काठमाडौं । नेपाली काँग्रेससँगको गबन्धनबाट सरकारको नेतृत्व गरिरहेका प्रधानमन्त्री केपी शर्मा ओलीमाथि घरीघरी थरीथरीका भ्रष्टाचारको आरोप लाग्दै आएका छन् । सरकारकै नेतृत्व गरिरहँदा ओलीमाथि विपक्षी र जनस्तरबाट समेत विविध भ्रष्टाचारको आरोप लाग्ने गरेको देखिन्छ ।
प्रमुखतः प्रतिपक्षी दलका नेता एवं माओवादी केन्द्रका अध्यक्ष पुष्पकमल दाहाल प्रचण्डले नै ओलीमाथि संसद र सडकबाटै भ्रष्टाचारका गम्भीर आरोप लगाउँदै आएका छन् ।
प्रधानमन्त्री ओली आफ्नो तेस्रो कार्यकालको ७ महिना पूरा गरिरहँदा सत्ता गठबन्धनमाथि संकट आइलाग्नै लागेको विषयबाट मात्रै नभइ सरकारको जग नै भ्रष्टबाट प्रेरित रहेको भन्ने भाष्यले पनि पिरोलिँदै आएका छन् ।
गठबन्धनको संकटमा सत्ता हस्तान्तरणको मिति सुनाएर काँग्रेसलाई फकाए पनि भ्रष्टाचारको आरोपमा भने ओलीले प्रष्टिकरणकै आड लिने गरेका छन् । ओलीमाथि सरकारका कामकारवाही गर्दाबाहेक कहिले स्वीस् बैंकमा अरबौँ रकम राखेको त कहिले कम्बोडियाको टेलिकममा खरबौँ लगानी रहेको आरोप लाग्ने गरेका छन् ।
प्रष्टिकरणको ओइरो !
प्रधानमन्त्री केपी शर्मा ओलीले कम्बोडियाको टेलिकममा अरबौँ रकम लगानी गरेको भन्ने आरोप पूर्वएमाले नेता एवं अभियन्ता दुर्गा प्रसाइँले नै खरो गरी लगाए । यद्यपि पुष्टि हुन नसकेको प्रसाईँको आरोप प्रधानमन्त्री ओलीका लागि भने टाउको दुखाईको विषय बन्न पुग्यो । त्यस्तै ओलीमाथि स्वीस् बैंकमा पनि अरबौँ रकम राखिएको भन्ने आरोप लाग्ने गरेको छ ।
यो अपुष्ट विषयलाई पनि प्रधानमन्त्री ओलीले सँधैजसो प्रष्टिकरण दिँदै आएका छन् । यस्तै सरकार संचालनकै क्रममा पनि भ्रष्टाचार गरेको ओलीमाथि आरोप सँधै लाग्ने गरेको छ । यी आरोपहरुमा ओली सार्वजनिक रुपमै यसरी प्रष्टिकरण दिँदै आएका छन् ।
स्वीस् बैंक तथा कम्बोडियाको टेलिकमा लगानी गरेको भन्ने विषयमा ओलीमाथि आरोप लागेपनि पुष्टि हुने आधार अझैसम्म देखिँदैन । तर पनि यो प्रकरणले ओलीलाई घरीघरी प्रष्टिकरण दिन बाध्य पारिरहेको हो ।
कहिले–कहिले प्रष्टिकरण दिए ओलीले ?
प्रधानमन्त्री ओलीले यी सवालमा धेरैजसो सार्वजनिक कार्यक्रममा प्रष्टिकरण दिँदै आएका छन् । भ्रष्टाचारकै सम्बन्धमा प्रसंग जोडिँदा उनले आफूमाथि लाग्ने गरेका आक्षेपहरुबारे खुलेरै प्रष्टिकरण दिने गरेका छन् । ओलीले गत मंसिर ७ गते काठमाडौं दरबारमार्गमा आयोजित एमालेको जागरणसभामा यसरी प्रष्टिकरण दिएका थिए ।
त्यसयता पनि उनले विभिन्न कार्यक्रमहरुमा यी विषयमा प्रष्टिकरण दिँदै आएका छन् भने आफू भ्रष्टाचार नगर्ने र गर्न पनि नदिने विषयलाई पनि उत्तिकै रुपमा दोहोर्याउँने गरेका छन् ।
आरोपबाटै दिग्दारी महसुस गरिरहेका ओलीले शनिबार काठमाडौंमै आयोजित एक कार्यक्रममा पनि कम्बोडिया र स्वीस बैंकमा रकम राखेको भन्ने आरोपमाथि प्रष्टिकरण दिएका थिए ।
प्रधानमन्त्री ओलीले भ्रष्टाचारको सवालमा सँधैजसो सचेतना र सुशिक्षित गराउने गरेका छन् । संसद, सरकार र अन्य सार्वजानिक कार्यक्रममा पनि ओलीले भ्रष्टाचारलाई आफ्नो शत्रुका रुपमा व्याख्या गर्ने गर्छन् । यद्यपि उनीमाथि नै लाग्दै आएको विविध भ्रष्टाचारको आरोपहरुले भने ओलीलाई कतिपयले शंकाकै रुपमा लिने गरेका छन् । जसकै कारण उनी पटक पटक प्रष्टिकरण दिन बाध्य भइरहेका देखिन्छन् ।
