काठमाडाैँ । नेपाल विद्युत प्राधिकरणका कार्यकारी निर्देशक कुलमान घिसिङले विद्युतीय सवारी साधन प्रोमोसन गर्नका लागि देशभर चार्जिङ स्टेशन बढाउनुपर्ने बताएका छन् । बिहीवार स्वतन्त्र ऊर्जा उत्पादकहरुको संस्था, नेपाल (इप्पान) को २५ वर्ष पुगेको अवसरमा आयोजित इप्पान इभी -यालीमा सहभागी हुँदै घिसिङले उक्त कुरा बताए ।
नेपालमा पछिल्लो समय विद्युतीय सवारी साधनको प्रयोग बढेको भन्दै घिसिङले निजी सवारी साधन मात्रै नभएर अहिले देशभर जाने यात्रुवाहक सवारी समेत विद्युतीय सवारी साधनमा परिणत भइरहेको बताए । उनले यात्रुवाहक सवारी साधन समेत विद्युतीय हुने क्रम बढ्दै जानु भनेको ठूलो परिवर्तन भएको बताए ।
पछिल्लो समय ७० प्रतिशत विद्युतीय सवारी साधनको खरिद-विक्री भएको बताउँदै घिसिङले विद्युतीय सवारी साधनको प्रोमोशन विद्युतीय सवारी साधन किनेर मात्रै नहुने बताए । उनले देशभर विद्युतीय सवारी साधनका लागि आवश्यक संरचनाहरु बनाउन जरुरी रहेको बताए । विद्युतीय चार्जिङ स्टेशनहरु मुलुकभर बनाउन जरुरी रहेको उनकाे भनाइ छ ।
घिसिङले भने, ‘इलेक्ट्रिकल भेकलमा ट्रान्सपोटेसन भएको छ । यो ठूलो परिवर्तन हो । पछिल्लो समय विद्युतीय सवारी साधनमा नेपालभर वृद्धि भएको छ । विद्युतको माग बढाउने अभियान हो । अभियानलाई ठूलो सहयोग पुगेको छ । ७० प्रतिशत विद्युतीय सवारी साधनको खरिद विक्री भएको छ । विद्युतीय सवारी साधनको प्रामोसन विद्युतीय सवारी साधन किनेर मात्रै पनि हुँदैन । देशभर विद्युतीय सवारी साधनको लागि आवश्यक संरचनाहरु बनाउन जरुरी छ । जसमा विद्युतीय चार्जिङ स्टेशनहरु बनाउन जरुरी छ । निजी क्षेत्रले ठूलो सहुलियतसहित प्रोत्साहन गरेका छौं । अहिले ६ सय बढी चार्जिङ स्टेशनहरु निजी क्षेत्रले मात्रै बनाएको छ । अझै देशभर बनाउन आवश्यक छ । अहिले निजी क्षेत्रबाट ५ सय चार्जिङ स्टेशनहरुको लागि आवदेन आएको छ । यसले रोजगारी पनि सिर्जना गरेको छ ।’
स्वतन्त्र ऊर्जा उत्पादकहरुको संस्था, नेपाल (इप्पान) का अध्यक्ष गणेश कार्कीले नेपालमा उत्पादित विद्युतलाई मुलुकभित्रै खपत गर्न आवश्यक रहेको बताए । उनले विद्युत उत्पादन वृद्धि भइरहेको भन्दै मुलुकभित्रै खपत बढाउन जरुरी रहेको र सबैले विद्युतीय सवारी साधन चढ्ने वातावरण बनाउनुपर्नेमा जोड दिए ।
उनले विद्युतीय सामग्रीहरुको प्रयोग बढाउनुपर्नेमा समेत उनले जोड दिए ।
