काठमाडौं । नेकपा एकता राष्ट्रिय अभियानका संयोजक वामदेव गौतमले गत शुक्रबार प्रधानमन्त्री केपी शर्मा ओलीसँग वालुवाटारमा भेट गरेको खुल्यो । उक्त भेटमा प्रधानमन्त्री ओलीसँग एमाले प्रवेश गर्नेबारे छलफल गरेका वामदेवले आईतबार ओलीकै टेलिफोन ‘रिसिभ्’ गरेका थिए ।
जुन टेलिफोन संवादमा ओलीले चाँडै नै एमालेमा स्वागत गर्ने आश्वशन दिएको स्वयम वामदेवले नै खुलाएका थिए । यसपछि उत्साहित वामदेवले आफूलाई ओलीले एमालेमै बोलाएको भन्दै स्वागतका लागि चाँडै नै मिति, समय र स्थान तय हुने समेत दावी गरेका थिए ।
एमाले प्रवेशको उत्साह बोकेका वामदेव यतिमा मात्रै रोकिएका थिएनन्, उनले विभिन्न समाचार माध्यमहरुलाई अन्तरवार्ता दिँदै आफू दुई वर्षदेखि नै एमाले फर्कन खोजेको उल्लेख गरेका थिए । वामदेवले मिडियाहरुमा ओलीले दुई ‘मुटु एक धड्कन भएर काम गरौँ’ भनेकोदेखि बाँकी जीवनभरका लागि एमाले प्रवेश गर्न लागेकोसमेत भन्न भ्याए । तर एमालेमा वामदेवको स्वागत हुनेबारे जति चर्चा गरियो ।
त्यतिका रुपमा एमालेले उनलाई स्वागत गर्ने वातावरण भने अझै सृजना गरेको छैन । अझ भनौँ वामदेवलाई स्वागत गर्न एमाले अझै तयार भएको देखिँदैन । जसका कारण वामदेवको एमाले प्रवेश गर्ने धोका पूरा हुने संभावना अझै न्यून छ ।
आन्तरिक विमत्तिले एमाले बाहिरै वामदेव !
प्रधानमन्त्री समेत रहेका एमाले अध्यक्ष केपी शर्मा ओलीले वामदेवलाई भित्र्याउन भरपुर कसरत भने गरेकै हुन् । तर पार्टीमा कुन पद र कुन भूमिका दिने भन्ने विषयमा एमालेमै विवाद सृजना भएको छ । तत्कालीन नेकपा हुँदा उपाध्यक्ष समेत बनाइएका वामदेवले अहिले सम्मानजन जिम्मेवारी दिन आग्रह गरिरहेका छन् ।
यही अनुरुप एमालेको मंगलबार बसेको सचिवालय बैठकमा वामदेवसँग सहकार्य गर्ने र उनलाई पार्टीमा ल्याउनेबारे नेताहरुबीच सहमति जुटेको थियो । यद्यपि उनले पाउने पदको विषयमा भने निर्णय हुन सकेको छैन । जसकै कारण वामदेव एमाले प्रवेश गर्ने संभावना बाँकी नै रहेपनि तत्काललाई उनको लागि ढोका भने बन्द भएको छ । हुनत एमालेले पार्टी छोडेका नेताहरुलाई पुनः फर्काउन पहल गर्ने आधिकारिक निर्णय पनि गरेको थियो । यद्यपि वामदेवलाई स्थान दिनेबारेमा भने नेताहरुबीच नै विमत्ति सृजना भइरको छन् ।
उता वामदेवलाई भित्र्याउन पार्टीको विधान नै संशोधन गर्ने तयारीसमेत गरिएको थियो । तर यो विषयमा नेताहरु सहमत देखिएका छैनन् ।
एमालेमा दोस्रो वरियता माग गरेका वामदेवलाई पार्टी भित्र्याउन वरिष्ठ उपाध्यक्ष पद दुईवटा बनाउनुपर्ने वा हालको वरिष्ठ उपाध्यक्ष ईश्वर पोखरेललाई हटाउनुपर्ने बाध्याता हुन्छ । तर ओली वामदेवलाई अटाउनकै लागि यो विकल्पमा गएर जोखिम मोल्ने मनशायमा देखिँदैनन् । वामदेव भित्र्याउने विषयमा ईश्वर पोखरेलले नै पनि विमत्ति राखेको बताइएको छ ।
त्यसो त उनी बाहेक अन्य नेताहरुले पनि वामदेवको एमाले प्रवेश गर्ने तयारीको विरोध जनाइरहेका छन् । बिहीबार रुपन्देही पुगेका एमाले उपमहासचिव पृथ्वीसुब्बा गुरुङले पनि वामदेवसँग पार्टी एकता गर्नुपर्ने कुनै आवश्यकता नरहेको टिप्पणी गरेका थिए ।
यता न उता वामदेव !
एमाले प्रवेश गर्ने चर्चा अघि वामदेव नेकपा एकीकृत समाजवादी प्रवेश गर्ने तयारीमा थिए । यसको अन्तिम तयारीमा रहेका वामदेवले एमालेसँग पनि संवाद बढाए । तर यहीबीचमा ओलीको संवादमा आएका वामदेवले एमालेमै प्रवेश गर्ने अठोट गरे । त्यसपछि नेकपा एसमा पदकै विषयमा झमेला भएको र आफूलाई शंकाको रुपमा लिइएको पनि वमदेवले आरोप लगाएका थिए । यद्यपि उता नेकपा एस भने वामदेवलाई पार्टी भित्र्याउने प्रयासमै देखिन्थ्यो ।
तर वामदेवले एमालेमै जाने तीव्र इच्छा देखाएपछि नेकपा एसले खासै चासो देखाएन । वामदेव एमालेमै प्रवेश गर्ने निर्णयमा पुगेपछि उनी नेतृत्वको नेकपा एकता राष्ट्रिय अभियानका वहुमत नेताहरु माओवादी केन्द्रमा प्रवेश गर्ने घोषणा गरे ।
यसपछि एक्लै भएका वामदेवप्रति एमाले नेताहरुले खासै आकर्षण देखेका छैनन् । हुनत राष्ट्रियसभा सदस्यसमेत रहेका वामदेवलाई कुनै पनि दलले भित्र्याएमा उक्त दलका लागि राष्ट्रिसभामा एक सांसद पनि थपिनेछन । तर पद बार्गेनिङ र अस्थिर चरित्रले वामदेव फेरि यता न उत्ताको स्थितिमा पुगेका छन् ।
