सिन्धुपाल्चोक । परम्परागत पेशाका रुपमा रहेको खोलामा बालुवा चाल्ने, खेतीपाती र घर गृहस्थीमा मात्रै व्यस्त रहने सिन्धुपाल्चोकका माझी सामुदायका महिलाहरू आयआर्जनमा अन्य उपायहरुमा पनि जोडिन थालेका छन् । अहिले उनीहरुलाई न रोजगारीका लागि अन्त भौतारिनु पर्ने, नत लगानी नै गर्नुपर्ने चिन्ता छ ।
उनीहरुले आफैले तयार गरेको गलैंचाबाट बुट्टा अनुसार प्रति गलैंचा १० देखि १२ हजार रुपैयाँसम्म आम्दानी गरिरहेका छन् ।
विगतमा हिउँदभरी खोलामा बालुवा चाल्न व्यस्त हुने सिन्धुपाल्चोकको चौतारा साँगाचोकगढी नगरपालिका–११ भिमटारकी पविना माझी आजभोलि गलैँचा बुन्न व्यस्त छिन् । कुनै समय इन्द्रावती खोेलामा विहानदेखि बेलुकीसम्म बालुवा चाल्दापनि पविनाको परिवारलाई गर्जाे टार्न धौ धौ हुन्थ्यो । तर दुईवर्ष यतादेखि गलैँचा बुन्न थालेपछि जीवनयापनमा निक्कै सहज महसुस भएको उनको अनुभव छ ।
पविना जस्तै यहाँका माझी समुदायमा गलैँचा बुन्ने सीपले परिवारको गर्जो टार्न सजिलो बनाएको छ । पुख्र्यौली पेशा खोलामा माछा मार्ने, बालुवा चाल्ने कामले घरायसी जिम्मेवारी चलाउन र छोरा छोरीलाई पढाउन र आधारभुत आवश्यकता पुरा गरिदिन पनि धौँ धौ हुन्थ्यो । तर गलैंचा बुन्ने सिपले दिएको आम्दानीले अहिले माझी समुदायका महिलालाई जिवनयापनमा सहज भएको छ । खेतीपाती र घरायसी काम सकाएर विहान र बेलुकीको समय दिएर गलैचा बुन्दा महिनामा उनीहरुले कम्तिमा १० हजार रुपैंया कमाई गर्ने गरेका छन् ।
अहिले राजधानी काठमाडौं लगेर बिक्री गर्ने र कच्चापदार्थ पनि सोही ठाउँबाट आउने गरेको छ । ६० घरपरिवारलाई वडा कार्यालयले निशुल्क वितरण गरेको तानबाट गलैचा बुन्ने काम भईरहेको छ ।
२० वर्षको उमेर देखि ५० कटेकाहरुसम्म गलैचा बुन्नमा ब्यस्त हुन्छन् । गलैचा बुन्न महिलाहरुले अहिले पुरुष सदस्यकोे समेत साथ पाउन थालेका छन् । महिलाको सीप विकास र क्षमता अभिवृद्धि गरेरै उनीहरूलाई उद्यमी बन्न प्रेरित गर्न यो वर्ष थप ४० थान तान वितरण गर्ने जनप्रतिनिधि बताउँछन् ।
माझी समुदायका महिलाहरुले गलैचा बुनेर पैसा कमाउन थालेपनि भिमटारका अन्य समुदायका महिलाहरुले पनि गलैचा बुन्न सिकेका छन् । यसले विस्तारै महिलाहरु आर्थिक उन्नति गर्दै आत्मनिर्भर पन बन्न थालेका छन् ।
