काठमाडौं । रंगहरुको पर्व होली नेपालमा मात्र नभई दक्षिणी छिमेकी मुलुक भारतमा पनि निकै भब्ययताका साथ मनाउने गरिन्छ । फागू पूर्णिमाका दिन हिमाली तथा पहाडी ५६ जिल्ला तथा त्यसको भोलिपल्ट तराईका २१ जिल्लामा होली पर्व मनाउने गरिन्छ । 

विगतमा एक साताअघिदेखि नै लोला हानेर दुःख दिने, जो कसैलाई पनि जर्बजस्ती रंग दल्ने जस्ता उत्श्रृंखल गतिविधि हुने होली पछिल्ला वर्षहरुमा भने सभ्य हुँदै गएको छ ।

फागू पूर्णिमाको दिन होली पर्व मनाइने भए पनि त्यसको एक साताअघि काठमाडौंको बसन्तपुरमा होलीको चीर ठड्याएपछि विधिवत रुपमा होली शुरु भएको मानिन्छ । तर पनि पहाडी तथा हिमाली जिल्लामा एक दिन र त्यसको भोलिपल्ट तराईका जिल्लामा होली मनाउने प्रचलन भए पनि काठमाडौं उपत्यकामा भने एक साताअघिदेखि नै बाटो हिड्ने बटुवा जोकसैलाई पनि लोला हान्ने गरिन्थ्यो । 

अझ विभिन्न पेशा, ब्यवसायमा संलग्न किशोरीहरुलाई यसबाट बढी पीडित हुने गरेका थिए । जसले गर्दा कर्मचारीलाई कार्यालय पुग्न र विद्यार्थीहरुलाई स्कुल कलेज पुग्नै समस्या हुने गरेको थियो । 

होलीको दिन त झन् जोकसैलाई पनि सडकमा हिड्नै मुश्किल पर्ने अवस्था थियो । अपरिचित जोकसैलाई पनि जर्बजस्ती रंग दल्ने, लोला हान्ने, कुहिएका अण्डा टाउकोमा फुटाइदिनेदेखि मादक पदार्थ सेवन गरी झैंझगडा, कपडा च्यात्ने जस्ता उत्श्रृंखल गतिविधि हुने गरेका थिए । अझ सडक, राजमार्गमा जर्बजस्ती गाडी रोकेर पैसा उठाउने जस्ता गतिविधिले पनि हैरानी हुँदा सवारी सञ्चालन गर्न पनि जोखिमपूर्ण हुने गर्दथ्यो । 

पछिल्लो समय भने होली पर्व सभ्य बन्दै गएको छ । होली खेल्न चाहने साथीसँगीहरु मात्रै अथवा परिवार भित्रका ब्यक्तिहरु सौहार्दपूर्ण रुपमा एक आपसमा अबिर लगाएर होली पर्व मनाउने गरिएको छ । होली खेल्न इच्छुक युवा युवतिहरु खुला स्थानमा बसेर एक आपसमा रंग लगाउने र नाँचगान गर्ने प्रचलन बढ्दै गएको छ । सभ्य रुपमा यसरी होली मनाइँदा सामाजिक सद्भाव र सांस्कृतिक महत्व झनै बढेर गएको छ । होलीको दिन कसैको इच्छा विपरित रंग, अबिर दल्ने काम हुने गरेका छैनन् ।  

प्रहरी सुरक्षा र सचेतना बढाइयो 

होलीमा हुने गरेको उत्श्रृंखल गतिविधि रोक्न सुरक्षा निकायले सचेतना कार्यक्रका साथै सुरक्षा बजबुत बनाउने गरेको छ । मादक पदार्थ तथा लागू पदार्थ सेवन गरी सवारी सञ्चालन गर्न नदिने गरी सडकमा चेकजाँचमा कडाइ गर्ने गरिएको छ । 
यो वर्ष पनि होलीपर्वलाई मध्यनजर गरी काठमाडौं उपत्यकाका साथै जिल्ला जिल्लामा सुरक्षा चेकजाँचमा कडाई गरिएको छ । काठमाडौं उपत्यकामा मात्रै विहीबार एक सय २१ स्थानमा जाँचस्थल तोकेर प्रहरी परिचालन गरियो । अबाञ्छित गतिविधि नियन्त्रणमा लिन सादा पोशाकमा समेत प्रहरीहरु परिचालन गरियो । 

सुरक्षित सवारी सञ्चालनका लागि ट्राफिक नियम पालना नगरी सवारी चलाउनेलाई  दिनभरी नै सडकमै होल्ड गरेर राखियो । काठमाडौंमा ६ सय ७१ जना ट्राफिक प्रहरी चेकजाँचमा खटिएका थिए । 

अनुमति लिएरै होली उत्सव, विदेशी पर्यटकहरु उत्साहित    

विभिन्न संघ संस्थाहरुले जिल्ला प्रशासन कार्यालयबाट अनुमति नै लिएर होली उत्सव कार्यक्रमको आयोजना गरेका छन् । सौहार्दपूर्ण रुपमा होली उत्सव मनाउन प्रशासनबाटै अनुमति लिएर विहीबार काठमाडौंका डेढ दर्जन बढी स्थानमा होली खेलिएको छ । 

काठमाडौंको बसन्तपुर, ठमेल, दरबार मार्ग, नयाँ बानेश्वर, कोटेश्वर, मारवाडी सेवा समिति, लगायतका ठाउँमा सामुहिक रुपमा जमघट भएर होली विशेष कार्यक्रमको आयोजना गरियो । 

बसन्तपुर तथा ठमेल क्षेत्रमा आयोजना गरिएको होली विशेष कार्यक्रममा विदेशी पर्यटकहरुको समेत उत्तिकै सहभागिता थियो । हिन्दु धर्मावलम्बीहरुमा मात्रै सीमित नभएको होलीमा विदेशी पर्यटकहरुले पनि आपसमा रंग लगाएर होली उत्सव मनाएका छन् । होलीमा पर्यटकहरुले पनि होली पर्वको रौनकले निकै उत्साहित देखिएका थिए ।