बारा । गढीमाई मेलामा करिव १ करोड भक्तजन तथा दर्शनार्थिहरुको सहभागिता आंकलन गरिएको छ । ठूलो संख्यामा मानिस जम्मा हुँदा महिला तथा बालबालिकाहरु अलपत्र पर्न सक्ने भन्दै बाराको महागढीमाई नगरपालिकाले विभिन्न संघसंस्थाको सहयोगमा पारिवारिक पुनर्मिलन गराउने कार्य गर्दैछ ।
संघीय महिला तथा बालबालिका मन्त्रालयको वेवास्ता पछि महागढीमाई नगरपालिकाले केही संघ संस्थाको सहयोगमा खोज तलास शिविर संचालन गरेको छ ।
प्रत्येक पाँच वर्षमा १ पटक लाग्ने महागढीमाई मेला बाराको बरियारपुरमा जारी छ । बलिकै कारण विश्वमा चर्चित यो मेलामा करिब ७५ प्रतिशत भारतीय दर्शनार्थी हुने गर्दछन् ।
करिव १ महिनासम्म चल्ने गढीमाई मेलाको अवलोकन, माताको दर्शनका साथै व्यापार गर्ने उदेश्यले पनि लाखौँको संख्यामा भक्तजन तथा दर्शनार्थीहरु आउने गर्छन ।
यतीबेला सयौँको संख्यामा खटेका सुरक्षाकर्मी तथा स्वयमसेवकहरुलाई मेलाको भिडलाई व्यवस्थापन गर्न हम्मेहम्मे परेको छ । मेलामा महिला, बालबालिका तथा जेष्ठ नागरिकहरु हराउने गर्छन् ।
यसकारण उनीहरुलाई पारिवारिक पुनर्मिलन गराउन शिविरको आयोजना गरिएको छ । मेलामा हराउनेको खोजीका लागि संघीय सरकार अन्तर्गत पर्ने महिला, बालबालिका तथा जेष्ठ नागरिक मन्त्रालयमा गढीमाई मेलामा सहयागको आग्रह गर्दा मन्त्रालयले बजेट नभएको जवाफ दिएको गुनासो छ ।
मेलामा हराएकाहरुलाई खोजतलास गर्ने र भेटिएपछि माइकिङ गरेर परिवारका सदस्यलाई जिम्मा लगाउने काम गरिन्छ ।
गत मंसिर १७ गतेबाट संचालनमा आएको शिविरमा हालसम्म १ हजार मानिस हराएको सूचना प्राप्त भकोमा ३ सयको पारिवारिक पूनर्मिलन गराइ सकेको समितिको भनाई छ ।
धार्मिक तथा सांस्कृतिक गतिविधकै कारण विश्वमा परिचित रहेको गढीमाईको महत्वलाई केन्द्रमा राख्दै यसको संरक्षण, संवर्द्धन गर्न सरकारले ध्यान दिन आवश्यक छ ।
