काठमाडौं । यही चैत्र १५ गते काठमाडौंमा गर्ने जनप्रदर्शनमा उपस्थित हुन समाजवादी मोर्चाले गणतन्त्रवादीहरुलाई आह्वान गरेको छ । बुधवार नेकपा (एकीकृत समाजवादी) को पार्टी केन्द्रिय कार्यालय आलोकनगरमा बसेको समाजवादी मोर्चाको बैठकले मोर्चाको तर्फबाट १५ गते हुने जनप्रदर्शनमा सहभागी हुन आह्वान गरेको हो ।

बैठकपछि सञ्चारकर्मीहरुसँग कुरा गर्दै नेपाल कम्युनिष्ट पार्टीका प्रवक्ता खड्कबहादुर विश्वकर्माले मोर्चाको तर्फबाट १५ गते गर्न लागेको  प्रदर्शनमा सम्पूर्ण गणतन्त्रवादीहरुलाई उपस्थित हुन आह्वान गरे । उनले गणतन्त्रको अभ्यासका क्रममा भएका कमी-कमजोरीहरुप्रति जनताले गरेको समर्थन र विरोधको नेताहरुले आत्मसमीक्षा गरिरहेको बताए । नेपालको समाजवादको यात्रालाई रोक्न प्रतिगामीहरुको आन्दोलनमार्फत विदेशी शक्तिले षड्यन्त्र गरेको जिकिर गर्दै उनले नेपाली जनतालाई सचेत हुन आग्रह समेत गरे ।

विश्वकर्माले भने,  ‘नेपाली जनताको धेरै ठुलो आन्दोलन र त्यागबाट गणतन्त्र स्थापना भएको हो । यद्यपी गणतन्त्रको अभ्यास गर्ने क्रममा केही लिमिटेसन छन् आफ्नै ठाउँमा । जनताले त्यसमा समर्थन पनि गर्या छन् र विरोध पनि गर्या छन् । राजनीतिक पार्टीहरुले पनि महसुस गर्नुभएको छ । र आत्मसमीक्षाहरु पनि चलिरहेर्क छ । पर्सी १५ गतेको कार्यक्रम भनेको प्रतिगमनका विरुद्धमा विदेशी षड्यन्त्रका विरुद्धमा, प्रतिगामी तत्वहरुका विरुद्धमा, यथास्थितिवादीहरुको रवैयाको विरुद्धमा सशक्त आन्दोलनको रुपमा यसलाई सम्पन्न गरौँ भन्ने निर्णय गरिएको छ । यो देशको माया गर्ने सबैलाई राष्ट्रको स्वाधिनताका लागि १५ गतेको कार्यक्रममा सहभागी हुन गणतन्त्रको रक्षा चाहने सबैलाई वामपन्थी, कम्युनिष्टहरुलाई समाजवादी मोर्चाको तर्फबाट विशेष अपिल  गर्ने निर्णय गरेका छौँ । देश धेरै अप्ठ्यारो स्थितिमा छ, सामान्य अवस्थामा छैन । सत्ताबाट न्याकिएका साशकहरु जहिले पनि सत्तामा फर्किने कुचेष्ठा गरी रहेकै हुन्छन् । दिवा सपना देखिरहेकै हुन्छन् । राजावादी भन्नेहरु, हिजोका भाइभारदारहरु अहिले सल्बलाइरहेका छन् त्यतिमात्रै ठूलो कुरा छैन । तर विदेशी शक्तिहरुको पनि उनीहरुप्रति कतै न कतै आशक्ति देखिन्छ । कतै  न कतै सर्पोट देखिन्छ यो सिरियस छ । त्यसकारणले नेपाली जनता र यो देशको निम्ति गणतन्त्र र लोकतन्त्रका विरुद्ध नेपाली जनाता र यो देशको समाजवादको यात्रालाई रोक्ने षड्यन्त्र कतैबाट हुन्छ भने त्यो हामीलाई सयहै हुँदैन त्यसो भएर आम नेपाली जनतालाई सचेत रहन आग्र गर्छु ।’

प्रवक्ता विश्वकर्माले अग्रगमनको विरुद्धमा हुने सबैखाले क्रियाकलाप सैह्य नहुने बताए । उनले राजनीतिक प्रतिगामीहरुको भ्रममा नेपाली जनता नपर्ने जिकिर गर्दै संघीय लोकतान्त्रिक गणतन्त्रको अभ्यास गर्ने क्रममा भएका त्रुटी सच्याउनुपर्ने बताए ।