालक हुन अयोग्य हुनेछ,’ राष्ट्र बैंक ऐनको दफा २१ मा उल्लेख छ ।

 यसअघि डा.चिरञ्जीवी नेपाल गभर्नर हुने बेलामा पनि ढुंगानाले गभर्नरका लागि चर्को लविङ गरेका थिए । बैंक तथा वित्तीय संस्थामा संस्थागत सुशासनको चुनौति बढिरहेकाबेला स्वार्थको द्वन्द्व हुने गभर्नर नियुक्त गर्न नहुने विज्ञहरुले बताउँदै आएका छन् । हालका गभर्नर महाप्रसाद अधिकारीले किर्ते नाम खडा गरी एमालेको सल्लाहकार समितिमा बसेको भन्दै आलोचना भएको थियो ।