काठमाडाैँ । रक्षामन्त्री मानवीर राईले महाकाली करिडोर बनाउने कुरा सरकारको उच्च प्राथमिकतामा रहेको बताएका छन् । मंगलवार सय दिन पुगेको अवसरमा मन्त्रालयमा आयोजित पत्रकार सम्मेलनमा उहाँले यस्तो बताएका हुन् ।

उनले नेपाल निर्माणदेखि नै नेपाली सेनाको ठूलो भुमिका रहेको उल्लेख गर्दै नेपाली सेनालाई अफ्ठ्यारो पार्ने भन्दा पनि भरलाग्दो, विश्वासिलो भएकै कारणले जिम्मेवारी दिइने गरेको बताए । नेपाली सेनालाई विवादित बनाउने काममा सरकार नरहेको बताउँदै उनले लिपुलेक क्षेत्रको बाटो (महाकाली करिडोर) सरकारको उच्च प्राथमिकतामा रहेको र बजेट कम भएका कारण केही ढिलाइ भइरहेको दाबी गरे । उनले आगामी बजेटमा धेरै भन्दा धेरै बजेट ल्याएर करिडोर सम्पन्न गर्ने विश्वास व्यक्त गरे । 

उनले भने, ‘नेपाल निर्माणदेखि नै नेपाली सेनाको ठूलो भुमिका छ । अति भरपर्दो हिसावले नै जुनसुकै सरकार आउँदा आज होस्, हिजोको सरकार होस्, अहिलेको प्रधानमन्त्रीको नेतृत्वमा रहेको सरकार होस् । नेपाली सेनालाई अफ्ठ्यारो पार्ने भन्दा पनि भरलाग्दो, विश्वासिलो भएकै कारणले जिम्मेवारी दिइने गरेको छ । नेपाली सेनालाई विवादित हुने काममा, विवादित गराउनुपर्छ भन्ने ध्येय उद्देश्य मेरो आफ्नो पनि छैन र हामी कसैको पनि छैन । लिपुलेक क्षेत्रको बाटो अरुतिर त बाटोको पनि आयो । सबै कुरा आयो । त्यो क्षेत्रको विकास निर्माण, बाटोको कुरा कता के पुग्यो भन्ने छ । त्यो करिडोर महाकाली करिडोर अहिले पनि रक्षा मन्त्रालयअन्तर्गत नेपाली सेनाको जिम्मामा छ । बजेटहरु प्रशस्तै नभएका कारण, हाम्रो मुलुकको अर्थतन्त्रको अवस्था, कमजोर अवस्था यि कारणले नै महाकाली करिडोरको जो सडकलाई छिटो भन्दा छिटो हाम्रो नेपालको भूभागतिर, नेपाली जनताहरु जहाँजहाँ हुनुहुन्छ, त्यहाँतिर पुर्याउने कुरा त्यो बाटो बनाउने कुरा ढिलो भएको हो । यसमा हाम्रो उच्च प्राथमिकता रहन्छ । सरकारले यो बाटो बनाउने कुरा करिडोर घोषणा गरेर नेपाली सेनाको जिम्मेवारीमा राखेको छ । यो क्रमशः अघि बढ्छ । नेपालको भूगोल जहाँ छ, जहाँ नेपाली जनता छन्, नेपाली जनताको घर छ, त्यहाँ सुविधा पुर्याउने, बाटो बनाउने कुरा हामीले प्रयास गरिरहेका छौँ । आगामी दिनमा बजेट पर्याप्त मागेर काम सम्पन्न गर्नेछौँ ।’

मन्त्री राईले नेपालको भूगोल र नेपाली जनता भएका ठाउँमा सुविधा र सडक पुर्याउने कुरा सरकारको पहिलो प्राथमिकतामा रहेको बताएका छन् ।