रौतहट । विगत केही महिना देखि घाइते अवस्थामा रहेको रौतहटको चन्द्रपुर नगरपालिकामा भौतारिरहेको यमजग नामको हात्तीको उपचारको लागि सरकारले चासो देखाएको छ । घाइते अवस्थामा रहेको हात्तीको उपचारको लागि महिनौसम्म पनि सरकार र सरोकारवाला निकायहरुले खासै चासो नदेखाएको भन्दै चौतर्फी आलोचना भएपछि चितवन स्थित राष्ट्रिय प्रकृति संरक्षण कोषको टोली आएर हात्तीको उपचार गरेको छ । तर घाइते हात्तीको अवस्था हेर्दा उसलाई लामो समयसम्म चिकित्सको निगरानीमा राखेर राम्रोसँग उपचार गर्नुपर्ने स्थानियको माग रहेको छ ।
रौतहटको चन्द्रपुर नगरपालिकामा भौतारिरहेको यमजग नामको हात्तीको उपचारको लागि सरकारले चासो देखाएको छ । हात्तीको उपचार नभएको समाचार न्यूज २४ टेलिभिजनमा सार्वजनिक भएपछि दक्ष चिकित्सक र प्राविधिक सहितको राष्ट्रिय प्रकृति संरक्षण कोषको टोलीले यमगजलाई सोही नर्सरीमा गएर उपचार गरेका छन् ।
यमगजको दाहिने खुट्टामा गम्भीर चोट लागेको छ । खुट्टामा चोट लागेका कारण हात्ती राम्रोसँग हिँड्न र बस्न पनि सक्दैन् । घाइते भएकै कारण सो हात्ती समूहबाट छुटेर एक्लै परेको छ । यमगजको राम्रोसँग उपचार नभए ज्यानै जाने जोखिम भएकाले उपचार पहल गरिएको स्थानीय सरकारको दाबी छ ।
यसअघि पनि करिब १ महिना अगाडि कोषबाट आएको चिकित्सक टोलीले डार्ट गरेर यमगजको जंगलमै उपचार गरेको थियो । त्यसपछि पनि यमगजको घाउ निको भएको छैन् । सिकारीको गोली लागी वा धारिलो हतियारको प्रहारबाट यमगज घाइते भएको अनुमान गरिएको छ । यसपटकको उपचार प्रभावकारी हुने चिकित्सकको विश्वास छ ।
घाइते यमगज केही दिनदेखि चन्द्रपुर ३ मा अवस्थित आदर्श सामुदायिक वनको नर्सरीमा बस्दै आएको छ । हात्तीलाई हेर्न सर्वसाधरणहरुको बाक्लो घुँइचो लाग्ने गरेको छ । यमगजको ज्यान जोगाउन स्थानियले घरबाट मकैं, केरा , काउली, धान लगायतका खानेकुर तथा पानी नर्सरीमै ल्याएर दिने गरेका छन् ।
हात्तीलाई लट्याउने सुइ लगाएर उपचार सुरु गरिएको थियो । यमगजको शारिरिक स्थितिका कारण पूर्णरुपमा बेहोस बनाएर उपचार गर्दा स्वास्थ्यमा जटिलता आउने सम्भावना देखिएको भन्दै लट्याएर उपचार गरिएको प्राविधिकहरु बताउँछन् ।् कुनैबेला आक्रमक हात्तीको रुपमा चिनिएको यमगजका स्वभाव फेरिएको छ ।
