काठमाडौं । माओवादी अध्यक्ष पुष्पकमल दाहाल प्रचण्ड सँधै केपी ओलीबाट अपमानित र जालझेल भएको भन्दै गुनासो गर्छन् । चाहे नेकपा बनाएर एकै दलमा रहँदा होस् वा सत्ता सहकार्यकै बेला उनी ओलीले आफूलाई धोका दिएको भन्दै सार्वजनिक रुपमै गुनासो पोख्दै आएका छन् । नेकपा हुँदा ओली निरङ्कुश बनेको निश्कर्षसहित प्रचण्ड ओलीकै विरुद्ध सडक ओर्लिए । पटक पटकको संसद विघटन र सत्ता संचालनको कार्यशैलीमै विमत्ति राखेका प्रचण्ले ओली सरकार ढाल्न नै सांसदहरुको हस्ताक्षर संकलन गरे । र, पछि सरकारमात्रै ढलेन नेकपा नै विभाजित हुन पुग्यो । मुख्यतः यसमा ओली र प्रचण्ड नै दोषी देखिन्छन् ।
ओली प्रचण्ड फेरि मैदानमा
ओली र प्रचण्डले पार्टी एकता गरे पनि त्यो लामो समय टिकेन । तर ०७९ सालको आम निर्वाचनपछि भने ओली र प्रचण्डले पुनः सत्तामा सहयकार्य गरे । तर उनीहरुको यो सहकार्य पनि लामो समय टिक्न सकेन । जसका कारण प्रचण्ड सरकारबाट बाहिरिनु पर्यो । अन्तिम समयसम्म पनि एमाले र माओवादीकै सहकार्य थियो । यद्यपि अन्तिममा ओलीले प्रचण्डलाई छोडेर काँग्रेससँग सहकार्य आरम्भ गरे । जुन बेला पनि प्रचण्डले ओलीबाट गम्भीर धोका भएको औँल्याएका थिए ।
माओवादी र एमालेबीच पुनः संघर्षको सुरुवता भएको छ । सत्ता पक्ष र प्रतिपक्षमा रहेर सँधै ओली र प्रचण्ड एकअर्काविरुद्ध विष बमन गर्दै आएका छन् । ओलीमाथि प्रचण्डले सुशासन, पारदर्शिता र चुस्तामाथि प्रश्न गर्दै विभिन्न भ्रष्टाचारको आरोप लगाउँदै आएका छन् । तर कुलमान घिसिङलाई विद्युत प्राधिकरणको कार्यकारी निर्देशकबाट हटाइएपछि अझ दुई नेताबिच टसल बढेको हो । माओवादीले कुलमानको बर्खास्तिलाई लिएर सदन अवरोध गर्दै ओलीविरुद्ध संघर्ष छेँडेको छ ।
माओवादीले प्रधानमन्त्रीबाटै बर्खास्तिको कारण खुलाउनुपर्ने र चित्त बुझ्ने जवाफ नआए अझ आन्दोलन चर्काउने चेतावनी दिँदै आएको छ । यतिमात्रै होइन, प्रचण्डले शीर्ष तीन दलको नेताहरुबीच भएको छलफलमा कुलमानको विषयमा कुराकानी नै नगरेको तर केही घण्टापछिको मन्त्रिपरिषद बैठकबाट उनलाई हटाउने निर्णय गरेको भन्दै रोष प्रकट गरिरहेका छन् ।
तर एमालेले भने प्रमुख प्रतिपक्षी दल माओवादीले राखेको अडानलाई खास महत्व दिइरहेको छैन । माओवादीले प्रधानमन्त्रीको जवाफका लागि राखेको अडान सान्दर्भिक र स्वभाविक नभएको एमालेको ठहर छ ।
उता एमाले अध्यक्ष समेत रहेका प्रधानमन्त्री ओलीले पनि कुलमान हटाउने वा नहटाउने भन्ने विषय सामान्य रहेको भन्दै सरकारले एक कर्मचारीमाथिको निर्णय जतिसुकैबेला पनि गर्नसक्ने जवाफ दिँदै आएका छन् । सदनबाट जवाफ दिनुपर्ने माओवादीको अडानमाथि बेवस्ता गर्दै ओलीले सार्वजनिक कार्यक्रमबाटै कुलमान गए हितेन्द्र आए भन्दै जवाफ फकाईइरहेका छन् ।
जसलालाई माओवादीले भने आफ्नो अडान र मागमाथि ओली गम्भीर नभएको भन्दै असन्तुष्टि प्रकट गरिरहेको छ । कुलमानले विद्युतका क्षेत्रमा गरेको प्रगतिलाई माओवादीले जस लिने र त्यसलाई खारेज गर्ने एमालेको योजनाले ओली र प्रचण्डबीचको लडाईँ पुनः सतहमा आएको हो । जसले ओली र प्रचण्डबीचको विगतको संघर्षलाई समेत निरन्तरता दिएको छ ।
राजसंस्था र तिनको पक्षमा उर्लिदो लहडकाविरुद्ध ओली प्रचण्डले सामना गर्न गणतन्त्रवादी मोर्चा बनाउने तयारी समेत गरिरहेका थिए । जसमा प्रचण्ड ओलीबीच सामान्य समझदारीसमेत भएको थियो । यद्यपि कुलमानमाथि कारवाही चलाइएपछि पुनः ओली प्रचण्डबीच गहिरो फाटो आएको हो । जसले ओली प्रचण्डलाई फेरि एकअर्कामा मैदान उतारेको छ ।
