पर्सा । राष्ट्रिय आविष्कार केन्द्रले वीरगञ्जस्थित नारायणी अस्पतालमा थन्किएको स्वास्थ्य उपकरणहरुको मर्मत गरेको छ । लामो समयदेखि अस्पतालमा प्रयोगबिहीन अवस्थामा रहेका ६० वटा स्वास्थ्य उपकरणहरुको मर्मत गरिएको हो ।
अस्पतालमा मर्मत कार्य सम्पन्न भएपछि स्वास्थयकर्मीलाई विरामीहरुको उपचारमा सहज भएको छ भने अस्पतालको करोडौँ रुपैयाँको बचत भएको छ ।
संघीय सरकारको मातहतमा रहेको वीरगञ्जस्थित नारायणी अस्पतालमा बिग्रिएका उपकराणहरुको समयमै मर्मत नहुँदा विरामीको उपचारमा कठीनाई हुने गरेको छ भने गरिब तथा विपन्न परिवारका विरामीहरुलाई मंहगो शूल्कमा उपचारका लागी निजी अस्पताल जानु पर्ने बाध्यता रहेको छ ।
यता, उपकरण मर्मतका लागि अस्पताल प्रशासनले राष्ट्रिय आविष्कार केन्द्रसँग गत पुस ११ गते लिखित सम्झौता गरेको थियो ।
सम्झौतामा मेडिकल सुपरिटेन्डेन्ट डा. चुमनलाल दास र केन्द्रका तर्फबाट बायो मेडिकल इन्जिनियर उमेश किराँतले सम्झौतामा हस्ताक्षर गरेका थिए ।
सम्झौता अनुसार, बिग्रेका करिब ४ करोड रुपैयाँभन्दा बढी मूल्यका उपकरणहरूलाई सञ्चालनमा ल्याउने जिम्मा केन्द्रले लिएको छ । ६० वटा मध्य ३२ वटा पूर्ण रुपमा र २८ वटा आंशिक रुपमा मर्मत अस्पताल विकास समितिले जनाएको छ ।
मर्मतको क्रममा आवश्यक पार्टपूर्जा र मर्मत गरेबापत एकमुष्ट रकम उनीहरुलाई प्रदान गर्ने सहमति भएको जनाइएको छ ।
अस्पतालका अनुसार प्रत्येक महिना राष्ट्रिय आविष्कार केन्द्रको ३ देखि ५ जनाको टोली आएर मेसिनहरुको मर्मत गर्नेछ ।
गत भदौँ महिनामा स्वास्थ्य तथा जनसङ्ख्या मन्त्रालय र राष्ट्रिय आविष्कार केन्द्रबीच संघीय सरकार मातहतका १७ अस्पतालमा रहेका उपकरणको मर्मत सम्भार र व्यवस्थापन गर्ने लगायतका विषयमा सहकार्य गर्ने सम्झौता भएको थियो ।
सोही अनुसार केन्द्रले संघ सरकारको मातहतमा रहेका विभिन्न अस्पतालहरुको स्वास्थ्य उपकरणहरुको मर्मत गर्दै आएको छ ।
