काठमाडाैँ । चार दिने चीन भ्रमण सकेर प्रधानमन्त्री केपी शर्मा ओली स्वदेश फिर्ता भएका छन् । बिहीवार त्रिभुवन अन्तर्राष्ट्रिय विमानस्थल हुँदै प्रधानमन्त्री ओली स्वदेश फर्किएका हुन् ।

मंसिर १७ गते चिनियाँ समकक्षी लि छ्याङको औपचारिक निमन्त्रणामा चीन गएका प्रधानमन्त्री ओलीले १८ गते चिनियाँ समकक्षी छ्याङसहित चिनियाँ राष्ट्रपति शि जिनपिङसँग पनि भेटवार्ता गरेका थिए । भेटका क्रममा दुई पक्षीय सम्बन्ध बिस्तार लगायत विभिन्न विषयमा सहयोग र सहकार्यसम्बन्धी सहमतिपत्रमा हस्ताक्षर भएको छ ।

भेटका क्रममा चीनका राष्ट्रपति शि जिनपिङले नेपाललाई ५०० मिलियन आरएमबी (करिव नौ अर्ब रुपैयाँ) अनुदान सहयोग घोषणा गरेका थिए । साथै नेपाल सरकार र चीन सरकार बीचको बेल्ट एण्ड रोड सहकार्यको फ्रेमवर्कमा समेत हस्ताक्षर भएको छ ।