सर्लाही । सर्लाहीका विभिन्न ठाउँमा विगत केही दिनदेखि जंगली हात्तीले आतंक सिर्जना गरेको छ । पछिल्ला केहीदिनमा मात्रै हात्तीले आधा दर्जनजति घरगोठ भत्काएको छ भने धेरै किसानको बालीनालीमा पनि क्षति पु¥याएको छ । सर्लाहीका हरिवन, बागमती, लालबन्दी, ईश्वरपुर लगायतका ठाउँमा अहिले हात्तीले उपद्रो नै मच्चाएको छ । सर्लाहीको उत्तरी क्षेत्रमा जंगली हात्तीको आतंकले सर्वसाधारण त्रसित भएका छन् ।
केही दिनदेखि लगातार जंगली हात्तीले घर भत्काउने, घरभित्र राखिएको अन्नपात खाइदिने र बालीनाली नष्ट गर्ने गरेको छ । महोत्तरीको गौशालातर्फबाट बाँके खोला पार गरेर सर्लाही प्रवेश गरेका पाँचवटा जङ्गली हात्ती अहिले गाउँलेका लागि तनावको कारण बनेका छन् । हात्तीले सर्लाहीको लालबन्दी नगरपालिका–१७, रानीगन्जका लक्ष्मी प्रसाद गौतमले २ बिग्गा ३ कट्ठामा लगाएको केरा खेतीमा क्षति पुु¥याएको छ भने रानीगन्जककै अर्का किसान बिरेन्द महतोले लगाएको मकै बाली पनि नष्ट गरेको छ ।
सर्लाहीमा किसानहरुले जग्गा भाडामा लिएर समेत केरा, आलू र मकै खेती गरिरहेका छन् । तर हात्तीका हुल आएर बालीनाली नष्ट पारिदिएपछि आफ्नो परिश्रम त के जग्गा भाँडा तिर्न समेत किसानलाई मुस्किल छ ।
जंगली हात्तीहरुले जिल्लाका लालबन्दी, हरिवन, बागमति, ईश्वरपुर लगायतका पालिकाहरूमा पनि क्षति पु¥याइरहेका छन् । यता डिभिजन वन कार्यालय सर्लाही भने हात्तीलाई मानव बस्तीमा पस्नबाट रोक्न आफूहरू लागिरहेकोे बताउँछ ।
हात्तीलाई डार्ट गरेर अन्त लान पनि नसकिँने र धेरै हल्लाखल्ला गरेर भगाउन खोजियो भने हात्ती उल्टै झन् बढी आक्रामक हुने डिभिजन वन कार्यालय सर्लाहीका प्रमुख झाले बताए । सर्लाहीमा हात्तीले मानवीय र भौतिक क्षति नगरोस् भनेर डिभिजन वन कार्यालय सर्लाहीको टोली राति पनि खटीने गरेको छ ।
सरकारले वन्यजन्तुबाट भएको क्षतिको राहत वितरण निर्देशिका २०८० जारी गर्दै बालीको क्षति भएमा मूल्याङ्कनको आधारमा एक मौसममा लगाएको बालीको एकपटक र वर्षमा दुईपटक नबढ्ने गरी बढीमा १० हजार रुपैयाँसम्म किसानले क्षतिपूर्ति पाउने व्यवस्था गरेको छ । जुन पर्याप्त नभएको र लिन पनि निकै असाध्यै झण्झटिलो रहेको किसानहरुको गुनासो छ ।
