काठमाडौँ । सम्पत्ति शुद्धीकरणसँग सम्बन्धित वित्तीय अपराधको एउटा पद्धति मनी म्युल हो । अर्थात् वित्तीय अपराध गर्ने व्यक्तिले तपाईलाई थाहा नहुनेगरी अपराधमा संलग्न गराउन सक्छन् । यदि तपाईंको बैंक खाता वा वालेट खातामा अपराधमा संलग्न व्यक्तिको पहुँच छ र उसले प्रयोग गरेको छ भने तपाईलाई वित्तीय अपराधमा साझेदार बनाउन सक्छ ।
के तपाईंले आफ्नो बैंक खाता वा वालेट खाता अन्य व्यक्तिहरुलाई प्रयोग गर्न दिनुभएको छ ? यदि छ भने तपाई मनी म्युल बन्नुभएको हुन सक्छ । तपाईको खाता प्रयोग गरी कसैले तपाईलाई थाहा नदिई अपराधमा संलग्न गरायो भने त्यो अवस्थामा तपाई मनी म्युल बन्नु हुन्छ ।
तपाईंको बैंक खाता प्रयोग गर्नको लागि वित्तीय अपराधमा संलग्न व्यक्तिहरुले तपाईंलाई विभिन्न माध्यमहरु जस्तै, इमेल, फेसबुक म्यासेन्जर, भाइबर, ह्वाट्सएप, टेलिग्राम वा अन्य सामाजिक सञ्जाल तथा फोन वा मोबाइल म्यासेजमार्फत छिटो र आकर्षक आम्दानी हुने प्रस्तावहरु पठाई तपाईंलाई विश्वासमा पारी तपाईंको बैंक खाता वा वालेटको गोप्य विवरण लिने गर्दछन् ।
त्यस्ता व्यक्तिले तपाईंको खातामा आपराधिक कार्यबाट प्राप्त गरेको रकम जम्मा गरी सो रकम नगदमा झिक्ने वा पुनः अन्य खातामा रकमान्तर गर्ने गर्दछन् । र, त्यस्ता व्यक्तिले यो तरिकाबाट तपाईलाई पनि अपराधको साझेदार बनाउन सक्छन् ।
मनी म्युल बन्नबाट जोगिन आफ्नो बैंक खाता वा वालेटको जानकारी कसैलाई दिन हुँदैन । यस्तो गतिविधि सम्पत्ति शुद्धीकरणसँग सम्बन्धित वित्तीय अपराध भएकोले यसमा संलग्न व्यक्तिहरुलाई कानूनी कारबाहीसमेत हुनसक्छ । मनी म्युल अपराध हो । यस्तो अपराध नगरौं र यस्ता कार्यप्रति सचेत रही जिम्मेवार वित्तीय कारोबार अपनाऔं ।
