मकवानपुर । यतिबेला देशका विभिन्न शहरहरुमा राष्ट्रिय उद्योगिक प्रदर्शनी मेलाहरु चलिरहेकोबेला मकवानपुरको हेटौडामा २ दिने मेला आयोजना गरिएको छ ।
आफ्नो स्थानीय तहमा रहेका घरेलु उद्यमीहरुको उत्पादन प्रवद्र्धन तथा प्रदशनी गराउने उद्देश्यले हेटौंडा उपमहानगरपालिका १० नम्बर वडाले दुई दिने मेलाको नै आयोजना गरेको हो । मेलाबाट आफ्ना उत्पादनको बजारीकरणमा सहयोग पुगेको भन्दै उद्यमीहरु खुसी देखिएका छन् ।
मकवानपुरको हेटौंडा उपमहानगरपालिका १० नम्बर वडा कार्यालयको आयोजनामा घरेलु उत्पादन प्रवद्र्धन प्रर्दशनी तथा नृत्य प्रतियोगिता एंव् शैक्षिक मेला आयोजना गरिएको हो । बिशेषगरी नगरमा रहेका घरेलु उद्यमीहरुले उत्पादन गरेका सामाग्रीहरुको बजारीकरणमा सहयोग पुर्याउने तथा संस्कृतिकको संरक्षण गर्दै शैक्षिक विकासमा समेत टेवा पुर्याउने लक्ष्यका साथ यस वडाले दोस्रो संस्करणको यो कार्यक्रम आयोजना गरेको हो ।
हरेक बर्ष एकपटक आयोजना गर्ने अवधारणाका साथ गत वर्षदेखि वडा कार्र्यालयको आयोजनामा मेला शुरु गरिएको हो ।
स्थानीय सरकारको आयोजनामा भएको यो मेलाले आफ्ना उद्यमशीलताको बजारीकरणमा साथ दिएको भन्दै उद्यमीहरु खुसी देखिए । स्टलमा राखिएका सामानबाट बिक्री भएर आम्दानी पनि हुने र यस्ता सामानहरु हेटौंडामै बन्छन् भन्ने कुराको जानकारी गराउन पाइएको स्थानीय उद्यमीहरु बताउँछन् ।
हेटौडा उपमहानगरपालिकाका १९ वटै वडाका उद्यमीहरुको सहभागिता रहेको यो मेलामा बिशेषगरी महिला उद्यमीहरुको सामानले स्टल भरिएका छन् । कतै हातलै बुनेका ऊनका कपडाहरु छन् त कतै गुन्द्रुक, खोस्टाको चकटी, काष्ठकला सामाग्री तथा अचार जस्ता सामाग्रीहरुको स्टल राखिएका छन् । यसरी मेलाको स्टलमा आफ्ना सामाग्री राख्दा बजारीकरणमा सहयोग पुगेको उनीहरुको विश्वास छ ।
अघिल्लो वर्ष पनि यस्तै मेला सम्पन्न गरेको यस वडाले यो कार्यक्रम प्रभावकारी भएको निष्कर्ष निकाल्दै दोस्रो पटक दुईदिने मेलाको आयोजना गरेको हो । स्थानीय तहको घरेलु उत्पादन प्रवद्र्धनमा राज्यको पनि दायित्व छ, भन्ने कुरालाई सार्थकता दिन मेलाको आयोजना गरिएको स्थानीय जनप्रतिनिधि बताउँछन् ।
स्थानीय तहमा उत्पादित वस्तुहरुको प्रवद्र्धनका साथै शैक्षिक विकासमा पनि टेवा पुर्याउने उद्देश्यले आयोजना गरिएको मेलामा स्थानीय जातजातीका भेषभुषा झल्कने र आ–आफ्नो संस्कृतिको संरक्षणमा सहयोग पुरÞ्याउन स्थानिय पर्यटन र खाना महोत्सव तथा कला संस्कृति पहिचान झल्कने गरि नृत्य प्रतियोगिताको समेत आयोजना गरिएको थियो ।
