रुपन्देही । बुद्ध जन्मस्थल लुम्बिनीमा ५ सय जना श्रामणेरको अल्पकालिन भिक्षु प्रबज्या कार्यक्रम गरिएको छ । मायादेवी मन्दिर परिसरमा ५ सय जनालाई बौद्ध धर्मगुरुहरुबाट पहेंलो चिवर प्रदान गरि प्रवज्यामा सहभागी गराइएको हो ।
लुम्बिनीमा गरिएको अल्पकालिन भिक्षु बनाउने कार्यले बुद्धको शिक्षा र बुद्धधर्मको प्रचारमा सहयोग पुग्ने विश्वास गरिएको छ ।
बुद्ध जन्मस्थल लुम्बिनीमा मंगलबार कुलपुत्र प्रबज्या अर्थात (अल्पकालीन भिक्षु) कार्यक्रम गरिएको छ । अखिल नेपाल भिक्षु महासंघ र थाई भिक्षु महासंघको आयोजना, लुम्बिनी विकास कोषसहितका विभिन्न संस्थाहरूको सहआयोजनामा अल्पकालिन प्रबज्या गराइएको हो ।
संघनायक बोधीसेन महास्थवीर, अखिल नेपाल भिक्षु महासंघ अध्यक्ष महास्थवीर धम्म शोभन, थाई धम्मदुुतका फरा उपाझ्याए पभना सहित बौद्ध धर्म गुरुहरुले अल्पकालीन भिक्षुका लागि चीवर प्रदान गरेका हुन् । प्रबज्या कार्यक्रममा नेपालका लागि थाइल्याण्डका राजदूत सुवापोङ सिरिसोर्नले बुद्ध जन्मस्थल लुम्बिनीमा बुद्धको उपदेशलाई ग्रहण गर्न पाउनु ठूलो अवसर भएको र थाइल्याण्ड सहकार्य गर्न सधै तयार रहेको बताए ।
लुम्बिनी विकास कोषका उपाध्यक्ष डा. ल्हारक्याल लामाले बुद्धजन्मस्थल लुम्बिनीमा बुद्धको शिक्षालाई छोटो अवधिका लागि भएपनि व्यवहारमा लागू गर्ने कार्यक्रम महत्वपूर्ण रहेको बताए ।
उनले बुद्ध दर्शन समुदाय, व्यक्ति विशेष नभई मानव जीवनका लागि भएकाले यसलाई जीवनमा लागू गर्न खोज्ने कार्यमा सहभागी भएकोमा खुशी व्यक्त गरे ।
अखिल नेपाल भिक्षु महासंघका महासचिव भिक्षु निग्रोधले बुद्धजन्मस्थल लुम्बिनीमा बुद्धको शिक्षालाई व्यवहारमा लागू गराउनका लागि भिक्षु, लामा, गुरुहरुको आवश्यकता पर्ने भएकाले लागि प्रबज्या कार्यक्रम राखिएको बताए । उनले बुद्धजन्मभूमि लुम्बिनीमा भएको ५ सय जनाको प्रवज्याले बुद्धको उपदेशलाई विश्वभर फैलाउन समेत सहयोग गर्ने बताए ।
अल्पकालीन भिक्षुहरूले पहेलो चीवर लगाएर बौद्ध धर्मका १० वटा नियमहरू पालना गर्नुपर्नेछ । सामान्य गृहस्थ अनुयायीहरूले पञ्चशील र अष्टशीलको पालना गर्ने भए पनि अल्पकालीन भिक्षुले आगामी चैत ३ गतेसम्म पूर्ण रूपमा बौद्ध नियममा आफूलाई रुपान्तरण गर्नु पर्छ ।
फागुन १४ गतेदेखि शुरु भएको प्रवज्यामा सहभागि श्रामणेरहरुले फागुन १६ गते ललितपुर स्थित अक्षेश्वर महाविहारमा केश मुन्डन गरेका थिए । मंगलबार पहेंलो चीवर लगाउन योग्य भएका श्रामणेरहरुले आफूहरुले पहेलो चिवर ग्रहण गर्न पाउँदा निकै खुशी लागेको बताएका छन् । चिवर प्राप्त गरेका उनीहरुलाई पञ्चशिल, अष्टशिल र विनयपिटकका बारेमा जानकारी दिने र दैनिक ध्यान गराइने आयोजकले जनाएको छ ।
