काठमाडौं । समाजवादी मोर्चाले चैत्र १५ गते भव्य प्रदर्शन गर्ने तयारी तीव्र पारेको छ । गणतन्त्रविरोधि कदमको प्रतिरोध भन्दै समाजवादी मोर्चाले प्रदर्शनमा सहभागी हुन अपिल गर्दै गर्दा राजावादीले समेत चैत्र १५ गते नै प्रदर्शन गर्ने भनेका छन् ।
चैत्र १५ मा प्रदर्शनको हब काठमाडौं बनाउँदै गर्दा यस दिनका सम्भावित परिदृष्य कस्ता हुन सक्छन् त । समाजवादी मोर्चाले गणतन्त्रको रक्षा गर्नका लागि हजारौं मानिस सडकमा उत्रिने दाबी गरि यस कार्यका लागि तयारी तीव्र बनाएको छ ।
नेकपा एकीकृत समाजवादीको कार्यालयमा बसेको समाजवादी मोर्चाको बैठकबाट प्रदर्शनलाई भव्य बानउने सहमति गरेको बताएको छ ।
समाजवादी मोर्चाले काठमाडौंका विभिन्न क्षेत्रबाट जुलुस निकाल्ने भनेको छ । जुलुस कोटेश्वर हुँदै माइतीघर मण्डला, कुपन्डोल, कालीमाटी, नागपोखरी पुतलीसडक, सुन्धारा हुँदै भृकुटीमण्डपको माथिल्लो चोकमा पुगेर कोणसभामा परिणत हुने भनिएको छ ।
समाजवादी मोर्चाले गनतन्त्रको रक्षाका लागि आवाज उठाउन सडक प्रदर्शन नै गर्ने भएपनि कांग्रेसले केही मौनता देखाइरहेको भन्न थालिएको छ । तर, कांग्रेस नेता समेत रहेका गृहमन्त्री रमेश लेखकले भने भने गणतन्त्रविरुद्ध षडयन्त्र गर्न खोजिएको भन्दै आक्रोश पोखेका छन् ।
सरकारले जस्तै गणतन्त्रको पक्षमा उठेका आवाजमा एमाले पनि आक्रामक देखिन्छ । सरकार निर्माणको समयक्रमदेखि सत्ता र प्रतिपक्षीबीचको विवाद देखिएपनि गणतन्त्रको पक्षमा भने एकमतजस्तो स्थिति छ ।
यता, एमाले महासचिव शंकर पोखरेलले राजावादी शक्तिमाथि आक्रोश पोख्न माओवादी युद्धलाई समेत उदाहरण दिएका छन् । तर, उनले माओवादीमाथि अपमानको वर्षा गराउन यस्तो अभिव्यक्ति दिएका त होइनन् भन्ने आशंका पनि छ ।
जे होस एमाले नेतृत्व गणतन्त्रविरोधि गतिविधिको विपक्षमा भने दरो तवरले उभिएको भने देखिन्छ ।
एमाले निकट युवा संघले मार्चपास गर्दै गणतन्त्रको पक्षमा उभिनुपर्ने भनेको छ । यता, प्रधानमन्त्री केपी ओलीले पनि राजतन्त्रलाई मुखिया प्रणालीसँग जोड्दै आक्रोश पोखिरहेका छन् ।
यस परिस्थितिलाई हेर्दा गणतन्त्रवादी भर्सेस राजतन्त्रवादीको स्थिति प्रष्ट देखिन्छ । दुर्गा प्रसाईको नेतृत्वमा रहेको समूहले आयोजना गरेको राजसंस्था पक्षधर आन्दोलनमा पूर्वराजा ज्ञानेन्द्रले कमाण्डर तोकेका नवराज सुवेदीले पनि समर्थन गर्ने भनेका छन् । यसमा राप्रपाका नेतादेखि राजावादी अनुहारहरु छन् ।
राजावादी शक्तिले गर्ने प्रदर्शनको केन्द्र काठमाडौं नै बनाएको छ । कोटेश्वर तिनकुने क्षेत्रमा मुख्य केन्द्र बनाएर प्रदर्शनको तयारी उनीहरुको छ ।
दुवै पक्षको काठमाडौं केन्द्रित प्रदर्शन सम्हाल्न सरकारलाई केही असहज देखिन्छ । त्यसैले पनि चैत्र १५ गतेको प्रदर्शनलाई सरकारले कसरी सुरक्षा व्यवस्था मिलाउछ भन्ने प्रश्न समेत पेचिलो देखिन्छ ।
त्यसमाथि गणतन्त्रवादी शक्तिहरुले पनि अनेक उक्साहट पैदा गर्ने अनि भीडलाई आक्रोशमय बनाउने जस्ता कदम चालिरहेको देखिन्छ । मुठभेटकै अवस्था आउनसक्ने सम्भावना पनि चैत्र १५ को प्रदर्शनले बोकेको छ ।
त्यसैले यि सबै परिस्थितिलाई आकलन गरि सरकारले काठमाडौंको सुरक्षा व्यवस्थामा उच्च संवेदशिलता देखाउन आवश्यक छ ।
