रुपन्देही । सिद्धबाबा सुरुङमार्गको मुख्य सुरुङ छिचोल्ने काम अर्थात ‘ब्रेक थ्रु’ गरिएको छ । प्रधानमन्त्री केपी शर्मा ओलीले शुक्रबार बालुवाटारबाटै भर्चुअल रुपमा ‘ब्रेक थ्रु’ गरेका हुन् ।
राष्ट्रिय गौरवको आयोजनाको रुपमा निर्माणाधीन यो सुुरूङमार्ग बनेपछि बुटवलबाट पाल्पा, गुल्मी, स्याङ्जा, बागलुङ, पर्वत लगायत लुम्बिनी र गण्डकी प्रदेशका पहाडी जिल्लामा आवतजावत सहज हुने अपेक्षा गरिएको छ ।
सिद्धार्थ राजमार्ग अन्तर्गत बुटवल–पाल्पा खण्डमा निर्माणाधीन सिद्धबाबा सुरुङमार्गको मुख्य टनेलको (शुक्रबार) ब्रेक थ्रु गरिएको छ । पाल्पाको तिनाउ गाउँपालिका ३ दोभान नजिकै आयोजनाको बेस क्याम्पमा औपचारिक समारोहका बीच प्रधानमन्त्री केपी शर्मा ओलीले भर्चुअल माध्यमबाट सम्बोधन गरेपछि ‘ब्रेक थ्रु’ भएको हो ।
‘ब्रेक थ्रु’ कार्यक्रमलाई सम्बोधन गर्दै प्रधानमन्त्री ओलीले सुरुङ बनेपछि पाल्पा, पोखरा लगायत जिल्ला आवतजावत गर्न सुक्षित हुने र कुनै समस्या नआउने बताए । यस्तै उनले अहिलेको गठबन्धन सरकारले सुशासन र विकासमा ध्यान दिएको जिकिर समेत गरे ।
यसअघि सुरुङमार्ग अन्तर्गत १५१ मिटर लम्बाईको पहिलो बाइपास टनेल गएको असोज ४ मा, १३० मिटर लम्बाइको तेस्रो बाइपास टनेल गएको भदौ २६ मा र १६१ मिटरको दोस्रो बाइपास टनेल गएको पुस ७ गते ब्रेक थ्रु गरिएको थियो ।
प्रधानमन्त्रीको सम्बोधनपछि ‘ब्रेक थ्रु’उत्सवका लागि खन्न बाँकी राखिएको १.८ मिटर भागमा प्राविधिकले ब्लास्ट (विष्फोट) गराएर छिचोलेको थियो । दक्षिणतर्फ सिद्धबाबा मन्दिर र उत्तरतर्फ तिनाउ जलविद्युत आयोजनाको हेडबक्सतिर बाट खनिँदै आएको सुरुङ छिचोलिएको छ ।
आयोजनाका अनुसार दुवैतर्फको रिबसहित सुरुङमार्गको कूल लम्बाइ एक हजार १२६ मिटर भएपनि खन्नुपर्ने टनेलको भाग भने एक हजार ८९ मिटर मात्रै हो । मुख्य सुरुङ सिद्धबाबा मन्दिरतर्फ दक्षिणबाट ६१० र तिनाउ जलविद्युतको हेडबक्स तर्फ उत्तरबाट ४७७.२ मिटर खन्ने काम सम्पन्न भएको छ ।
हालसम्म आयोजनाको भौतिक प्रगति ४०.१८ प्रतिशत र वित्तीय प्रगति ३९.९० प्रतिशत भएको छ। सिद्धार्थ राजमार्ग अन्तर्गत पाल्पाको दोभानदेखि सिद्धबाबासम्म अग्लो भीर र चट्टानी पहाड भएकाले सिद्धबाबा सडक खण्डमा बर्खा र हिउँदमा अत्यधिक पहिरो झरिरहन्छ ।
यो खण्डको झण्डै ४ किलोमिटर सडक बर्खा र हिउँद सधैँ पहिरोको उच्च जोखिममा पर्ने गरेको छ । सोही जोखिमलाई मध्यनजर गरी सरकारले राष्ट्रिय गौरवको आयोजनाका रूपमा अघि बढाएको हो । सिद्धबाबा सुरुङ मार्ग आयोजना २०७८ सालमै सुरु भएको हो ।
सुरुङ मार्ग २२ मार्च २०२७ मा सक्नुपर्ने सम्झौतामा उल्लेख छ । अहिले दैनिक डेढ सयदेखि दुई सय जना कामदारले काम गरिरहेक आयोजनाले जनाएको छ ।
सुरुङ खनेर सुरक्षाका लागि गरिने कामका साथै बाटो फराकिलो पार्नेसहित अन्यकाम सुरु भइसकेको छ ।
