झापा । झापासहित कोशी प्रदेशका तीन जिल्लाहरुमा अपाङ्गता भएका व्यक्तिको पहिचान कार्य सम्पन्न गरिएको छ । कोशी प्रदेश सरकारको सामाजिक विकास मन्त्रालय, करुणा फाउण्डेसन र स्थानीय तहको सहकार्यमा झापा, तेह्रथुम र ताप्लेजुङ जिल्लामा अपाङ्गता भएका व्यक्तिहरुको पहिचान गरिएको हो । वडास्तरीय शिविर सञ्चालन गरि स्वास्थ्य परीक्षण, अपाङ्गता पहिचान र परिचयपत्र वितरण गरिएको हो ।
झापासहित कोशी प्रदेशका तीन जिल्लाहरुमा अपाङ्गता भएका व्यक्तिको पहिचान गरि परिचयपत्र समेत वितरण गरिएको छ ।
यि तीन जिल्लाका दुई सय ३४ वटा वडामा गत मंसिर र पुस महिनामा अपाङ्गता पहिचान कार्यलाई अभियानकै रुपमा सञ्चालन गरिएको थियो । यसक्रममा स्वास्थ्य शिविरमा १८ हजार एक सय ३४ जना अपाङ्गता भएका व्यक्तिहरू सहभागी भएका थिए । जसमध्ये १३ हजार ६५ जनाको अपाङ्गता पहिचान भएको दातृ निकाय करुण फाउन्डेशनले जनाएको छ ।
अपाङ्गता पहिचान भएका व्यक्तिहरूमध्ये बालबालिका दुई हजार एक सय १४ जना र वयस्क १० हजार नौ सय ५१ जना छन् । शिविरमा विशेषज्ञ चिकित्सक सहितको टोलीले अपाङ्गता भएका व्यक्तिहरूको स्वास्थ्य परीक्षण गरी कुन प्रकारको अपाङ्गता भएको भन्ने विषयमा तत्कालै पहिचान समेत गरेको थियो ।
अपाङ्गता पहिचान भएकाहरूलाई शिविरमै स्थानीय तहहरूले अपाङ्गताको परिचयपत्र प्रदान गरेका छन् । यस किसिमका कार्यक्रमले अपाङ्गता भएकाहरुलाई राज्यले प्रदान गर्ने सेवा लिन थप सहज भएको अपाङ्गताको क्षेत्रमा लागि परिरहेकाहरु बताउँछन् ।अपाङ्गता भएकाहरु अरुको साहारामा बाच्नुपर्ने बाध्यता छ । राज्य थपउ त्तरदायी भएर लाग्नुपर्ने उनीहरुको भनाइ छ ।
अपाङ्ग लक्षित अभियानमा तीन जिल्लामा चार हजार आठ सय ३० जनाले शिविरबाटै नयाँ अपाङ्गता परिचयपत्र प्राप्त गरेका थिए । जसमा सबैभन्दा बढी झापाका तीन हजार ३० जनाले परिचयपत्र पाएका छन् । शिविरमा पहिचान भएका चार सय १८ जना व्यक्ति नयाँ अपाङ्गता परिचयपत्र प्राप्त गर्ने प्रक्रियामा रहेका छन् ।
जसमध्ये झापाका दुई सय ९८ जना छन् । कोशी प्रदेशका एक सय सातवटा पालिकामा अपाङ्गता भएका व्यक्तिहरूका लागि पहिचान, रोकथाम र पुनःस्थापना कार्यक्रम सञ्चालन गरिरहेको छ । कार्यक्रममा फाउन्डेशन, स्थानीय पालिका र कोशी प्रदेश सरकारले त्रिपक्षीय समझदारी अनुरूप लागत साझेदारी गरेका छन् । समझदारी अनुसार तीनवर्षसम्म संयुक्त कार्यक्रम सञ्चालन हुने स्थानीय जनप्रतिनिधि बताउँछन् ।
त्यस्तै पहिलो चरणमा पहिचानका लागि स्वास्थ्य शिविर सम्पन्न गरिएको छ भने निकट भविष्यमा घरमाआधारित शिक्षा र विद्यालयभर्ना कार्यक्रम सञ्चालनगरिने कोशी प्रदेश सरकारले जनाएको छ । स्वास्थ्य शिविरबाट अपाङ्गता पहिचान भएकाहरूलाई सहायक सामग्री समेत वितरण गरिएको जनाउँदै आगामी दिनमा अपाङ्गता भएका व्यक्तिहरूको जीविकोपार्जन, सशक्तीकरण, सिप विकास र सामाजिकीकरणका लागि समूह बनाएर बीऊ पुँजी उपलब्ध गराइने कोशी प्रदेश सरकारका खानेपानी उर्जा तथा जलस्रोत मन्त्री एकराज कार्की बताए ।
अपांगता भएका व्यक्तिहरुका लागि यस किसिमका कार्यक्रमले राहत महशुस त गराएको छ तर, यतिमात्रै पर्याप्त भने होइन । राज्यले यसतर्फ ध्यान दिन आवश्यक छ ।
