रुपन्देही । तिलत्तोमा नगरपालिकाका मेयर रामकृष्ण खाँणले तलब रअन्य पारिश्रमिकबाट आउने रकम विद्यालयमा छात्रवृत्तिमा प्रयोग गर्दा धेरै विद्यार्थी लाभाम्वित भएका छन् । स्थानीय तहको प्रमुखले गरेको यस्तो कामले विद्यार्थीको मनोबल वृद्धि हुने विश्वास गरिएको छ । 

रुपन्देहीको तिलोत्तमा नगरपालीकाका १ सय ४६ विद्यार्थीले छात्रवृत्ति पाएका छन् । उनीहरुले छात्रवृत्ति अन्तर्गत सोमबार नगर प्रमुख रामकृष्ण खांणले वर्षभरि पाउने तलब र अन्य पारिश्रमिक रकम ७ लाख ३० हजारबाट जनही ५ हजारका दरले पैसा पाएका हुन् । 

उक्त छात्रवृत्ति नगरभित्रका ४२ वटा सामुदायिक विद्यालयमा अध्ययनरत जेहेनदार तथा विपन्न विद्यार्थीलाई प्रदान गरिएको हो । नगर प्रमुख खाणले आफू निर्वाचित भएको वर्षदेखि नै आफूले पाउने पारिश्रमिक वापतको रकम छात्रवृत्ति वितरण गर्दै आएका छन् । 

नगर प्रमुखले वितरण गरेकोछात्रवृत्तिले पढ्न ईच्छा भएर पनि बीचमै पढाई रोक्नुपर्ने बाध्यता आउन सक्ने विद्यार्थीले भविष्य बनाउन पाउने भएकाले यो अवसर प्रदान गरेको बताइएको छ ।

छात्रवृत्तिसंगै पालिकाले कक्षा ८, १० र कक्षा १२ को नतिजामा उत्कृष्ट नतिजा ल्याएका १२ विद्यालयका  १९ जना  विद्यार्थीलाई पनि सम्मान समेत गरेको छ । प्रति विद्यार्थी ६ हजारका दरले एक लाख १४ हजार रुपैया र प्रशंसाप पत्रसहित विद्यार्थी र विद्यालयलाई सम्मान गरिएको हो । तिलोत्तमाले विद्यार्थीहरुलाई दिवा खाजामा नेपाल सरकारले दिने गरेको १५ रुपैयामा दश रुपैया थप गरि २५ रुपैयाको दिवा खाजा दिदै आएको छ ।

अन्य पालिकामा कक्षा ५ सम्मकालाई मात्रै दिवा खाजा दिने गरेकोमा तिलोत्तमा कक्षा ६ सम्मका विद्यार्थीहरुलाई दिवा खाजा दिने गरिएको छ । शिक्षालाई पहिलो प्राथमिकता दिएर काम गर्ने गरेको तिलोत्तमा नगरपालिकाले जनाएको छ ।