रुपन्देही । भैरहवाको क्रिकेट मैदानको स्थलगत अवलोकनमा पुगेको संसदीय समितिका सदस्यहरुले  मैदान निर्माणको कामलाई अलपत्र पार्न नहुने बताएका छन् । क्रिकेटले पछिल्लो समय राम्रो नतिजा दिइरहेको र मुलुकलाई अन्तर्राष्ट्रिय जगत्मा समेत चिनाइरहेको जनाउँदै उनीहरुले अलपत्र क्रिकेट मैदानलाई बजेट व्यवस्थापन गर्ने प्रतिबद्धता व्यक्त गरेका छन् । 

संघीय संसदको शिक्षा, स्वास्थ्य तथा सूचनाप्रविधि समितिले भैरहवास्थित सिद्धार्थ क्रिकेट मैदान निर्माण सम्पन्न गरी अन्तर्राष्ट्रियस्तरको बनाउन आवश्यक बजेट व्यवस्थापनमा पहल गर्ने प्रतिबद्धता पनि जनाएको छ । 

बहुवर्षीय ठेक्का नहुँदा, युवा तथा खेलकुद मन्त्रालय र राष्ट्रिय खेलकुद परिषद् (राखेप)ले पर्याप्त बजेट नछुट्याउँदा क्रिकेट मैदानलाई अन्तर्राष्टिय स्तरको बनाउन सुरु गरेको डेढ दशकमा बल्ल १६ प्रतिशत हाराहारी काम भएको छ । 

२०६८ मा भैरहवा र मूलपानीमा अन्तर्राष्ट्रिय स्तरको मैदान बनाउन सुरु गरिएको थियो । तर, मूलपानी मैदानले गतिलिँदा भैरहवाको मैदान स्तरोन्नतीकोे काम भने सुस्त छ । राखेपले डीपीआर समेत बनाएको छ । डीपीआर अनुसार त्यतिबेला मैदान बनाउन कम्तिमा ३८ करोड रुपैयाँ लाग्ने बताइएको थियो । तर, पछिल्ला वर्षहरुमा बजेट नै विनियोजन हुन छाडेको छ । यसको लागत बढेर दोब्बर समेत भएको छ । बजेटकै कारण रंगशालाका कामले गति लिन नसकेको जनप्रतिनिधी बताउछन् 

भैरहवाको क्रिकेट मैदानको स्थलगत अवलोकनमा पुगेको संसदीय समितिका सदस्यहरुले वर्षौंसम्म मैदान निर्माणको कामलाई अलपत्र पार्न नहुने धारणा राखे । समितिका सभापति अम्मरबहादुर थापाले भोटको राजनीतिले मात्रै मुलुकको विकास नहुने भन्दै महत्वपूर्ण क्षेत्रको पहिचान गरी आवश्यकताका आधारमा बजेट विनियोजन गर्नुपर्ने बताए । 

आउँदो बजेटमा सिद्धार्थ क्रिकेट मैदानको निर्माण सम्पन्न गर्ने गरी बजेट विनियोजन गर्न खेलकुद मन्त्रालयलाई सुझाव दिने उनले बताए । क्रिकेट संघले गर्नुपर्ने कामबारे प्रतिवेदन दिएको जनाउँदै त्यसलाई कार्यान्वयन गर्न पहल गर्ने आश्वासन थापाले दिएका छन् । निरीक्षणका क्रममा केही जग्गा अधिग्रहण गर्नुपर्ने देखिएको र डीपीआर अनुसार हुनुपर्ने काम बाँकी नै रहेको देखिएको छ । 

अहिलेसम्म ३ करोड लागतमा हल, खेलाडी बस्ने ठाउँ र शौचालय सहितको तीन तल्ले भीआईपी प्याराफिट निर्माण गरिएको छ । यहाँ सुरुमा एक करोड १९ लाख रकम खर्च गरेर क्रिकेट संघको कार्यालयसहित एक तल्लाको प्याभेलियन भवन बनाइएको थियो । 

त्यसपछि मैदान सम्याउन तीनवर्ष लगाइयो । अहिलेसम्म प्याभेलियन भवन सहित ८९ लाखमा मैदान सम्याउने काम, ४० लाखमा तारजाली, ९० लाखमा ढल व्यवस्थापन, १ करोडमा पिच, प्याभेलियन अगाडि टायल बिच्छ्याउने, गार्ड रुम, स्टोर रुम बनाइएको छ । तर, सरकारले बहुवर्षीया योजनामा राखेर रंगशालालाई अन्तर्राष्ट्रियस्तरको बनाउने भने पनि बजेट छुट्याउनै छाडेको छ । 

यो मैदानमा फागुन २५ देखि प्रधानमन्त्री कप राष्ट्रिय पुरुष क्रिकेट समेत हुँदैछ । त्यस अघि संसदीय समितिको स्थलगत अवलोकनले आगामी दिनमा बजेट व्यवस्थापन भई क्रिकेट मैदानले मूर्तरुप पाउने क्रिकेट संघ, स्थानीय तह र खेलप्रेमीको विश्वास छ ।