कास्की । पोखरा महानगरपालिका २२ पुम्दीकोटमा नेपालकै सबैभन्दा विशाल भगवान शिवको मूर्ति बनेपछि स्वदेशी–विदेशी पर्यटक तथा दर्शनार्थीहरूको निकै ठूलो भिड लाग्ने गरेको छ । कुनै समय नाङ्गो डाँडो भनेर चिनिने पुम्दीकोट अहिले भगवान शिवको पवित्र धामका रूपमा परिणत भएको छ । शिवरात्रीको अवसरमा देशका विभिन्न जिल्लाहरूबाट शिवको दर्शन गर्न धर्मावलम्बीहरू आउने गर्छन् ।
विशाल डाँडाको शिर, आँखै अगाडि टल्किएको सेताम्मे अन्नपूर्ण हिम श्रृङ्खला, डाँडाको फेदमा कञ्चन पानीले भरिएको रमणीय फेवाताल, पुम्दीकोटको शिरमा रहेको ५२ फिट अग्लो विशाल भगवान शिवको मूर्ति । जसका कारण पुम्दीकोट धार्मिक पर्यटकको गन्तव्य स्थलका रूपमा बेग्लै पहिचान बनाएको ।
सामान्य समयमा समेत पर्यटक तथा दर्शनार्थीहरूको भिड रहने यो धाममा शिवरात्रीको पावन अवसरमा भक्तजनहरू घुइँचो नै लागेको छ । शिवरात्रीकै पावन अवसरमा पुम्दीकोट धार्मिक विकास समितिले श्रीमद्भागवत तथा महाशिवरात्री महिमा कथावाचन तथा महायज्ञको आयोजना गरेको छ । कथावाचिका राधिका दासले हरेक दिन शिव महिमाको कथा र भजन वाचन गर्दै आइरहेकी छिन् । एक त त्यसै पनि रमणीय अझ त्यसमाथि महाशिवरात्री पर्व भएकाले पुम्दीकोट पुग्नेहरू महादेवको दर्शन गरेसँगै आनन्दित भएर फर्किन्छन् ।
श्रीमद्भागवत महायज्ञमा भगवान शिवको महिमा सुन्न, दर्शन गर्न र दान गर्न देशभरिका विभिन्न भागबाट दर्शनार्थीहरू पुम्दीकोट पुग्ने गर्छन् । यस्तैमा पर्साको वीरगञ्जबाट पुम्दीकोट आएका व्यवसायी सुरेश रुङ्गटाले पुम्दीकोट क्षेत्रका विकासका लागि भनेर अहिलेसम्म पाँच करोड पाँच लाख रूपैयाँ दान गरिसकेका छन् । धर्मको रक्षा र धार्मिक पर्यटनको विकासका लागि आफूले पुम्दीकोट धार्मिक विकास समितिलाई रकम दान दिएको व्यवसायी रुङ्गटाले बताए ।
पुम्दीकोटमा हाल विशाल शिवसहित विशाल बसाहको मूर्ति, भव्य ठूलो शिवलिङ्ग र २ सय १६ वटा शिवलिङ्ग निर्माण गरिएको छ । महायज्ञबाट उठेको रकमले सिसाको पुल सहित अन्य थप पर्यटकीय संरचनाहरू निर्माण गर्ने धार्मिक विकास समितिको योजना छ ।
शिवरात्रीको दिन दर्शनार्थीको अत्याधिक भिड हुने भएका कारण आयोजकले छिटोभन्दा छिटो पूजा गर्न सकिने तरिकाले थप प्रबन्ध मिलाएको छ ।
शिवरात्रीको अवसरमा पुम्दीकोटमा विशेष पूजा अर्चना सहित शिवलिङ्गमा दूध सहित जल चढाउने गरिन्छ । पुम्दिकोट धार्मिक पर्यटकको गन्तव्य स्थलका रूपमा विशिष्ट पहिचान बनाएको छ, भने हाल आन्तरिक पर्यटकीय स्थलको रूपमा लोकप्रिय बनेको छ ।
