पर्सा । नेकपा माओवादी केन्द्र पुनः अभियानमै फर्किएको छ । राजावादी शक्तिको चलखेल बढेको भन्दै फागुन अन्तिम साता अभियानमा केही ब्रेक लगाएको माओवादीले तराई मधेश क्षेत्रमा पुनः सक्रियता बढाएको छ ।
माओवादी केन्द्रको अभियान र स्वतन्त्र विद्यार्थी युनियनको निर्वाचनमा देखिएको लहरपछि के भन्दैछ माओवादी ? मधेसमा देखिएको समस्यामाथि माओवादीको विमर्श कति फलदायी बन्दैछ ?
तराई मधेस जागरण अभियानमा जोडिएको माओवादी केन्द्र पुर्वराजा ज्ञानेन्द्र शाहको फिर्तिमा देखिएको जनलहर देखेपछि एकाएक अभियान स्थगित गरेर काठमाडौ फर्कियो ।
माओवादी अभियान स्थगित गरेर केहिदिन काठमाडौंमा कार्यक्रम, आन्तरिक बैठक, सरकारको समीक्षा लगायतका काममा व्यस्त बन्दै फेरि तराई फर्किएको छ । गणतन्त्रमाथि उठेका प्रश्न र अभियान किन भन्ने विषयमा प्रचण्डले जनताको मुक्तिको विषय रहेको भन्दै अभिव्यक्ति दिए ।
केपी ओली नेतृत्वको सरकारले काम गर्न नसकेको आरोप लगाएका प्रचण्डले आफू नेतृत्वको सकारले भ्रष्टाचारविरोधि अभियान थालेकोदेखि सुशासनको पक्षमा कदम उठाएको दाबी समेत गरे ।
पछिल्लो समय राजावादी गतिविधि बढेको विषयमा प्रचण्डले हकेर सम्बोधनमा आक्रोश पोख्ने गरेका छन् । गणतन्त्रको विकल्प राजतन्त्र र राजसंस्था हुनै नसक्ने दाबी गरेका प्रचण्डले राजाका पालामा हरेक उद्योग स्थापनामा ५१ प्रतिशत शेयर दरबारको हुने गरेको आरोप लगाए ।
माओवादी केन्द्रले थालेको अभियानले जनतामा जागरण पैदा भएको प्रचण्डको बुझाई छ । अहिले माओवादी केन्द्रको विद्यार्थी संगठन अखिल क्रान्तिकारीले प्राप्त गरेको जीतले पनि माओवादी केन्द्रलाई आफ्नै खुट्टामा उभिने प्रेरणा मिलेको प्रचण्डको दाबी छ । यस्तै, प्रचण्डले माओवादी केन्द्रमाथि सरकारमा जान अनेक प्रपञ्च गरेको आरोप लाग्ने गरेपनि आफू ०८४ अघि सरकारमा जादै नजाने दाबी समेत गरेका छन् ।
