काठमाडौं । सत्ताबाट प्रतिपक्षमा हुत्तिएपछि माओवादी केन्द्र जनतामा जाने र संगठन निर्माणमा लाग्ने दावी गर्दै आएको छ । सोही अनुरुप प्रचण्ड तत्काल सत्ताको गठजोडमा नलाग्ने सार्वजनिक अभिव्यक्ति दिँदै आएका छन् ।
काँग्रेस एमालेले सत्ता समीकरण गरेपछि ३२ सिटको माओवादी केन्द्र प्रमुख प्रतिपक्षी दलको भूमिकामै छ । यो अवस्थामा सत्ताको प्रमुख खबरदारीकर्ता माओवादी नै हो । तर माओवादीले सुरुको प्रतिबद्धताविपरित सत्ताप्रतिको लालच देखाउन भने छाडेको छैन ।
काँग्रेस एमालेले सरकार निर्माण गरेको करिब ६ महिनामात्रै पुग्दैछ । यहीबीचमा सरकारको खैरो खन्दै आएको माओवादीले अब भने वैकल्पिक सरकारको गठजोडतर्फ लागेको संकेतहरु पनि दिन थालेको छ । यो अवस्थामा पहिलो कदमका रुपमा माओवादी अध्यक्ष एवं प्रमुख प्रतिपक्षी दलका नेता पुष्पकमल दाहाल प्रचण्ड समाजवादी मोर्चालाई पुनः सक्रिय बनाउने र सरकारको आयू निर्धारण गर्ने रणनीतिमा छन् ।
शुक्रबार मात्रै प्रचण्डले समाजवादी मोर्चामा आवद्ध दलका नेताहरुसँग सिंहदरबारमा छलफल गरेका छन् । उक्त छलफलमा प्रचण्डसहित नेकपा एकीकृत समाजवादीका अध्यक्ष माधव नेपाल, अशोक राई नेतृत्वको जसपा लगायतका नेताहरु पनि सहभागी भएका थिए । जसमा संविधान संशोधनको विषय र समाजवादी मोर्चालाई सक्रिय बनाउने विषयमा छलफल भएको दावी गरिएको छ । तर बैठक पछि बाहिरिएका नेकपा एसका अध्यक्ष माधव कुमार नेपालले भने संविधान संशोधनको विषयमा प्रधानमन्त्री केपी शर्मा ओलीले दिएको अभिव्यक्तिप्रति आशंका व्यक्त गरेका छन् ।
प्रधानमन्त्री ओलीले केही दिन अघि मात्रै पार्टीको कार्यक्रममा तत्काल संविधान संशोधन गर्न नसकिने बताएका थिए । यसपछि सत्ता गठबन्धनमा समस्या पैदा हुनसक्ने आशंकासहित विपक्षी दलहरु एकठाउँ भएका छन् । यसरी हेर्दा प्रतिपक्षी दलहरु एकजुट भएर सरकारविरुद्ध घेराबन्दी गर्ने रणनीतिमा देखिन्छन् ।
यसै प्रयोजनका लागि प्रचण्डले समाजवादी मोर्चालाई पनि सक्रिय बनाउने र वैकल्पिक सरकार निर्माणको वातावरण सृजन गर्ने प्रयास थालेको देखिन्छ ।
शुक्रबार समाजवादी मोर्चाको बैठक भनिएपनि उक्त बैठकमा हाल मोर्चाको नेतृत्व गरिरहेका नेकपाका महासचिव नेत्रविक्रम चन्द्र ‘विप्लव’ भने उपस्थित थिएनन् । बरु राप्रपा अध्यक्ष राजेन्द्र लिङ्देनले भने प्रचण्ड र माधव नेपालसँग पनि भेटवार्ता गरेका थिए । यस कारणले पनि प्रतिपक्षी दलहरुले वैकल्पिक सरकारको कसरत गरिरहेका त हैनन् ? भन्ने शंक गर्ने ठाउँ राखेको छ ।
हौसिएका प्रचण्ड !
सत्ता तलमाथि पार्न आफ्नो भूमिका नरहने सार्वजनिक अभिव्यक्ति दिँदै आएका प्रचण्डले खुला रुपमा सरकार ढाल्ले संकेत भने गरेका छैनन् । तर सत्ता लामो समयसम्म टिक्नेमा भने उनको आशंका कायमै छ । केही महिना अघि वर्तमान सरकार तलमाथि भए सत्ता आफूहरुकै हातमा आउने अभिव्यक्ति दिएका प्रचण्ड काँग्रेस – एमालेमा संविधान संशोधनको विषयले विवाद ल्याएपछि अझ सक्रिय भएका छन् ।
यसअघि देशभर पार्टीको अभियान चलाएका प्रचण्डले सरकार ढाल्ने अभिव्यक्ति नदिएपनि वर्तमान सत्ता समीकरणमाथि संगीन आरोपहरु भने लगाएका थिए । सुदुरपश्चिमको कञ्चनपुरमा पुग्दा होस् वा सुदुरपूर्व झापा पुग्दा ओली नेतृत्वको सरकारमाथि उनी आगो ओकल्दै आएका छन् ।
सरकारको नेतृत्वमा रहँदा ‘सत्ता व्याकप’का रुपमा समाजवादी मोर्चा गठन गरेका प्रचण्डले सरकारबाट बाहिरिएपछि मोर्चाप्रति खासै चासो राखेका थिएनन् । तर अहिले सत्ता गठबन्धनमा खटपटको संकेत देखिएलगत्तै मोर्चा सक्रिय पार्नु र राप्रपासहितका दलहरुसँग पनि तिव्र छलफल गर्नु प्रचण्डले सत्ता परिवर्तन र वैकल्पिक सरकार निर्माणको कसरत थालेको रुपमा व्याख्या गरिन थालिएको छ ।
