रुपन्देही । रुपन्देहीमा अपराधका घटना बढिरहेका छन् । देशका विभिन्न क्षेत्रमा भइरहेका अपराध घटनाले नेपाली समाजको मानसिकता र सामाजिक अपराधबाट मानिसहरुले भोगिरहेका समस्या थप डरलाग्दो बन्न थालेको देखिन्छ । किन यस्ता घटना दिनप्रतिदिन बढ्न थालेका छन् त ?
फागुन ८ गते सियारी गाउँपालिका–२, भगदरीस्थित सडक किनारको खेतमा परालले छोपिएको अवस्थामा दाङकी ४० वर्षीया संगीता चौधरीको शव फेला प¥यो । हत्या आरोपमा प्रहरीले एक हप्ता पछि सियारी–२ का ४२ वर्षीया अजय भनेर चिनिने अमिरिका थारुलाई पक्राउ गरेको छ ।
अनुसन्धानका क्रममा मादक पदार्थ सेवन गरेका यी दुईबीच पहिलो भेटमै अमिरिकाले संगीतालाई यौन प्रस्ताव राखेको तर अस्वीकार गर्दा ढुंगाले टाउको थिचेर हत्या गरेको आरोप छ । चौधरीको हत्या भएको ९ दिनपछि फागुन १७ गते जिल्लाको मायादेवी गाउँपालिक–२, डेङ्गचहवाका २९ वर्षीय राकेशसिंह लोधको घरमै हत्या भयो । स्थानीयका अनुसार लोधको टाउकामा चार–पाँच गोली प्रहार भएको छ ।
यो हत्या पनि आफन्तबाटै भएको प्रहरीको दाबी छ । यी प्रतिनिधिमूलक घटना हुन् । पछिल्लो समय रुपन्देहीमा शृङ्खलाबद्ध रुपमा हत्याका घटना भइरहेका छन् । जसले स्थानीयबासीलाई त्रसित बनाएको छ ।
प्रहरीको तथ्यांक अनुसार रुपन्देहीमा चालु आर्थिक वर्षको भदौ यताका साढे ६ महिनामा मात्रै ११ जनाको हत्या भएको छ । मृतकमध्ये ५ जना पुरुष र ६ जना महिला छन् । यी घटनामा संलग्न १२ जना पक्राउ परिसकेका छन् । गत आर्थिक वर्षभरीमा १२ जनाको हत्या भएको थियो । त्यसमा ७ पुरुष र ५ महिला छन् । प्रहरी तथ्यांकले नै पछिल्ला केही महिनायता मासिक दुई जनाको हत्या भएको देखाउँछ । व्यक्ति हत्या बढीरहे पनि प्रहरीले लोध बाहेक अन्य घटनामा संलग्नलाई पक्राउ गरिसकेको छ । तर, निरन्तरका हत्याका घटना बढ्दै जाँदा प्रहरीलाई समेत टाउको दुखाई बनेको छ ।
समाजमा हत्याका घटना बढ्ने कुरालाई समाजशास्त्रीय हिसाबले पनि राज्यले विभिन्न सचेतना कार्यक्रमदेखि अपराध न्यूनिकरणका उपाय अवलम्बन गर्नुपर्नेमा विज्ञको जोड छ ।
रुपन्देहीका भित्री बस्तीसम्म प्रहरी युनिट छन् । तर, हत्यासम्म पुगेका घटनाहरु प्रहरीसमक्ष नआउँदै घटेकाले प्रहरीले सुइको समेत पाउँदैन । पारिवारिक बेमेलले निम्तिएका घटनाहरुमा संलग्न पक्राउ पर्दा कयौं परिवार नै तहसनहस भएका पनि छन् । अर्कातर्फ अपरिचित व्यक्तिसँग सामाजिक संजालमै भएको चिनजान र सामिप्यताका कारण यस्ता घटना बढ्न थालेका छन् ।
