काठमाडाैँ । प्रधानमन्त्री केपी शर्मा ओलीले सरकार युवाहरुलाई स्वदेशमै उद्यमशीलता र रोजगारीको अवसर सिर्जना गर्न दत्तचित्त भएर लागिरहेको दाबी गरेका छन् । बिहीवारको प्रतिनिधि सभाको बैठकमा बोल्दै प्रधानमन्त्री ओलीले यस्तो बताएका हुन् ।
युवाहरु उच्च शिक्षा तथा रोजगारीका लागि विदेश जानेक कुरालाई नकारात्मक रुपमा लिन नहुने बताए । उनले स्वदेशमै उत्पादन र उत्पादकत्व विस्तार गरी आन्तरिक रोजगारीको दिगो आधार तयार गर्ने उद्देश्यले सरकारले राष्ट्रिय श्रम तथा रोजगार सम्मेलन भर्खरै सम्पन्न गरेको जानकारी समेत गराए ।
उनले भने, ‘व्यक्तिगत तवरमा विदेश जानुलाई गौरवको विषय ठान्ने र सामाजिक रुपमा भने त्यसलाई नकारात्मक भाष्यमा बुझ्ने दोहोरो चरित्रका कारण नकारात्मक सन्देश गएको छ । संसारको जुनसुकै कुनामा जान सक्ने छनोटको लाभ हाम्रा युवाहरुले पनि लिएका छन् । यसो भनेर हामी युवाहरुलाई स्वदेशमै उद्यमशीलता र रोजगारीको अवसर सिर्जना गर्ने कुरामा केही कामै नगरी बसेका छैनौं । यो देश बन्दैन, यहाँ केही बन्दैन भन्ने गलत भाष्य फैलाउनु हुँदैन ।’
प्रधानमन्त्री ओलीले शान्ति प्रक्रियाका बाँकी काम चाँडै टुङ्ग्याउन पनि सरकार प्रतिबद्ध रहेको बताएका छन् । उनले द्वन्द्वकालमा भएका घटनाका कारण पीडित भएका व्यक्ति तथा निजका परिवारका सदस्यले छिटोभन्दा छिटो न्याय पाउन् भन्ने कुरामा सरकार संवेदनशील एवं गम्भीर रहेको उनकाे भनाइ छ । वेपत्ता तथा मेलमिलाप आयोग ऐन, २०७१ तेस्रोपटक संशोधन गरिएको बताउँदै ओलीले भने, ‘शान्ति प्रक्रियाको बाँकी काम टुंग्याउने प्रक्रियामा आम सरोकारवालाहरुसँगको परामर्शमा बेपत्ता पारिएका व्यक्तिको छानविन, बेपत्ता तथा मेलमिलाप आयोग ऐन, २०७१ तेस्रो संशोधन भएको छ । हामीले यसै अधिवेशनबाट यसै संसदबाट गरेका छौं । साथै बेपत्ता पारिएका व्यक्तिको छानबिन आयोग र सत्य निरुपण तथा मेलमिलाप आयोगका पदाधिकारीहरुको नियुक्ति प्रक्रिया यथासक्य छिटो शुरु गरि शान्ती प्रक्रियाको बाँकी काम टुंग्याउन सरकार प्रतिवद्ध छ ।’
