कास्की । सहकारी ठगी प्रकरण, संगठित अपराध र सम्पत्ति सुद्दिकरणमा पक्राउ परेका राष्ट्रिय स्वतन्त्र पार्टीका सभापति तथा पूर्व गृहमन्त्री रवि लामिछानेलाई थप १५ दिन हिरासतमा राखेर अनुसन्धान गर्न कास्की जिल्ला अदालतले अनुमति दिएको छ ।
कात्तिक २ गते काठमाडौं वनस्थलीस्थित पार्टी केन्द्रीय कार्यालयबाट पक्राउ परेका लमिछानेलाई आइतबार कास्की अदालतले पाँचौं पटक अनुसन्धानका लागि म्याद थप गरेको हो ।
राष्ट्रिय स्वतन्त्र पार्टीका सभापति रवि लामिछानेलाई कास्की अदालतमा ल्याइने दिन रास्वपाका समर्थकहरूले प्रदर्शन र आन्दोलन गर्ने गर्थे । तर आइतबार भने सडक र अदालत वरिपरिको परिसर सुनसान नै थियो ।
यता सहकारी पीडितहरू पनि देखिएका थिएनन् । सुरक्षा व्यवस्था कडा पारिएको थियो भने छिटपुट रुपमा मात्र रास्वपाका समर्थकहरू अदालत वरिपरिको परिसरमा देखिन्थे ।
सहकारीको रिसले रवि लामिछानेले पैसा खायो भनेर अन्य दलहरुले राजनीतिक खेल खेलेको रास्वपा समर्थकको आरोप छ । दोषी भए कारबाही हुने पर्ने जिकिर गर्दै विना कारण रविलाई दुःख दिन नहुने मीठुदेजी अधिकारी बताउँछिन् ।
संसदीय विशेष छनाबिन समितिको प्रतिबेदनको आधारमा पक्राउ परेका लामिछानेलाई कास्कीमा अनुसन्धान भइरहेकै अवस्थामा सुप्रिम सहकारीको रकम अपचलनको आरोपमा रुपन्देही जिल्ला सरकारी वकिलको कार्यलयमा बयान समेत लिइसकेको छ ।
रविविरुद्ध चितवन र काठमाडौँबाट पनि पक्राउ पुर्जी जारी भइसकेको छ । काठमाडौँको कालीमाटिस्थित स्वर्ण बहुउद्देशीय सहकारी संस्था र चितवनको सहारा चितवन सहकारीको रकम हिनामिनामा रविविरुद्ध पक्राउ पुजी जारी भएको हो ।
रविलाई जस्तै अनुसन्धानका लागि प्रहरी हिरासतमा रहेका उनका पुर्व ब्यापारीक साझेदार छबि बण्जाडे जोसीको पनि बुटवल र काठमाडौमा बयान लिइ कास्की प्रहरीको हिरासतमा छन् ।
बयानका लागि रविलाई पनि काठमाडौँ ल्याउने प्रहरीको तयारी छ । सहकारी ठगीमा सरकारले अहिले सम्म ६ सय जना गिरफ्तार गरि अनुसन्धान गरिरहेको छ ।
