रुपन्देही । लुम्बिनी प्रादेशिक अस्पतालमा एमआरआई मेसिनसमेत नहुँदा सेवाग्राहीलाई महंगो शुल्क तिरेर निजि मेडिकलमा जानुपर्ने बाध्यता छ । 

सरकारले लक्षित वर्गलाई स्वास्थ्य विमा अन्तरगत निःशुल्क उपचार गर्ने व्यवस्था भएपनि एमआरआई मेशिन नहुँदा सेवाबाट बन्चित बन्नुपरेको छ । प्रत्येक वर्ष एमआरआई मेसिन खरिदका लागि बजेट राख्दा समेत निजि मेडिकल व्यवसायीको चलखेलले मेसिन खरिद हुन सकेको छैन ।

लुम्बिनी प्रादेशिक अस्पताल पश्चिम नेपालमै सबै भन्दा धेरै विरामीको चाप भएको अस्पतालको रुपमा लिने गरिन्छ । 

विशेषज्ञ सेवादेखि सामान्य उपचार गराउन गुल्मी, अर्घाखाँची, पाल्पा, स्याङ्गजा, प्युठान, रोल्पा, रुकुमदेखि बाग्लुङ्ग सम्मका विरामीहरु लुम्बिनी प्रादेशिक आउने गरेका छन् । 

विरामीहरुको स्वास्थ्य अवस्था हेरि एमआरई गराउनु पर्ने हुन्छ । लुम्बिनी प्रादेशिक अस्पतालमा एमआरआई मेसिन नभएपछि विरामीलाई बाहिर रिफर गर्नुपर्ने बाध्यता छ । 

बुटवलमा नै एआरआई मेसिन नहुँदा भैरहवादेखि भारतको गोरखपुर पुग्नुपर्ने बाध्यता थियो । अहिले एमआरआई गर्ने एउटा निजी संस्था हुँदा त्यो बाध्यता भने हटेको छ । 

अस्पताल प्रशासनका अनुसार दैनिक दर्जन बढि बिरामीलाई एमआरआई गर्नुपर्ने खालका आउने गरेका छन् । विशेषगरी नसाको रोगमा एमआरआई गर्नुपर्ने हुन्छ । त्यसबाहेक पनि पेटको समस्या, ब्रेन ट्युमर, मासुमा ट्युमर पलाएको अवस्थामा समेत एमआरआई गर्नुपर्ने हुन्छ । त्यसैले विभिन्न पक्षले दबाब बढाइरहेका छन् ।  
 
लुम्बिनी प्रादेशिक अस्पतालमा एमआरआई सेवा सञ्चालन गर्नका लागि प्रदेश सरकार तथा अस्पताल प्रशासनले विगत ४ वर्षदेखि निरन्तर प्रयास गरे पनि सफलता हासिल हुन सकेको छैन ।  

बर्सेनि लाखौंको उपचार सेवा दिँदै आएको लुम्बिनी प्रदेशिक अस्पताल बुटवलमा आन्तरिक र बाह्य चलखेलका कारण एमआरआई मेसिन खरिद गर्न ढिलाइ भएको हो । 

पछिल्लो समय प्रादेशिक अस्पतालले तेस्रो पटक गरेको खरिद प्रक्रिया पनि अन्योलमा परेको छ । दुई पटकसम्म एमआरआई खरिद प्रक्रियामा सप्लायर कम्पनीले मुद्दा दायर गरेपछि रोकिएको थियो । 

ती मुद्दामा एमआरआई मेसिन खरिद गर्न मिल्ने आदेश आएपछि गत कार्तिक १ गते बोलपत्र आह्वान गरिएको छ । तर पनि मेसिन खरिद प्रक्रिया अघि बढ्न सकेको छैन । अहिले प्रदेश सरकारले छुट्टाएको १५ करोड बजेटभित्र रहेर १.५ टी एमआरआई मेसिन खरिदका लागि प्रक्रिया अगाडि बढाइएको लुम्बिनी प्रादेशिक अस्पतालले जनाएको छ । 

गत आर्थिक वर्षमा पनि एमआरआई मेसिन खरिदकै लागि लुम्बिनी प्रदेश सरकराले १६ करोड बजेट छुट्याएको थियो । यो अस्पतालको बेड संख्यासमेत ५ सयबाट बढाएर १२ सय पु¥याउने योजनाका साथ हाल १२ तलाको अत्याधुनिक भवन निर्माण कार्य पनि जारी रहेको छ । जसले गर्दा बिरामीको संख्या अझ वृद्धि हुने निश्चित छ ।