काठमाडौँ । राष्ट्रिय स्वतन्त्र पार्टी (रास्वपा) ले आफ्ना सभापति रवि लामिछानेको मानव अधिकार हनन गरिएको भन्दै राष्ट्रिय मानवअधिकार आयोगमा उजुरी दिएको छ ।
सहकारीको रकम अपचलन गरेको आरोपमा गत कार्तिक २ गते पक्राउ परेका लामिछाने यतिबेला कास्की प्रहरीको हिरासतमा छन् । उनलाई पक्राउ परेदेखि नै प्रहरीले अपमानजनक व्यवहार गर्दै आएको रास्वपाको भनाइ छ । एक जन निर्वाचित प्रतिनिधि हुँदाहुँदै पनि राज्य संयन्त्रबाट लामिछानेलाई अमानवीय, अपमानजनक तथा गैरन्यायिक व्यवहार प्रहरी प्रशासनबाट हुँदै आएको भन्दै रास्वपाले गम्भीर ध्यानाकर्षण समेत गराएको छ ।
लामिछानेलाई विभिन्न जिल्लामा जाहेरी दर्ता गर्न लगाएर सत्तारुढ दलहरुले अनावश्यक दुःख दिने र राजनीतिक प्रतिशोध साँध्ने काम भइरहेको रास्वपाको दाबी छ । यही मंसिर २० गते दिनभर चितवन जिल्ला सरकारी वकिलबाट बयान गराएर राति नै आराम समेत गर्न नदिएर चितवनबाट पोखरा लगेर थुनुवाको अधिकार हनन गरिएको रास्वपाको भनाइ छ । साथै पोखरास्थित हिरासतबाट रविको डायरी समेत गायब पारेको आरोप छ ।
