रुपन्देही । भारतमा मृत्यु भएकी भैरहवाकी विद्यार्थी प्रकृति लम्साललाई न्याय दिनुपर्ने मागसहित भैरहवामा शान्तिपूर्ण विरोध प्रदर्शन गरिएको छ । शुक्रबार सिद्धार्थ संजाल, रुपन्देहीको आह्वानमा ¥यालीसहित प्रदर्शन गरी रुपन्देहीका प्रमुख जिल्ला अधिकारीलाई ज्ञापन पत्र बुझाइएको छ ।
भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्यनरत प्रकृति लम्साल गत आइतबार त्यहाँको होस्टेलमा मृत भेटिएकी थिइन् ।
उनको मृत्यु शंकास्पद भएको भैरहवाबासीको भनाई छ । भैरहवाको देवकोटा चोकमा जम्मा भएका स्थानीय, उद्योगी व्यवसायीहरुले बैंकरोड, मिलनचोक हुँदै जिल्ला प्रशासनसम्म ¥याली निकालेका थिए । उनीहरुले दुई देशबीचको सम्बन्ध प्रगाढ बनाउनु पर्ने तर प्रकृतिलाई न्याय दिनुपर्ने माग गरे । कुनै पनि बहानामा अनुसन्धान प्रभावित हुन नहुने जनाउँदै उनीहरुले त्यसका लागि नेपाल सरकारले पहल गर्नुपर्ने माग गरेका छन् ।
प्रकृतिको न्याय माग्दै जिल्ला प्रशासन पुगेका उनीहरुले विभिन्न मागसहितका प्लेकार्ड बोकेका थिए । ¥यालीसहित जिल्ला प्रशासन कार्यालय पुगेका उनीहरुले प्रमुख जिल्ला अधिकारी बासुदेव घिमिरेलाई ज्ञापन पत्र बुझाउँदै सरकारले प्रकृतिको न्यायका लागि विशेष पहल गर्नुपर्ने माग गरे । घटना घटेको जानकारी पाउँनेवित्तिकै सरकारले पहल गरेको, आरोपी व्यक्ति पक्राउ परिसकेको जनाउँदै स्थानीयको चासो र चिन्ता सकारात्मक भएको प्रमुख जिल्ला अधिकारीको भनाइ छ ।
प्रकृतिलाई उनी अध्ययनरत कलेजका भारतीय युवक अड्विक श्रीवास्तवले मानशिक यातना दिएको र त्यही कारण उनले मृत्युको बाटो रोजेको तर यो विषयमा कलेज प्रशासनले वेवास्ता गरेको भारतीय मिडियाहरुले उल्लेख गरेका छन् ।
श्रीवास्तव अहिले भारतीय प्रहरीको हिरासतमा छन् । प्रकृतिको शव बुधबार राति गृहजिल्ला रुपन्देही ल्याएर अन्त्येष्टि गरिएको थियो । उनी रुपन्देहीको सिद्धार्थनगर नगरपालिका–८, बैंक कोलोनी निबासी हुन् । शान्तिपूर्ण विरोध ¥यालीमा उद्योग व्यापार संगठन, सिद्धार्थ होटल संघ नेपाल, जेसीआई सिद्धार्थ नेपाल, जेसीआई सिद्धार्थ लेडी लगायतका करिब १ दर्जन संघसंस्थाका साथै स्थानीय सहभागि थिए ।
