काठमाडौँ । प्रधानमन्त्री केपी शर्मा ओलीले पीडित केन्द्रित भएर शान्ति प्रक्रिया टुंग्याउने कुरामा सरकार लागिपरेको बताएका छन् । बिहीवार काठमाडौंमा अयाोजित एक कार्यक्रमलाई सम्बोधन गर्दै उनले यस्तो बताएका हुन् ।

नेपालले मौलिक किसिमले शान्ति प्रक्रिया आफैँले शुरु गरेको र आफैँले अगाडि बढाएको बताउँदै ओलीले आफूले शान्ति प्रक्रियाका बाँकी काम टुंगो लगाउन र सफल पार्न मात्रै चाहेको बताए । त्यसको श्रेय र जस आफूलाई नचाहिने उनले जिकिर गरे ।

ओलीले पीडितका घाउमा मल्हम लगाउन र अबदेखि नेपालमा अशान्ति हुँदैन भन्ने कुराको ग्यारेन्टी गर्न आवश्यक रहेको बताए । शान्ति प्रक्रियाका बाँकी काम काँग्रेस सभापति शेरबहादुर देउवा, पुष्पकमल दाहाल र आफूबीचको समझदारीमै टुंग्याइने भन्दै समझदारी गर्न आह्वान पनि गरे ।

प्रधानमन्त्री ओलीले भने, ‘हामीले आफ्नै एउटा शान्ति प्रक्रिया आफैँले शुरु गरेका छौँ । हामी आफैँले अगाडि बढाएका छौँ । कसले श्रेय लिने हो भन्नेकुरा छोडिदिऔँ । म यसलाई सफल मात्रै पार्न चाहन्छु, श्रेय म बाहेक अरु सबैलाई दिन चाहन्छु । मलाई श्रेयको भोक होइन, श्रेय चाहिएन । सफल पारौँ । पीडितका घाउमा मल्हम लगाऔँ । उहाँहरुका आँशु पुछौँ । नेपाली जनतालाई निश्चिन्त बनाऔँ की अब नेपालमा शान्ति हुनेछ । यस्तो भायलेन्स हुनेछैन, यसरी मान्छे पीडित हुनुपर्ने छैन । हामी बीचकै कुरा त हो यो । हामीले वास्तवमा संकल्प गर्ने हो भने यसलाई टुंग्याउन नसक्ने कुरा छैन । पीडितलाई न्याय दिन नसकिने कुरा छैन । सकिन्छ, सक्नुपर्छ । हामी सक्छौँ । त्यही विश्वासका साथ प्रधानमन्त्रीको हैसियतले म लागेको छु, यो विश्वास दिलाउन चाहन्छु । त्यसैले म प्रधानमन्त्री भए लगत्तै लामो समयदेखि अड्एिको ऐन पास गर्न सबै पक्षलाई आग्रह गरेँ ।’

आलोचनालाई स्वागत गर्छु तर समाज नबिथोल्नुहोस्

प्रधानमन्त्री ओलीले सुशासनका लागि सरकार दत्तचित्त भएर लागेको दाबी गरे । जनतालाई सन्तुष्ट बनाएर जाने बाटो राजनीतिक दलहरुले लिनुपर्ने बताए । उनले जनतालाई काममार्फत सन्तुष्ट बनाउनुपर्ने उनकाे भनाइ छ ।

अशान्ति भड्काउने दिशामा नजान सबै राजनीतिक दलहरुसँग आग्रह गर्दै ओलीले आज अधिनायकवादी नभएर लोकतान्त्रिक सरकार रहेको जिकिर गरे । जनताका सुझाव सुन्नका लागि आफू सदैव तत्पर रहेको र सबैको रचनात्मक भुमिका भएमात्रै गरिबी हटाउन, देश विकास गर्न सम्भव रहेको उनकाे भनाइ छ ।

आफूले आलोचनालाई स्वागत गर्ने बताउँदै ओलीले समाज नबिथोल्न, शान्ति प्रक्रिया नभाँड्न आग्रह गरे । सत्य निरुपण तथा मेलमिलाप आयोगका लागि सिफारिस समिति बनेर काम शुरु गरिसकेको र दुई महिनापछि सिफारिसको आधारमा आयोग गठन हुने, त्यसपछि न्याय र परिपूरण दिने कुरामा लाग्ने उनले बताए ।

प्रधानमन्त्री ओलीले विगतमा नेपालले ठूलो हिंसा भोगेको जिकिर गर्दै अहिले पनि उक्त हिंसालाई लिएर बिदा मनाउने कुरा किन भइरहेको छ ? भन्दै प्रश्न गरे । माओवादी द्वन्द्व राष्ट्रिय गल्ती भएको उनकाे भनाइ छ । साेही मञ्चमा माओवादी केन्द्रका अध्यक्ष पुष्पकमल दाहाल प्रचण्ड पनि थिए ।